Sipu-tasi nia kulit

SIPU-TASI hetan protesaun husi sira-nia kulit. No neʼe ajuda sira atu moris iha kondisaun neʼebé susar, no mós tahan forsa makaʼas husi tasi. Tan neʼe enjeñeiru sira halo peskiza kona-ba sipu-tasi nia kulit, hodi nuneʼe sira bele inventa karreta ka harii uma neʼebé bele proteje ema.

Hanoin toʼok: Enjeñeiru sira analiza didiʼak sipu-tasi oin rua, modelu bivalve (ramiis) no espirál (sipu-tasi ho modelu hanesan parafuzu). Enjeñeiru sira deskobre katak sipu-tasi modelu bivalve nia kulit bele tahan forsa makaʼas husi tasi, no fahe ida-neʼe ba parte ninin husi sira-nia kulit. Sipu-tasi modelu espirál mós halo buat neʼebé hanesan, maibé nia fahe forsa husi tasi ba parte klaran no leten iha sira-nia kulit. Tuir loloos, sipu-tasi oin rua neʼe uza prinsípiu neʼebé hanesan, sira fahe forsa husi tasi ba parte neʼebé toos liu iha sira-nia kulit, no neʼe proteje sira.

Enjeñeiru sira mós kompara sipu-tasi neʼebé orijinál ho sipu-tasi neʼebé sira halo ho mákina, atu haree ida neʼebé mak bele tahan forsa makaʼas liu. Rezultadu mak sipu-tasi orijinál bele tahan forsa dala rua liu fali sipu-tasi neʼebé mákina mak halo.

Livru ida (Scientific American) hatete: “Se loron ida, ema bele saʼe karreta ho modelu hanesan sipu-tasi, neʼe sei proteje ema nia moris no neʼe haree kapás tebes.”

Tuir Ita-nia hanoin oinsá? Sipu-tasi nia kulit mosu mesak deʼit, ka Maromak mak kria?