Bainhira oan sira hela ketak

TANSÁ MAK SUSAR?

Feen-laʼen balu hasoru problema iha sira-nia moris kaben nian bainhira sira-nia oan sai boot no hela ketak ona. Dala ruma, feen-laʼen bele sente katak sira la koñese malu ona. Matenek-naʼin ida naran M. Gary Neuman hakerek: “Haʼu ajuda ema barak neʼebé la hatene oinsá atu sai toman fali ho sira-nia pár. Bainhira sira-nia oan hela ketak ona, inan-aman ladún hatene atu koʼalia saida ba malu.”a

Ita mós hasoru problema hanesan neʼe ka lae? Se Ita hatán “Sin”, Ita bele hadiʼa Ita-nia moris kaben nian. Ulukliu, mai ita haree tanbasá mak dala ruma relasaun entre feen-laʼen sai fraku.

TANSÁ MAK SUSAR NEʼE MOSU?

Ba tinan barak, ita tau uluk oan sira-nia presiza. Inan-aman barak tau oan sira-nia presiza uluk duké sira rasik nia presiza nuʼudar feen-laʼen. Tan neʼe, sira sai toman atu hanoin liu kona-ba sira-nia knaar nuʼudar inan-aman maibé haluha katak sira mós feen no laʼen. Ikusmai, bainhira sira-nia oan sai boot no hela ketak ona, sira foin rekoñese katak sira ladún besik malu nuʼudar feen-laʼen. Feen ida neʼebé tinan 59 dehan: ‘Uluk bainhira ami-nia oan hela hamutuk ho ami, ami halo atividade oioin hamutuk. Maibé depois ami-nia oan hela ketak, haʼu no haʼu-nia laʼen nia hakarak la hanesan.’ Loron ida, nia hatete ba ninia laʼen: “Haʼu la tahan ona ho ó.”

Feen-laʼen balu la toman ho situasaun foun neʼe. Livru ida (Empty Nesting) hatete: “Ba feen-laʼen barak, neʼe hanesan sira foin hahú moris kaben nian.” Sira sente katak sira la interese ba buat neʼebé hanesan, tan neʼe sira halaʼo sira-nia moris ketaketak. Toʼo ikusmai, sira la moris hanesan feen-laʼen maski sira hela iha uma ida.

Maibé tuir loloos, ita bele moris kontente nuʼudar feen-laʼen maski oan sira hela ketak ona. Mai ita haree oinsá mak Bíblia nia matadalan bele ajuda ita.

SAIDA MAK ITA BELE HALO?

Simu realidade. Kona-ba oan sira neʼebé boot ona, Bíblia dehan: “Mane ida sei husik ninia aman no inan.” (Gênesis [Kejadian] 2:24) Nuʼudar inan-aman, ita-nia hakarak mak treinu didiʼak ita-nia oan toʼo sira bele hela ketak no halaʼo moris nuʼudar ema boot. Se nuneʼe, ita bele sente kontente no orgullu kuandu ita-nia oan sai boot toʼo hela ketak.​—Bíblia nia matadalan: Marcos 10:7.

Maski ita-nia oan sai boot ona, ita nafatin sira-nia inan ka aman. Maibé agora ita iha knaar foun, neʼe mak atu sai nuʼudar konsellu-naʼin ba ita-nia oan bainhira sira husu ajuda. Hodi halo nuneʼe, ita bele mantein ita-nia relasaun diʼak ho ita-nia oan, no mós bele fó tempu no atensaun barak liután ba ita-nia kaben.b​—Bíblia nia matadalan: Mateus 19:6.

Fó sai Ita-nia hanoin ba malu. Koʼalia ba Ita-nia kaben kona-ba saida mak Ita sente ho mudansa neʼe, no mós rona didiʼak ba Ita-nia kaben nia sentimentu. Hatudu pasiénsia, no hakaʼas an atu komprende malu. Karik presiza tempu atu hametin fali imi-nia relasaun, maibé imi-nia hakaʼas-an neʼe sei la saugati deʼit.​—Bíblia nia matadalan: 1 Korinto 13:4.

Halo atividade hamutuk. Koʼalia kona-ba buat neʼebé imi bele halo hamutuk nuʼudar feen-laʼen, ka planu neʼebé imi hakarak kumpre hamutuk. Imi hetan esperiénsia no matenek barak durante haboot imi-nia oan. Tanbasá imi la uza buat hirak-neʼe atu ajuda ema seluk?—Bíblia nia matadalan: Jó [Ayub] 12:12.

Hametin liután imi-nia relasaun. Hanoin toʼok kona-ba Ita-nia kaben nia hahalok diʼak sira neʼebé uluk book Ita atu gosta nia. Hanoin mós kona-ba imi-nia moris kaben nian durante tinan hirak-neʼe nia laran, inklui mós susar oioin neʼebé imi hasoru ona. Maski agora imi-nia situasaun troka, maibé se imi hakaʼas an hamutuk, imi bele hametin liután imi-nia relasaun nuʼudar feen-laʼen no haburas fali imi-nia domin ba malu hanesan uluk.