Notísias husi rai oioin

Rai-ázia

Organizasaun Fundo Mundial para a Natureza, fó sai katak durante tinan 1997 toʼo 2011, ema foin hetan ai-horis no animál foun oioin, hanesan samodok ho matan mean (Trimeresurus rubeus). Sira hetan animál sira-neʼe iha Área Mota Mekong. Mota neʼe suli liu rai-Kamboja, Laus, Myanmar, Tailándia, Vietname, no Xina. Iha tinan 2011 nia laran, sira hetan ai-horis oin 82, ikan oin 13, no animál oin 31.

Rai-europa

Jornál ida (The Moscow Times) hatete katak krime tráfiku umanu sai problema boot iha “rai barak iha Europa”. Ema faʼan vítima sira atu abuza seksuál, obriga sira serbisu, no mós “hasai sira-nia aten, rins, no fuan hodi faʼan fali”. Ema aproveita vítima neʼebé kiak, serbisu la iha, ka tanba ema ladún hafolin feto.

Rai-novazelándia

Peskizadór sira hatete katak se labarik sira nonton televizaun demais, bainhira sira sai joven, sira “gosta sulan an no lakohi besik ema”. Rezultadu husi peskiza hatudu katak labarik sira bele “nonton programa neʼebé diʼak ba oras 1 ka 2 deʼit kada loron, no labele liu ida-neʼe”.

Rai-alaska

Suku barak iha rai-Alaska mak iha tasi ninin ka mota ninin. Bee-saʼe no rai halai mak estraga rai porsentu 86 husi suku sira-neʼe. Baibain, tasi ninin no mota ninin iha jelu-fatuk, neʼebé satan netik anin no udan boot atu la kona suku sira. Maibé tuir relatóriu sira, jelu-fatuk sai nabeen no la bele metin tanba rai agora sai manas liu.

Mundu

Governu sira gasta osan barak hodi halo teknolojia oioin husi anin no loro-matan atubele kria enerjia neʼebé la estraga ambiente. Maski nuneʼe, Maria van der Hoeven, diretora ba organizasaun ida (Agência Internacional de Energia) hatete katak “ohin loron, kria enerjia hanesan neʼe hafoʼer nafatin ambiente, hanesan deʼit ho tinan 20 liubá”.