Sentimentu
Bíblia anima ita atu haburas sentimentu neʼebé diʼak no kuidadu ho sentimentu neʼebé bele estraga ita.
HIRUS
BÍBLIA NIA PRINSÍPIU: “Ema neʼebé la hirus lalais mak diʼak liu fali mane ida neʼebé iha forsa boot.”—Provérbios 16:32.
NEʼE KATAK SÁ: Se ita treinu atu kontrola ita-nia hirus, neʼe sei lori benefísiu ba ita. Dala ruma ita bele sai hirus tanba razaun neʼebé loos, maibé se ita la kontrola ita-nia hirus, neʼe lori rezultadu aat barak. Matenek-naʼin sira hatete katak bainhira ema hirus daudaun, baibain sira halo ka hatete buat ruma neʼebé ikusmai sira arrepende.
SAIDA MAK ITA BELE HALO: Aprende atu kontrola Ita-nia hirus antes Ita-nia hirus kontrola Ita. Ema balu hanoin katak, se ita hatudu sai ita-nia hirus, ita mak ema neʼebé forsa. Maibé tuir loloos, ema neʼebé labele kontrola sira-nia hirus mak fraku. Bíblia hatete: “Ema neʼebé labele kontrola ninia hirus mak hanesan sidade neʼebé ninia moru naksobu ona.” (Provérbios 25:28) Dalan ida atu kontrola hirus mak buka-hatene saida mak loloos akontese antes ita atu halo buat ruma. Bíblia dehan: “Ema nia matenek sei ajuda duni nia atu la sai hirus lalais.” (Provérbios 19:11) Atu bele komprende situasaun, ita presiza rona didiʼak. Ida-neʼe bele ajuda ita atu kontrola ita-nia sentimentu.
AGRADESE
BÍBLIA NIA PRINSÍPIU: “Sempre hatudu agradese bá.”—Koloso 3:15.
NEʼE KATAK SÁ: Baibain, ema neʼebé hatudu agradese mak ema neʼebé kontente liu iha sira-nia moris. Ema neʼebé lakon buat folin boot, hanesan família ruma mate mós konkorda ho ida-neʼe. Sira fiar katak buat neʼebé ajuda sira mak atu hatudu agradese ba buat neʼebé sira sei iha, duké hanoin beibeik kona-ba buat neʼebé sira lakon.
SAIDA MAK ITA BELE HALO: Loroloron, halo lista kona-ba saida mak halo Ita sente agradese. Ida-neʼe bele inklui buat boot no buat kiʼik, hanesan loro-matan monu, koʼalia ho ema neʼebé ita hadomi, ka tanba bele moris loron ida tan. Buat sira-neʼe bele halo Ita sai kontente liután, naran katak Ita uza tempu atu hanoin no sente agradese.
Diʼak tebes atu hanoin kona-ba tanbasá mak Ita sente agradese ba Ita-nia família no belun sira. Bainhira Ita hatene ona saida mak Ita hafolin husi sira, fó-hatene ba sira. Ita bele halo nuneʼe oin ba oin, liuhusi karta, e-mail ka mensajen. Ida-neʼe bele hametin Ita-nia relasaun ho ema neʼe, no Ita mós sei sente kontente tanba Ita halo buat diʼak ba ema seluk.—Apóstolu 20:35.
PRINSÍPIU SELUK HUSI BÍBLIA
Ita bele download gravasaun sira kona-ba Bíblia. Gravasaun sira-neʼe bele hetan iha língua 40 iha sítiu jw.org/tdt
HASEES AN HUSI ISTORI MALU.
“Hahú istori malu mak hanesan loke odamatan neʼebé tahan netik bee-lihun boot ida; tan neʼe, diʼak liu husik tiha fatin neʼe antes mosu istori malu.”—PROVÉRBIOS 17:14.
LABELE HANOIN DEMAIS KONA-BA FUTURU.
“Keta hanoin resin kona-ba loron aban, tanba loron aban iha ninia susar rasik. Loron ida-idak iha ninia problema rasik.”—MATEUS 6:34.
HANOIN DIDIʼAK ULUK ANTES HALO BUAT RUMA.
“Kbiit atu hanoin sei tau matan ba ó, no kbiit atu tetu didiʼak sei proteje ó.”—PROVÉRBIOS 2:11.