Notísias husi rai oioin

Rai-Alemaña

Iha tinan 2012, tribunál aas liu iha rai-Alemaña halo desizaun katak ema la bele sai husi organizasaun ida neʼebé boot hanesan igreja no kontinua halaʼo atividade nuʼudar membru ba igreja neʼe. Ema katóliku sira neʼebé kontinua halaʼo sira-nia fiar, maibé rezigna an ona husi igreja no la selu tan taxa ba igreja, igreja sei bandu sira atu la bele simu komuñaun, la bele konfesa, la bele halaʼo knaar iha igreja, no la bele halaʼo sira-nia serimónia mate nian iha igreja.

Mundu Tomak

Estudu ida neʼebé ema halaʼo kona-ba relijiaun iha mundu tomak hatudu katak ema neʼebé “la iha relijiaun” agora aumenta toʼo 1.100.000.000. Neʼe hatudu katak sira sai barak toʼo besik hanesan ho ema kristaun sira no ema Izlaun. Ema kristaun maizumenus hamutuk 2.200.000.000 no ema Izlaun maizumenus hamutuk 1.600.000.000. No ema neʼebé la iha relijiaun sai barak liu fali relijiaun Indú neʼebé iha ema maizumenus hamutuk 1.000.000.000.

Rai-Japaun

Matenek-naʼin sira husi rai-Japaun fó sai katak kuandu ema simu gaba, neʼe halo parte ida iha ema nia kakutak laʼo ho diʼak, no ida-neʼe halo ema sente kontente. Buat neʼebé matenek-naʼin sira-neʼe hetan fó prova liután katak dalan diʼak ida atu book ema hodi laʼo ba oin mak gaba sira.

Rai-Bolívia

Iha tinan 2012 nia rohan, governu halaʼo sensus ida iha rai-Bolívia tomak. Atu relatóriu kona-ba sensus neʼe bele loos, governu haruka ema Bolívia sira atu hela deʼit iha uma iha loron neʼebé ema halo sensus ba sira. Liután neʼe, karreta privadu hotu labele laʼo bá-mai, ema labele hemu tua iha loron neʼe, no fronteira sira mós taka.

Rai-Itália

Tuir relatóriu ida, ema Itália sira dehan katak sira halimar ho sira-nia oan ba minutu 15 iha loron ida nia laran. Iha jornál ida naran La Repubblica dehan katak “porsentu 20 deʼit husi inan-aman sira mak sente katak halimar ho sira-nia oan mak parte ida atu hanorin oan sira”. Maibé, Andrea Angiolino, neʼebé kria halimar oioin ba labarik sira, dehan katak hodi halimar ho oan, inan-aman sira bele ajuda oan atu haburas kbiit atu hanoin no hatene “ukun-fuan ruma”.