Hatudu respeitu ba malu

TANSÁ MAK SUSAR?

Laʼen hatete: “Bainhira ami foin kaben, haʼu ho haʼu-nia feen iha hanoin neʼebé la hanesan kona-ba hatudu respeitu. Neʼe la dehan katak ida mak loos no ida mak sala. Maibé dala barak haʼu sente katak haʼu-nia feen presiza koʼalia ho respeitu liután mai haʼu.”

Feen hatete: “Haʼu-nia família nia toman mak atu koʼalia ho lian boot, hatudu sai sentimentu, no korta ema seluk nia liafuan. Neʼe mak ami-nia kultura, laʼós katak ami la hatudu respeitu. Maibé haʼu-nia laʼen nia família nia toman la hanesan duni ho haʼu-nian.”

Iha moris kaben nian, feen-laʼen tenkesér hatudu respeitu ba malu loron-loron. Oinsá mak Ita bele hatudu respeitu ba Ita-nia kaben?

BUAT NEʼEBÉ ITA PRESIZA HATENE

Mane presiza liu atu hetan respeitu. Bíblia hatete ba laʼen sira: “Hadomi imi-nia feen nuʼudar imi hadomi imi-nia an rasik.” Maibé tuirmai dehan: “Feen tenke hatudu respeitu kleʼan ba ninia laʼen.” (Éfeso 5:33) Maski feen no laʼen hotu presiza simu domin no respeitu, maibé laʼen sira mak presiza liu atu hetan respeitu. Laʼen ida naran Carlosa hatete: “Mane sira presiza sente katak sira bele kontrola situasaun, rezolve problema, no tau matan ba família.” Se feen ida hafolin ninia laʼen nia kapasidade no hatudu respeitu, ida-neʼe sei lori benefísiu ba ninia laʼen no mós ba nia an rasik. Feen ida naran Karina hatete: “Haʼu-nia laʼen hatudu liután ninia domin mai haʼu bainhira haʼu hatudu respeitu ba nia.”

Feen mós presiza hetan respeitu. Se laʼen ida la respeitu ninia feen, susar mós ba nia atu hadomi ninia feen. Daniel hatete: “Haʼu presiza respeitu haʼu-nia feen nia hanoin, sujestaun, no mós ninia sentimentu. Maski dala ruma haʼu la komprende tanbasá mak nia sente hanesan neʼe, maibé neʼe laʼós razaun ba haʼu atu la hatudu respeitu.”

Ema ida-idak nia hanoin la hanesan kona-ba respeitu. Maski Ita hanoin katak Ita hatudu respeitu ba Ita-nia kaben, maibé neʼe deʼit latoʼo. Importante mak Ita-nia kaben presiza sente duni katak Ita respeitu nia. Feen ida neʼebé foin temi iha parte “Tansá mak susar?”, dehan: “Maski haʼu hanoin katak haʼu hatudu ona respeitu ba haʼu-nia laʼen, maibé se nia la sente hanesan neʼe, haʼu mak presiza troka.”

SAIDA MAK ITA BELE HALO?

• Hakerek Ita-nia kaben nia hahalok diʼak tolu neʼebé Ita hafolin tebes. Ida-neʼe sei book Ita atu haburas respeitu ba Ita-nia kaben.

• Durante semana ida, analiza Ita rasik nia hahalok (laʼós Ita-nia kaben nian) kona-ba buat tuirmai neʼe.

Ita-nia liafuan. Tuir livru ida (Ten Lessons to Transform Your Marriage), bainhira kaben-naʼin sira koʼalia kona-ba problema, feen-laʼen neʼebé moris kontente iha toman atu fó sai liafuan neʼebé gaba no hatudu respeitu ba malu duké kritika malu. Maibé feen-laʼen neʼebé atu besik soe malu iha toman atu hasai liafuan neʼebé hatún malu.—Bíblia nia matadalan: Provérbios (Amsal) 12:18.

Husu ba Ita-nia an: ‘Haʼu sempre koʼalia ho respeitu ba haʼu-nia kaben ka lae? Haʼu toman atu kritika nia duké gaba nia ka lae? Bainhira haʼu fó sai problema ruma, haʼu koʼalia makaʼas ka lae?’ Husu pergunta hirak-neʼe ba Ita-nia kaben, no depois kompara toʼok ho Ita rasik nia resposta.—Bíblia nia matadalan: Koloso 3:13.

Koko toʼok: Halo planu atu gaba Ita-nia kaben nia hahalok diʼak loron-loron. Atu bele halo nuneʼe, hanoin fali kona-ba Ita-nia kaben nia hahalok diʼak tolu neʼebé Ita hakerek ona. Sai toman atu hatete sai buat neʼebé Ita hafolin kona-ba nia.—Bíblia nia matadalan: 1 Korinto 8:1.

Ita-nia hahalok. Feen ida naran Alicia hatete: “Haʼu uza tempu barak hodi halo serbisu uma-laran. Tan neʼe, kuandu haʼu-nia laʼen haloot ninia sasán ka fase bikan, haʼu sente katak nia respeitu haʼu no hafolin haʼu-nia hakaʼas-an.”

Husu ba Ita-nia an: ‘Haʼu-nia hahalok hatudu ho klaru katak haʼu respeitu haʼu-nia kaben ka lae? Haʼu fó haʼu-nia tempu no atensaun ba nia ka lae?’ Ita-nia kaben nia resposta mós hanesan ho Ita-nian ka lae?

Koko toʼok: Hakerek dalan tolu kona-ba oinsá mak Ita hakarak Ita-nia kaben atu hatudu respeitu ba Ita, no husu Ita-nia kaben atu hakerek mós ninian. Depois, troka lista ba malu, no ida-idak sei hakaʼas an atu halo tuir buat neʼebé ninia kaben hakerek ona. Baibain, se Ita hadiʼa uluk Ita-nia hahalok no hatudu respeitu ba Ita-nia kaben, neʼe sei ajuda duni Ita-nia kaben atu nia mós hatudu respeitu ba Ita.