Ikan-kakatua neʼebé halo rai-henek tasi

RAI-HENEK barak iha tasi-laran loloos mai husi neʼebé? Iha dalan oioin atu halo rai-henek tasi. Maibé, iha rai-henek balu neʼebé ikan oin ida mak halo hodi nata ahu-ruin sira iha tasi laran. Ikan neʼe mak ikan-kakatua!

Ita bele hetan ikan-kakatua iha fatin naran deʼit neʼebé iha ahu-ruin. Ikan sira-neʼe tolan tiha ahu-ruin rahun no xupa hahán kiʼik sira neʼebé belit iha ahu-ruin neʼe. Tuirmai, sira nata ahu-ruin sira-neʼe halo uut ho sira-nia hasan neʼebé haree hanesan manu nia ibun no mós nehan neʼebé forte tebes, no sira tee fali ida-neʼe sai rai-henek tasi. Ikan neʼe nia rasa balu bele moris kleur toʼo tinan 20, no sira-nia nehan sei forte nafatin toʼo mate.

Iha área balu, rai-henek tasi neʼebé ikan-kakatua halo mak barak liu fali rai-henek neʼebé laloran mak fera fatuk sira ka fatuk ida mak harahun fatuk seluk. Sientista sira hatete katak ikan-kakatua ida bele halo rai-henek tasi kilograma atus ba atus iha tinan ida nia laran tanba ikan neʼe kontinua nata nafatin ahu-ruin sira neʼebé mate ona.

Ikan-kakatua mós halo tan buat importante ida. Tanba ikan neʼe toman han ahu-ruin sira neʼebé mate ona no mós buat kiʼik sira neʼebé belit iha ahu-ruin, ida-neʼe ajuda hamoos tasi no halo ahu-ruin sira sai buras ba beibeik. Iha tasi neʼebé la iha ikan-kakatua no ikan sira seluk neʼebé bele hamoos ahu-ruin, duʼut-tasi mak sei domina ahu-ruin sira no ahu-ruin sira sei sai foʼer. Livru ida hatete: “Se la iha ikan neʼebé hamoos tasi-laran, ita mós la bele hare ahu-ruin sira neʼebé furak hanesan ita haree ohin loron.”—Livru Reef Life.

Tanba ikan-kakatua sira nata ahu-ruin iha loron, tan neʼe iha kalan sira presiza deskansa didiʼak. Baibain, ikan kiʼik sira presiza kuidadu ba ikan boot neʼebé buka atu han sira. Nuneʼe durante kalan ikan-kakatua sira subar an iha fatuk-boot nia okos. Maibé, dala ruma ikan-tubaraun sira neʼebé hamlaha ona bele hetan ikan sira-neʼe. Tan neʼe, atubele deskansa ho seguru, ikan-kakatua balu iha tan toman ida neʼebé úniku.

Ikan-kakatua balu hasai buat neʼebé hanesan jel husi sira-nia ibun. Tuirmai, sira halo jel neʼe falun sira-nia isin tomak, no ida-neʼe sai hanesan sira-nia roupa toba nian. Tanbasá? Tanba ikan boot sira la gosta jel nia dois no sei la hakbesik ba sira.

Baibain la susar ba ema neʼebé luku tasi atu haree ikan-kakatua iha fatin neʼebé ahu-ruin iha. Nuʼudar ikan neʼe sai boot, inan no aman hotu troka sira-nia kulit nia kór, kór sira-neʼe sai moris loos no haree furak tebes. Ikan neʼe mós maus ba ema liuliu iha tasi neʼebé ema ladún kaer ikan beibeik, tan neʼe lukudór sira bele haree ikan neʼe.

Se ita besik loos ba ikan-kakatua, ita bele haree no rona sira halo tarutu bainhira sira nata hela ahu-ruin. No ema barak neʼebé rona no haree ona hatete katak neʼe mak esperiénsia kapás ida iha tasi-laran. Loos duni, nuʼudar sira nani no halo tasi-laran sai furak loos ho sira-nia kór oioin, sira mós badinas hamoos tasi-laran no halo ita haksolok ho Maromak nia kriasaun.