Bíblia la vale ona ka lae?

HUSI kiʼik kedas, Hilton gosta tuku malu. Bainhira nia tinan hitu deʼit, nia komesa ona tuir desportu tinju no tuku malu iha fatin neʼebé deʼit! Tempu neʼebé nia sei iha eskola sekundária, nia toman laʼo ho nia kolega sira hodi buka ema sé deʼit atu baku. Nia konta: “Haʼu toman naʼok, joga, haree pornografia, book feto sira no tolok inan-aman. Haʼu-nia inan-aman hanoin haʼu-nia hahalok aat neʼe la bele troka ona. Ikusmai bainhira eskola ramata, haʼu sai husi uma.”

Liutiha tinan 12, Hilton fila fali ba inan-aman nia uma. Bainhira inan-aman haree Hilton sai fali ema neʼebé maus, kalma, no respeitu ema, sira la bele fiar katak nia mak sira-nia oan! Saida mak troka ninia hahalok? Husi tempu neʼebé Hilton sai tiha husi uma, nia komesa hanoin didiʼak kona-ba ninia moris. Nia mós hahú estuda Bíblia hodi buka-hatene oinsá nia bele troka ninia hahalok. Hilton hatete: “Haʼu halo tuir buat neʼebé Bíblia hatete, nuneʼe haʼu husik tiha haʼu-nia hahalok uluk nian, no hodi halo tuir liafuan iha Éfeso 6:2, 3, neʼe halo haʼu hatudu respeitu ba inan-aman. Haʼu foin mak hetan haksolok neʼebé loloos iha haʼu-nia moris no mós lori haksolok ba haʼu-nia inan-aman, neʼe halo sira la ulun-moras tan!”

Hilton nia esperiénsia hatudu katak Bíblia laʼós livru neʼebé la vale ona. Loos, toʼo ohin loron Bíblia iha kbiit boot atu troka ema nia hahalok. (Ebreu 4:12) Bíblia bele ajuda ema hatudu hahalok diʼak hanesan laran-moos, kontrola an, laran-metin no domin. Oinsá mak hahalok hirak-neʼe bele lori haksolok ba ita-nia moris?