Oinsá mak teknolojia bele afeta Ita-nia relasaun nuʼudar belun?
Maski ita-nia belun sira hela iha rai neʼebé la hanesan, maibé fasil ba ita atu kontaktu malu liuhusi haruka mensajen, e-mail, vídeo konferénsia, no média sosiál. Ema barak uza teknolojia iha dalan neʼebé diʼak.
Maski nuneʼe, ema balu neʼebé foufoun uza teknolojia atu hametin relasaun nuʼudar belun ikusmai hetan problema hanesan . . .
labele komprende belun nia sentimentu.
sente mesamesak.
hanoin an deʼit duké hanoin ema seluk.
SAIDA MAK ITA PRESIZA HATENE
HANOIN EMA SELUK
Presiza tempu atu bele hanoin no komprende belun nia sentimentu. Dala ruma neʼe susar se ita okupadu liu haree ema barak nia posting no haruka lalais deʼit mensajen hodi la hanoin uluk lai.
Se Ita simu mensajen barak demais, neʼe sei halo susar ba Ita atu resposta Ita-nia belun nia mensajen. Ikusmai Ita-nia hakarak mak atu resposta lalais ema hotu nia mensajen duké ajuda Ita-nia belun neʼebé iha susar laran.
HANOIN TOʼOK: Oinsá mak Ita bele “hanoin malu” kuandu uza teknolojia atu komunika ho belun sira?—1 PEDRO 3:8.
SENTE MAMUK
Peskiza ida hatete katak ema barak sente la kontente depois gasta tiha tempu barak hodi uza média sosiál. Ema neʼebé halo peskiza neʼe hatete katak bainhira ita haree ema seluk nia posting kona-ba foto ka buat neʼebé sira halo, ikusmai ita bele “sente katak ita la halo buat ida neʼebé diʼak”.
No mós, haree foto husi ema seluk nia posting bele halo ita kompara ita-nia moris ho ema seluk nian. Karik ita bele hanoin katak ema hotu goza moris maibé ita rasik lae.
HANOIN TOʼOK: Kuandu uza média sosiál, saida mak Ita bele halo atu la kompara Ita-nia an ho ema seluk?—GALÁSIA 6:4.
HANOIN AN DEʼIT
Mestra ida nota katak ninia estudante balu hakarak buka deʼit kolega sira neʼebé sei apoia no ajuda sira, maibé la interese atu ajuda fali kolega sira-neʼe. Ema hanesan neʼe fokus deʼit ba buat neʼebé sira bele hetan husi ema seluk. Karik sira komesa haree sira-nia belun hanesan deʼit ho telefone ka komputadór neʼebé bele loke ka taka tuir sira-nia hakarak.
HANOIN TOʼOK: Buat neʼebé Ita posting hatudu katak Ita hakarak buka oin ka hakarak fokus deʼit ba Ita-nia an?—GALÁSIA 5:26.
SAIDA MAK ITA BELE HALO
HANOIN DIDIʼAK OINSÁ ITA UZA TEKNOLOJIA
Kuandu uza teknolojia ho didiʼak, neʼe sei ajuda Ita atu nafatin komunika ho Ita-nia belun sira no mós bele halo Ita sai besik liu ho sira.
BÍBLIA NIA PRINSÍPIU: “Domin . . . la buka diʼak ba ninia an rasik.”—1 KORINTO 13:4, 5.
Hili sujestaun neʼebé Ita hakarak implementa, ka hakerek Ita rasik nia ideia.
Koko atu koʼalia ba ema duké haruka deʼit mensajen ka e-mail
Tau dook telefone (ka hamate lian) bainhira koʼalia hela ho ema ruma
Hamenus tempu neʼebé Ita uza ba média sosiál
Sai rona-naʼin neʼebé diʼak liu
Kontaktu belun neʼebé hasoru susar