Kuda nia ain

KUDA (Equus caballus) bele halai toʼo kilómetru 50 iha oras ida nia laran. Maski ninia ain sira book an makaʼas maibé neʼe gasta ninia forsa uitoan deʼit. Tanbasá? Tanba kuda nia ain mak úniku tebes.

Agora mai ita hanoin toʼok kona-ba kuda nia uat sira ho isin iha ain. Bainhira kuda neʼe halai hela, ninia isin ho uat sira iha ain servisu hamutuk hanesan mola ida. Nuneʼe bainhira kuda nia ain kona rai, ninia isin ho uat sira xupa no rai enerjia depois husik fali enerjia neʼe hodi halo nia bele haksoit ba oin.

Bainhira kuda ida halai makaʼas tebes toʼo ain la kona rai, ninia ain nakdoko makaʼas. Maibé, maski nakdoko makaʼas hanesan neʼe mós la hakanek kuda nia uat sira iha ain laran tanba isin iha nia ain sai hanesan xumasu. Matenek-naʼin sira hatete katak kuda nia ain “ho isin no uat sira hanesan neʼe mak estrutura ida neʼebé espesiál tebes” tanba bele halo kuda book an lalais ho forsa boot.

Enjeñeiru sira hakarak inventa robot ho ain haat neʼebé bele halai hanesan kuda. Maibé tuir universidade ida (Biomimetic Robotics Laboratory of the Massachusetts Institute of Technology) dehan katak, susar tebes atu halo nuneʼe tanba matenek no materiál sira neʼebé agora daudauk iha seidauk toʼo atubele halo tuir kuda nia ain.

Tuir Ita-nia hanoin oinsá? Estrutura úniku ida hanesan kuda nia ain neʼe mai husi evolusaun ka lae? Ka Maromak mak kria ida-neʼe?