Sigarra neʼebé úniku tebes

SIGARRA mak insetu neʼebé moris iha fatin hotu iha mundu tomak, só área Antártida deʼit mak lae. Maibé iha parte leste iha rai-Estadus Unidus iha sigarra oin ida neʼebé úniku tebes no halo sientista sira hakfodak.

Hanoin toʼok: Bainhira tempu manas besik atu hahú, sigarra rihun ba rihun mosu derrepente deʼit ba semana balu. Durante tempu badak neʼe, sira husik sira-nia kulit neʼebé tuan, hasai lian boot, semo, rai sira-nia tolun, no mate. Buat neʼebé halo ita hakfodak mak liutiha tinan 13 ka 17 mak ita foin haree fali jerasaun foun. Saida mak akontese ba insetu sira-neʼe durante tinan barak nia laran?

Maizumenus liutiha semana ida depois sigarra sira mosu, sira buka pár no sigarra-inan ida-idak rai sira-nia tolun maizumenus 400 toʼo 600 iha ai-sanak laran. Lakleur, sigarra-inan no aman hotu mate. Liutiha semana balu, tolun sira-neʼe nakfera, no ular kiʼik neʼebé bolu “ninfa” monu sai ba rai. Tuirmai, iha rai okos, ninfa sira-neʼe xupa ai-abut nia been ba tinan barak nia laran. Ikusmai, bainhira liutiha tinan 13 ka 17, sira saʼe fali nuʼudar jerasaun foun.

Tuir revista ida (Nature), toʼo ohin loron sientista sira seidauk komprende ho didiʼak sigarra sira-neʼe nia siklu moris. No sira balu neʼebé fiar ba teoria evolusaun hakaʼas an atu hatene ho loloos kona-ba sigarra neʼe nia prosesu evolusaun.

Tuir Ita-nia hanoin oinsá? Sigarra neʼe mosu mesak deʼit? Ka Maromak mak kria ida-neʼe?