Tanbasá Ita-nia desizaun mak importante?

Tanbasá importante atu hatene se iha Kriadór ka lae? Se evidénsia halo Ita fiar katak Maromak iha duni, Ita sei hakarak atu buka evidénsia neʼebé hatudu katak Bíblia mak husi Maromak. Se Ita tau fiar ba buat neʼebé Bíblia dehan, Ita sei hetan benefísiu barak hanesan tuirmai neʼe.

Ita sei kontente iha Ita-nia moris

BÍBLIA DEHAN: “[Maromak] fó udan husi lalehan no fó ai-fuan tuir ninia tempu, hodi fó ai-han barak ba imi no halo nakonu imi-nia laran ho ksolok.”—Apóstolu 14:17.

NEʼE KATAK SÁ: Buat hotu iha natureza neʼebé halo Ita kontente mak prezente husi Kriadór. Ita sei hafolin liután prezente sira-neʼe kuandu Ita hatene katak ida neʼebé fó prezente sira-neʼe hanoin Ita.

Hetan matadalan neʼebé ajuda Ita ohin loron

BÍBLIA DEHAN: “Ó sei komprende buat neʼebé loos, justisa no la todan ba sorin, no ó sei komprende kona-ba buat diʼak hotu.”—Provérbios 2:9.

NEʼE KATAK SÁ: Nuʼudar Ita-nia Kriadór, Maromak hatene saida mak Ita presiza atu bele sente kontente. Kuandu Ita aprende Bíblia, Ita bele hetan lisaun barak neʼebé bele ajuda Ita-nia moris.

Hetan resposta ba Ita-nia pergunta sira

BÍBLIA DEHAN: “Ó sei hetan koñesimentu kona-ba Maromak.”—Provérbios 2:5.

NEʼE KATAK SÁ: Se Ita hatene katak Maromak iha, neʼe bele ajuda Ita atu hetan resposta ba Ita-nia pergunta importante sira, hanesan: Tanbasá Ita moris? Tanbasá iha terus barak? Ema mate nia kondisaun mak oinsá? Ita bele hetan resposta sira husi Bíblia.

Iha esperansa ba futuru

BÍBLIA DEHAN: “Jeová dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, no haʼu hakarak fó imi futuru kapás no esperansa.’”—Jeremias 29:11.

NEʼE KATAK SÁ: Maromak promete katak iha futuru nia sei halakon buat aat, terus, no mate. Kuandu Ita tau fiar ba Maromak nia promesa, Ita-nia esperansa ba futuru sei ajuda Ita atu tahan problema sira ho aten-brani.

Oinsá mak ema balu hetan benefisiu tanba fiar ba Kriadór

“Haʼu sempre admira kuandu haʼu haree oinsá Maromak ajuda ita iha dalan oioin. Maromak ajuda ita atu hatene saida mak importante liu iha ita-nia moris, oinsá atu iha relasaun diʼak ho ema seluk no oinsá atu sai Maromak nia belun.”—Cyndi, Estadus Unidus Amérika.

“Haʼu-nia fiar ba Kriadór halo haʼu-nia moris kontente no iha objetivu. Tanba haʼu fiar ba Maromak, neʼe halo haʼu la sai baruk ho haʼu-nia moris. Iha buat barak tebes neʼebé ita bele aprende kona-ba nia, ninia kriasaun no ninia Liafuan.”—Elise, Fransa.

“Aplika buat neʼebé ita-nia Kriadór hanorin mai ita liuhusi Bíblia halo haʼu kontente liután. Neʼe ajuda haʼu hanoin ema seluk, la kritika demais no moris kontente. Neʼe mós ajuda haʼu atu sai aman neʼebé diʼak liután.”—Peter, Olanda.

“Antes haʼu aprende kona-ba Maromak, haʼu-nia moris mak han, toba no bá serbisu tuir oras. Neʼe halo haʼu la goza haʼu-nia moris! Agora haʼu haree katak moris mak hanesan prezente furak ida neʼebé ita bele goza no hafolin.”—Liz, Estónia.

“Haʼu mak ema neʼebé sempre laran-taridu. Maibé kuandu haʼu hatene katak lakleur tan hahalok aat, situasaun la justisa no terus hotu sei lakon, neʼe ajuda haʼu atu tahan.”—Adrien, Fransa.