INFORMASAUN IHA OIN | ESPIRITIZMU—PERIGU KA LAE?
Forsa neʼebé la baibain!
“Istória kona-ba demóniu neʼebé tama ema . . . aumenta ba beibeik, no sai populár liu fali vampir no zombi.”—The Wall Street Journal.
OHIN LORON, iha livru, filme no vídeo game barak kona-ba matan-dook, labarik neʼebé uza sihir, no vampir neʼebé bonitu. Saida mak halo ema barak gosta buat sira-neʼe?
Profesór Claude Fischer neʼebé estuda sosiolojia hatete: “Iha tempu uluk porsentu 10 husi ema amerikanu mak fiar katak mate-klamar iha, maibé ohin loron porsentu 30 liu mak fiar ida-neʼe. . . . Se kompara ho ema neʼebé idade ona, joven barak liu mak bá matan-dook ka siʼikdór, ka fiar katak mate-klamar iha.”
Ohin loron, istória kona-ba espíritu aat sai barak liután ba beibeik. Jornál ida iha rai-Estadus Unidus (The Wall Street Journal) hatete: “Tanba ema haree ona filme oioin kona-ba zombi no vampir sira, neʼe halo ema gosta liután istória kona-ba espíritu aat neʼebé tama ema.”
Peskiza ida fó sai katak, “porsentu 25 toʼo 50 husi ema iha mundu tomak fiar katak mate-klamar iha, no livru barak husi kultura oioin fó sai kona-ba buan sira”. Tuir peskiza ida neʼebé halaʼo iha rai-Estadus Unidus, “porsentu 70 toʼo 80 husi ema amerikanu fiar katak iha duni akontesimentu balu neʼebé espíritu ka buan ruma mak hamosu”.
Entaun, haree filme buan, lee livru kona-ba matan-dook, ka envolve an ho forsa espíritu nian neʼebé la baibain, buat sira-neʼe mak halimar deʼit, ka bele lori perigu ba ita?