Aprende atu serbisu ho badinas mak hanesan ho ezersísiu, neʼe lori buat diʼak ba Ita agora no mós iha futuru
BA JOVEN
11 Sai Badinas
NEʼE KATAK SÁ
Ema neʼebé badinas kontente atu serbisu hodi bele sustenta sira-nia moris no ajuda ema seluk maski sira-nia serbisu mak simples deʼit.
TANBASÁ IMPORTANTE
Maski hakarak ka lakohi, iha responsabilidade barak neʼebé ita presiza kaer. Ema barak lakohi serbisu ho badinas, maibé tuir loloos se ita badinas, neʼe sei lori benefísiu.—Eclesiastes 3:13.
“Kuandu ita serbisu ho badinas, ita sente kontente no orgullu. Sentimentu neʼe mak ajuda haʼu atu gosta serbisu. Serbisu ho badinas mós ajuda ita atu iha naran diʼak.”—Reyon.
BÍBLIA NIA PRINSÍPIU: “Serbisu makaʼas hotu sei lori buat diʼak.”—Provérbios 14:23.
SAIDA MAK ITA BELE HALO
Haburas hanoin pozitivu kona-ba serbisu hodi halo tuir hakat sira tuirmai.
Halo buat hotu ho didiʼak. Maski Ita halo serbisu uma-laran, halo TPC ka halo serbisu hodi manán osan, diʼak atu halo ho laran. Bainhira Ita halo ona knaar ida, buka dalan atu halo ida-neʼe ho didiʼak ka lalais liután. Se Ita sai matenek atu halo serbisu, Ita sei gosta serbisu neʼe.
BÍBLIA NIA PRINSÍPIU: “Ó haree ona ema neʼebé matenek kona-ba ninia serbisu ka lae? Nia sei la hamriik iha ema baibain nia oin, maibé nia sei hamriik iha liurai sira-nia oin.”—Provérbios 22:29.
Keta hanoin an deʼit. Kuandu halaʼo Ita-nia responsabilidade ho didiʼak, neʼe bele ajuda ema seluk. Porezemplu, bainhira Ita halo serbisu uma-laran ho badinas, neʼe sei hamenus ema seluk nia serbisu.
BÍBLIA NIA PRINSÍPIU: “Kontente liu atu fó duké simu.”—Apóstolu 20:35.
Halo serbisu barak liután. Duké halo deʼit serbisu neʼebé ema fó ba Ita, koko toʼok atu halo serbisu seluk tan. Neʼe halo Ita sente katak Ita mak kontrola Ita-nia moris, tanba laʼós ema seluk mak obriga Ita maibé Ita rasik mak hakarak.—Mateus 5:41.
BÍBLIA NIA PRINSÍPIU: “Ó halo buat diʼak laʼós tanba haʼu obriga, maibé tanba ó-nia hakarak rasik.”—Filemon 14.
Moris ho balansu. Badinas laʼós katak serbisu hela deʼit. Ema neʼebé badinas gosta serbisu makaʼas, maibé mós goza sira-nia tempu deskansa.
BÍBLIA NIA PRINSÍPIU: “Diʼak liu deskansa uitoan duké serbisu makaʼas demais, tanba neʼe hanesan duni tuir anin.”—Eclesiastes 4:6.