INFORMASAUN IHA OIN
Oinsá mak ita bele kontrola ita-nia toman sira?
DADEER-SAAN, Austin hadeer tanba alarma. Maski nia matan-dukur hela, nia hatais kedas ninia roupa ezersísiu nian neʼebé nia prepara nanis, no bá halai. Nia halo hanesan neʼe semana ida dala tolu durante tinan ida nia laran. Laura foin haksesuk malu ho ninia laʼen. Laura sai hirus no estrese, tan neʼe nia halai ba dapur, loke jeleira, foti xokolate, no han hotu kedas. Neʼe mak buat neʼebé nia sempre halo bainhira nia estrese.
Saida mak hanesan husi Austin no Laura? Maski sira hatene ka lae, sira ida-idak iha ona toman ruma. Sin, toman mak buat neʼebé iha forsa makaʼas atu kontrola ita-nia moris.
Oinsá ho Ita? Ita hakarak haburas toman diʼak ruma ka lae? Karik, Ita hakarak iha toman diʼak hanesan halo ezersísiu beibeik, toba sedu, ka kontaktu beibeik Ita-nia família ka belun neʼebé Ita hadomi.
Karik Ita mós hakarak atu husik toman aat ruma, hanesan fuma, han demais buat neʼebé ladiʼak ba saúde, ka gasta tempu barak ho internét.
Maibé, dala ruma susar atu troka ita-nia toman sira. Loos duni, fasil atu iha toman aat, maibé susar tebes atu husik ida-neʼe.
Oinsá mak ita bele kontrola ita-nia toman sira atu bele halaʼo moris neʼebé kontente liu? Mai ita hanoin kona-ba sujestaun tolu husi Bíblia nia matadalan sira.