Padre ida sai husi ninia igreja

Konta toʼok mai ami kona-ba Ita-nia moris.

Haʼu moris iha knua kiʼik ida iha rai-Itália iha tinan 1943. Haʼu iha maun naʼin-rua, alin-mane ida no feton rua. Ami-nia apá mak toʼos-naʼin no karpinteiru. Ami-nia inan-aman hanorin ami atu sai ema Katólika neʼebé diʼak.

Tanbasá Ita hakarak sai padre?

Bainhira haʼu sei labarik, haʼu gosta rona ba padre sira iha igreja. Haʼu gosta tebes sira-nia lian no mós serimónia neʼebé halaʼo iha igreja. Tan neʼe, haʼu hakarak tebes atu sai padre. Bainhira haʼu tinan 13, haʼu-nia amá hatama haʼu ba semináriu.

Ita mós estuda Bíblia iha semináriu ka lae?

Ladún. Bainhira haʼu tinan 15, haʼu-nia mestre ida fó Evanjellu mai haʼu. Evanjellu sira konta kona-ba Jesus nia moris no ninia serbisu haklaken. Haʼu lee Evanjellu sira-neʼe dala balu. Bainhira haʼu tinan 18, haʼu bá Roma no estuda iha universidade oioin neʼebé papa mak tau matan. Iha neʼebá, haʼu estuda lian Latina, lian Gregu, istória, filozofia, psikolojia no teolojia. Maski ami lee versíkulu balu husi Bíblia no rona ema lee eskritura durante misa iha loron-domingu, maibé loloos ami ladún estuda Bíblia.

Ita sai reitór, neʼe envolve hanorin ema ka lae?

Haʼu halo serbisu barak liu iha administrasaun. Maibé haʼu mós hanorin iha klase balu.

Tanbasá Ita komesa duvida kona-ba igreja nia hanorin?

Iha buat tolu neʼebé halo haʼu duvida. Igreja envolve an iha polítiku. Igreja la preokupa ho padre sira no sarani sira-nia hahalok aat. No iha mós doutrina Katólika balu neʼebé haʼu sente ladún loos. Porezemplu, oinsá mak Maromak neʼebé domin bele kastigu ema ba nafatin depois sira mate? No mós, Maromak gosta ka lae se ita reza tersu beibeik?a

Saida mak Ita halo?

Ho matan-been haʼu halo orasaun atu husu matadalan. Haʼu mós sosa Bíblia Katólika Jerusalem Bible neʼebé foin tradús ba lian Italianu, no haʼu komesa lee. Tuirmai, iha loron-domingu ida depois misa bainhira haʼu tara hela haʼu-nia batina, iha mane naʼin-rua mai semináriu. Sira mak Testemuña ba Jeová. Ami koʼalia maizumenus ba oras ida kona-ba Bíblia no oinsá mak Bíblia ajuda ita atu hatene relijiaun neʼebé loos.

Oinsá Ita-nia hanoin kona-ba sira?

Haʼu admira tanba sira ho fiar metin no lalais atu loke eskritura sira husi Bíblia Katólika. Tuirmai, Testemuña seluk naran Mario komesa vizita haʼu. Nia hatudu pasiénsia no laran-metin. Nia sempre vizita haʼu iha loron-sábadu tuku sia dadeer maski tempu manas ka udan.

Padre sira seluk sente oinsá?

Haʼu konvida sira atu estuda, maibé sira sente katak la importante atu estuda Bíblia. Maibé haʼu kontente tebes atu estuda Bíblia. Haʼu aprende buat furak oioin, hanesan tanbasá Maromak husik terus no buat aat akontese. Ba tempu kleur ona, haʼu hakarak hatene kona-ba neʼe.

Ulun-naʼin igreja koko hanetik Ita atu la estuda Bíblia ka lae?

Iha tinan 1975, haʼu bá Roma dala balu atu esplika haʼu-nia fiar. Padre sira neʼebé iha pozisaun boot liu haʼu koko atu troka haʼu-nia hanoin, maibé sira ida mós la uza Bíblia. Ikusmai, iha loron 9 Janeiru 1976, haʼu hakerek karta ba Roma hodi rezigna an husi igreja Katólika. Loron rua tuirmai, haʼu sai husi semináriu no saʼe komboiu atu tuir Testemuña ba Jeová nia reuniaun. Neʼe mak dala primeiru haʼu tuir reuniaun. Tuir loloos, iha tempu neʼe sira halaʼo hela reuniaun boot no kongregasaun barak tuir. Buat hotu mak foun tebes ba haʼu. Testemuña hotu kaer Bíblia no loke eskritura sira neʼebé oradór temi durante diskursu sira.

Ita-nia família sente oinsá kona-ba neʼe?

Sira barak kontra makaʼas haʼu. Maibé haʼu rona katak haʼu-nia alin-mane estuda Bíblia ho Testemuña iha Lombardy, iha rai-Itália nia parte norte. Haʼu bá vizita nia, no tuirmai Testemuña sira ajuda haʼu atu hetan serbisu no hela-fatin. Iha tinan neʼe, haʼu hetan batizmu nuʼudar Testemuña ba Jeová.

Ita arrepende Ita-nia desizaun ka lae?

Lae duni! Agora haʼu sente besik liu ba Maromak tanba buat neʼebé haʼu hatene kona-ba nia bazeia ba Bíblia, laʼós bazeia ba filozofia ka igreja nia tradisaun. No haʼu bele hanorin ema seluk ho fiar no laran-moos.