Bani neʼebé bele tun iha fatin naran deʼit

BANI sira iha matenek atu tun iha fatin naran deʼit. Oinsá mak sira bele halo ida-neʼe?

Hanoin toʼok: Atu bele tun ho seguru iha fatin naran deʼit, sira presiza trava sira-nia an hodi hamenus velosidade foin antes atu tun. Atu halo nuneʼe, sira presiza hatene buat rua: Ida mak sira-nia velosidade, no ida seluk mak distánsia entre sira-nia an ho fatin neʼebé sira atu tun bá. Maibé susar ba insetu barak atu hamenus velosidade tanba sira-nia matan la bele sukat distánsia.

Bani nia matan la hanesan duni ho ema nian. Estudu fó sai katak, bainhira bani ida hakbesik daudaun ba objetu ruma, karik tuir ninia haree objetu neʼe sai boot ba beibeik lalais liután. Tuir peskiza husi universidade ida (Australian National University), bani sira hamenus sira-nia velosidade atu nuneʼe objetu neʼebé sira haree sai boot neineik-neineik. Ikusmai, bainhira sira toʼo ona ba objetu neʼe, sira-nia velosidade sai menus toʼo besik zero no sira bele tun ho seguru.

Jornál ida (Proceedings of the National Academy of Sciences) hatete katak bani nia dalan atu tun ba fatin oioin mak furak tebes, no sientista barak buka dalan atu aplika ida-neʼe ba robot sira neʼebé semo.

Tuir Ita-nia hanoin oinsá? Bani nia matenek atu tun iha fatin oioin, neʼe mosu mesak deʼit? Ka Maromak mak kria ida-neʼe?