Importante atu hetan matadalan husi ema boot

SÉ MAK BELE FÓ MATADALAN BA OAN?

Oan presiza matadalan husi ema neʼebé boot iha sira-nia moris. Nuʼudar inan-aman, Ita mak iha responsabilidade atu halo nuneʼe, tuir loloos, neʼe mak Ita-nia knaar. Maski nuneʼe, ema boot seluk mós bele ajuda Ita-nia oan iha dalan hanesan neʼe.

TANBASÁ MATADALAN HUSI EMA BOOT IMPORTANTE?

Iha rai balu, labarik sira ladún iha oportunidade barak atu ransu hamutuk ho ema neʼebé boot. Haree toʼok ezemplu tuirmai:

• Oan sira uza tempu barak iha eskola neʼebé estudante mak barak liu fali mestre no mestra.

• Fila husi eskola, labarik balu hela mesak deʼit iha uma tanba inan-aman bá hotu serbisu.

• Relatóriu ida husi Estadus Unidus hatete, labarik ho idade 8 toʼo 12 uza sira-nia tempu maizumenus oras neen loroloron atu haree televizaun, rona múzika, no halimar vídeo game.a

Livru ida (Hold On to Your Kids) hatete: “Labarik barak mak husu matadalan ba sira-nia kolega seluk duké husu ba ema boot hanesan inan-aman no mestre sira.”

OINSÁ ATU FÓ MATADALAN

Gasta tempu ho Ita-nia oan.

BÍBLIA NIA PRINSÍPIU: “Hanorin labarik atu laʼo iha dalan neʼebé diʼak ba nia; bainhira nia sai boot, nia sei la sees husi dalan neʼe.”​—Provérbios 22:6.

Baibain oan hakarak sira-nia inan-aman mak hanorin sira. Matenek-naʼin sira hatete katak maski oan sira idade 13 ba leten, sira hafolin liu inan-aman nia matadalan duké sira-nia kolega. Doutór ida naran Laurende Steinberg hakerek iha livru ida: “Husi tempu neʼebé oan sei kiʼik toʼo sira boot, inan-aman mak ema neʼebé fó impaktu boot ba sira-nia moris liu fali ema seluk.” Nia hatutan: “Oan sira hakarak hatene saida mak Ita hanoin no saida mak Ita koʼalia, maski sira la konkorda no haree hanesan sira lakohi rona ba Ita.”—You and Your Adolescent.

Tanba loloos Ita-nia oan buka Ita-nia matadalan, Ita presiza hakaʼas an atu fó ba sira. Gasta tempu hamutuk, fahe Ita-nia hanoin, matadalan, no esperiénsia ba sira.

Ajuda oan hetan matadalan husi ema seluk.

BÍBLIA NIA PRINSÍPIU: “Ema neʼebé laʼo hamutuk ho ema matenek sei sai matenek.”​—Provérbios 13:20.

Iha ka lae, ema boot ida neʼebé bele sai ezemplu diʼak ba Ita-nia oan? Karik Ita bele halo planu ba Ita-nia oan atu ransu ho ema neʼe. Klaru katak Ita mak iha nafatin responsabilidade ba Ita-nia oan. Maibé ema boot seluk neʼebé Ita tau fiar mós bele ajuda fó treinu seluk tan ba sira. Iha Bíblia nia tempu, Timóteo, maski joven, hetan benefísiu liuhusi ransu hamutuk ho apóstolu Paulo, no Paulo mós hetan benefísiu tanba ransu ho Timóteo.​—Filipe 2:20, 22.

Ohin loron, ema barak la hela hamutuk iha uma ida nuʼudar família, tanba avó, tiu, tia, no família balu hela iha rai seluk. Se ida-neʼe mak Ita-nia situasaun, koko ajuda Ita-nia oan aprende husi ema seluk neʼebé bele ajuda nia iha hahalok neʼebé diʼak.