Oinsá mak bele hetan susesu neʼebé loloos?

Bíblia ajuda ita atu tetu didiʼak saida mak susesu neʼebé loloos. Iha parte ida, Bíblia la dehan katak ema uitoan deʼit neʼebé hetan sorte mak bele moris ho susesu. Maibé iha parte seluk, Bíblia mós la hanorin hanesan ema baibain dehan: ‘Hakaʼas an bá, realiza ó-nia mehi sira no mehi sira hotu sei sai loos duni.’ Ema barak koʼalia hanesan neʼe ba labarik sira husi kiʼik kedas no toʼo ikusmai halo sira laran-triste deʼit tanba mehi hotu neʼebé sira duni tuir la sai realidade.

Loloos, ema hotu-hotu bele duni hetan moris ho susesu. Maibé neʼe presiza hakaʼas an. Mai ita hanoin toʼok matadalan balu husi Bíblia.

• 

  SAIDA MAK BÍBLIA HANORIN?

  “Ema neʼebé hadomi osan-mutin sei la haksolok ho osan-mutin, no ema neʼebé hadomi rikusoin mós sei la haksolok ho osan neʼebé nia manán.”—Eclesiastes (Pengkhotbah) 5:10.

  NEʼE KATAK SÁ? Iha osan barak, neʼe la dehan katak ema sei sente kontente. Maibé baibain neʼe hasusar fali ema. Doutora Jean M. Twenge hakerek iha ninia livru (Generation Me), dehan: “Ema neʼebé hanoin liu ba osan mak bele sai estrese, laran-susar no kona moras depresaun se kompara ho ema neʼebé hafolin liu família no belun sira duké osan. Matenek-naʼin sira haree ona katak laran kontente la bele sosa ho osan. Loos, ema presiza osan atubele han no hemu, maibé iha osan barak liu neʼe la garantia katak ema sei moris kontente liu.”

  SAIDA MAK ITA BELE HALO? Tetu didiʼak atu halaʼo moris hodi buka ba buat neʼebé iha folin, laʼós buka rikusoin deʼit. Jesus Kristu dehan: “Hasees an husi hahalok kaan-teen oioin, tanba maski ema ida hetan rikusoin barak, ninia moris la mai husi buat neʼebé nia iha.”—Lucas 12:15.

• 

  SAIDA MAK BÍBLIA HANORIN?

  “Foti-an sei halo ema rahun, no loko-an sei halo ema monu.” —Provérbios (Amsal) 16:18.

  NEʼE KATAK SÁ? Ema neʼebé foti-an no buka oin sei la moris ho susesu neʼebé loloos. Tuir livru ida (Good to Great) kona-ba xefe kompañia nian balu neʼebé halo serbisu diʼak ba tinan barak ona, dehan: “Sira mak ema neʼebé la hatene gaba an, la buka oin no la gosta ema gaba sira. Maibé besik porsentu 67 husi kompañia sira neʼebé ami haree, iha xefe sira neʼebé foti-an tebes no hanoin sira mak ema importante liu. Tanba sira-nia hahalok hanesan neʼe halo sira-nia kompañia la laʼo ba oin, balu toʼo ikus naksobu tiha.” Loos, dala barak, ema neʼebé foti-an no hanoin an deʼit la bele hetan susesu.

  SAIDA MAK ITA BELE HALO? Duké buka oin deʼit, diʼak liu sai ema neʼebé haraik-an. Bíblia dehan: “Se ema ruma hanoin katak nia ema-boot maski tuir loloos lae, nia lohi ninia an rasik.” Hahalok foti-an sei la lori susesu!—Galásia 6:3.

• 

  SAIDA MAK BÍBLIA HANORIN?

  “Ba ema ida, la iha buat ida neʼebé diʼak liu duké nia . . . haree buat neʼebé diʼak husi ninia serbisu makaʼas.”—Eclesiastes (Pengkhotbah) 2:24.

  NEʼE KATAK SÁ? Se Ita-Boot serbisu ho badinas no fó laran ba serbisu, Ita-Boot sei sente kontente loos ho serbisu neʼe. Doutora Madeline Levine hakerek iha ninia livru (Teach Your Children Well) dehan: “Ita bele hetan susesu iha serbisu se ita halo serbisu neʼe ho matenek, no atu halo nuneʼe presiza hakaʼas an no labele rende an lalais.” Atubele serbisu ho matenek, presiza pasiénsia bainhira hasoru susar.

  SAIDA MAK ITA BELE HALO? Hakaʼas an atu halo serbisu ho matenek no keta rende an. Se Ita-Boot iha oan, husik sira rasik mak koko toʼok rezolve sira-nia problema (depende ba sira-nia tinan no kapasidade). Labele lalais atu ajuda rezolve sira-nia problema hotu. Se Ita-Boot treinu labarik sira atu aprende tahan nafatin bainhira sira hasoru susar, neʼe sei lori kontente ba sira. Ho nuneʼe, bainhira sira boot ona, sira bele hatene rezolve problema.

• 

  SAIDA MAK BÍBLIA HANORIN?

  “Asu neʼebé moris diʼak liu fali leaun neʼebé mate.”—Eclesiastes (Pengkhotbah) 9:4.

  NEʼE KATAK SÁ? Ita fó laran ba serbisu, neʼe la sala, maibé neʼe la dehan katak loron no kalan tomak tenke serbisu hela deʼit. Hanoin toʼok, se Ita-Boot iha serbisu neʼebé diʼak liu hotu maibé moras beibeik ka Ita-Boot nia tempu ba família mós laiha, neʼe mak susesu neʼebé loloos ka lae? Moris ho susesu neʼebé loloos katak fahe tempu ba serbisu, família, no mós kuidadu ba saúde.

  SAIDA MAK ITA BELE HALO? Kuidadu ba Ita-Boot nia saúde rasik no presiza deskansa. Se ema ida halo serbisu barak demais toʼo lakon ninia saúde diʼak, família, no kolega sira, neʼe mak susesu neʼebé falsu deʼit.

• 

  SAIDA MAK BÍBLIA HANORIN?

  “Kontente ba sira neʼebé hatene katak sira presiza Maromak nia matadalan.”—Mateus 5:3.

  NEʼE KATAK SÁ? Se hakarak hetan moris ho susesu neʼebé loloos, tenkesér estuda Bíblia no halo tuir matadalan sira iha Bíblia. Testemuña ba Jeová sira mak ema rihun ba rihun neʼebé fiar katak adora ba Maromak mak buat neʼebé folin liu iha sira-nia moris. Neʼe halo sira la hanoin barak tan kona-ba osan no rikusoin.—Mateus 6:31-33.

  SAIDA MAK ITA BELE HALO? Estuda Bíblia hodi nuneʼe Ita-Boot bele halaʼo moris ho susesu neʼebé loloos. Atu hatene informasaun klaru liután, bele kontaktu ba Testemuña ba Jeová sira neʼebé besik iha Ita-Boot nia hela-fatin ka loke sítiu iha internét, www.jw.org/tdt