10 Ema Bele Tau Fiar

NEʼE KATAK SÁ

Se Ita halo tuir regra, kumpre Ita-nia promesa, koʼalia buat loos, Ita-nia inan-aman, kolega, no mós patraun sei tau fiar ba Ita.

TANBASÁ IMPORTANTE

Dala barak, liberdade neʼebé Ita simu depende ba hahalok neʼebé Ita hatudu hodi prova katak ema bele tau fiar ba Ita.

“Dalan diʼak liu atu halo inan-aman tau fiar ba Ita mak hodi hatudu katak Ita mak ema maduru neʼebé hatene kaer responsabilidade maski Ita hamutuk ho sira ka mesak.”​—Sarahi.

BÍBLIA NIA PRINSÍPIU: “Hatudu nafatin hahalok diʼak.”​—1 Pedro 2:12.

SAIDA MAK ITA BELE HALO

Hakat sira tuirmai bele halo ema tau fiar liután ba Ita.

Hatudu laran-moos. Ema sei la fiar tan Ita se Ita bosok. Maibé bainhira Ita koʼalia buat neʼebé loos no la subar Ita-nia sala, neʼe halo fasil ba ema atu tau fiar ba Ita.

“Fasil atu koʼalia nakloke bainhira Ita la halo sala ruma. Maibé se Ita koʼalia nakloke kona-ba Ita-nia sala, ema sei tau fiar liután ba Ita.”​—Caiman.

BÍBLIA NIA PRINSÍPIU: “Ami hakarak atu hatudu laran-moos iha buat hotu.”​—Ebreu 13:18.

Haburas hahalok atu ema bele tau fiar. Neʼe bele ajuda Ita bainhira Ita sai boot. Relatóriu ida husi Estadus Unidus fó sai katak porsentu 78 husi kompañia sira buka serbisu-naʼin neʼebé sira bele tau fiar tanba hahalok neʼe importante tebes.

“Haʼu-nia inan-aman haree katak haʼu halo serbisu uma-laran hodi la hein toʼo sira mak husu haʼu atu halo. Bainhira haʼu halo nuneʼe, sira tau fiar liután ba haʼu.”​—Sarah.

BÍBLIA NIA PRINSÍPIU: “Haʼu fiar katak ó sei halo tuir, . . . haʼu hatene katak ó sei halo barak liu fali buat neʼebé haʼu dehan.”​—Filemon 21.

Hatudu pasiénsia. Fasil ba ema seluk atu haree Ita sai boot iha dalan fíziku, maibé presiza tempu ba sira atu bele rekoñese katak Ita-nia hahalok sai maduru.

“Presiza duni tempu atu Ita-nia inan-aman no ema seluk bele tau fiar ba Ita. Maibé se Ita kontinua hakaʼas an, ikusmai sira sei tau fiar ba Ita.”​—Brandon.

BÍBLIA NIA PRINSÍPIU: “Tau hahalok . . . pasiénsia.”​—Koloso 3:12.