Hatudu sentimentu hanoin ema
Problema
Se ita hanoin deʼit kona-ba diferensa entre ita ho ema seluk, neʼe bele halo ita hanoin katak diferensa sira-neʼe mak ema neʼe nia fraku ka sala. Neʼe bele book ita atu halo diskriminasaun ba ema seluk, tan deʼit ema neʼe la hanesan ho ita. Se ita haburas hanoin hanesan neʼe ba ema seluk, susar ba ita atu hatudu sentimentu hanoin ema.
Bíblia nia prinsípiu
“Haksolok ho sira neʼebé haksolok; tanis ho sira neʼebé tanis.”—ROMA 12:15.
Neʼe katak sá? Eskritura neʼe hanorin ita atu hanoin ema seluk. Hanoin ema mak abilidade atu tau ita-nia an iha ema seluk nia situasaun no sente buat neʼebé sira sente.
Tanbasá diʼak atu hatudu sentimentu hanoin ema
Bainhira ita hanoin ema seluk, ita sei haree katak iha buat balu neʼebé halo ita hanesan deʼit ho ema neʼe. Ita sei nota katak ema neʼe karik sente ka halo buat neʼebé hanesan ho ita. Hanoin ema ajuda ita atu haree ema hotu mak parte husi família ida deʼit, maski husi situasaun neʼebé la hanesan. Kuandu ita fokus liu ba oinsá mak ita bele sente buat neʼebé ema seluk sente, ita sei iha hanoin pozitivu kona-ba sira.
Hanoin ema sei ajuda ita atu respeitu ema seluk. Anne-Marie, husi Senegál, uluk la gosta grupu ida neʼebé ema barak haree nuʼudar la iha folin. Nia esplika oinsá mak hanoin ema ajuda tebes nia: “Bainhira haʼu haree ba terus neʼebé sira hasoru, haʼu husu ba haʼu-nia an oinsá se haʼu mak iha sira-nia situasaun. Neʼe halo haʼu rekoñese haʼu laʼós diʼak liu fali ema sira-neʼe.” Sin, se ita koko atu komprende ema seluk nia situasaun, ita sei sente liu atu hanoin sira duké kritika sira.
Saida mak Ita bele halo
Se Ita iha hanoin negativu kona-ba ema husi grupu ida, koko atu komprende saida mak halo Ita hanesan deʼit ho sira. Porezemplu, imajina toʼok saida mak sira sente kuandu
Hanoin ema ajuda ita atu haree katak ema hotu mak parte husi família ida deʼit
han hamutuk ho sira-nia família
halo hotu serbisu neʼebé todan
goza tempu hamutuk ho kolega sira
rona múzika neʼebé sira gosta
Tuirmai, koko imajina Ita-nia an iha sira-nia situasaun. Husu Ita-nia an:
‘Saida mak haʼu sei halo se ema ida halo haʼu sente la iha folin?’
‘Saida mak haʼu sente se ema ida julga haʼu antes sira hatene didiʼak kona-ba haʼu?’
‘Se haʼu mak ema ida husi sira-nia grupu, haʼu hakarak ema seluk trata haʼu iha dalan oinsá?’