MUNDU NAKONU HO SUSAR

1 | Proteje Ita-nia saúde

TANBASÁ IMPORTANTE

Krize no dezastre bele fó impaktu aat ba ita-nia saúde iha dalan oioin.

Susar sira halo ita sente estrese, no ema neʼebé estrese ba tempu kleur fasil atu kona moras.
Krize afeta sistema médiku, no halo susar ba ita atu hetan ai-moruk no tratamentu diʼak.
Dezastre afeta ekonomia, no halo susar atu hola hahán neʼebé diʼak ka selu tratamentu médiku.

Buat neʼebé Ita presiza hatene

Moras neʼebé sériu no estrese bele afeta Ita-nia desizaun, no hanetik Ita atu halo buat neʼebé diʼak ba Ita-nia saúde. Rezultadu mak Ita-nia saúde bele sai aat liután.
Se la hetan tratamentu médiku, problema bele sai boot toʼo ameasa Ita-nia moris.
Se Ita iha saúde diʼak, neʼe sei ajuda Ita atu halo desizaun diʼak kuandu hasoru susar.
Ita bele halo buat barak atu tau matan ba Ita-nia saúde. Neʼe la depende ba Ita-nia situasaun ekonomia.

Buat neʼebé Ita bele halo agora

Ema neʼebé matenek hanoin nanis perigu neʼebé bele mosu no halo buat ruma atu prevene perigu sira-neʼe. Neʼe mós bele aplika ba Ita-nia saúde. Ita bele hamenus posibilidade atu kona moras hodi mantein ijiene. Diʼak liu prevene agora kedas duké kona moras.

“Tanba ami hakaʼas an atu ami-nia isin no uma moos nafatin, ami la presiza gasta osan atu bá konsulta no hola ai-moruk.”—Andreas.a

a Naran balu iha livru neʼe laʼós naran neʼebé loos.

OINSÁ ITA BELE TAHAN—Sujestaun

Durante tempu susar, proteje Ita-nia saúde hodi halo buat sira-neʼe

MANTEIN IJIENE

Mantein ijiene

Bíblia dehan: “Ema neʼebé matenek haree perigu no subar nia an.” (Provérbios 22:3) Hanoin nanis no sees husi situasaun neʼebé lori perigu ba Ita-nia saúde.

Fase liman beibeik ho bee no sabaun, liuliu antes kaer hahán, ka depois sentina.
Hamoos beibeik Ita-nia uma, liuliu iha fatin ka sasán neʼebé ema kaer beibeik.
Se bele, keta hakbesik ba ema ho moras neʼebé bele hadaʼet.

HAN HAHÁN SAUDAVEL

Han hahán saudavel

Bíblia dehan: ‘La iha ema ida neʼebé odi ninia isin rasik, maibé nia fó-han no hafolin ninia isin.’ (Éfeso 5:29) Ita hafolin ita-nia isin hodi kuidadu kona-ba buat neʼebé ita han no hemu.

Hemu bee barak.
Han ai-fuan no modo oioin.
Keta han demais mina, bokur, masin no masin-midar.
Keta fuma, uza droga, ka hemu tua demais.

“Tanba lakohi sai moras, ami koko atu han buat neʼebé saudavel; se lae, ami sei gasta deʼit osan ba doutór no ai-moruk. Diʼak liu ami uza ami-nia osan ba hahán neʼebé diʼak.”—Carlos.

HALO EZERSÍSIU NO DESKANSA DIʼAK

Halo ezersísiu

Bíblia dehan: “Diʼak liu deskansa uitoan duké serbisu makaʼas demais, tanba neʼe hanesan duni tuir anin.” (Eclesiastes 4:6) Ita presiza serbisu, maibé ita mós presiza deskansa.

Book an beibeik. Diʼak atu laʼo ain. Book an beibeik bele ajuda ita-nia saúde maski ita mak idade, aleijadu, ka iha moras ruma.
Deskansa diʼak

Deskansa diʼak. Se Ita la deskansa ho diʼak, neʼe bele aumenta ita-nia estrese no halo susar atu fokus, no neineik-neineik bele lori problema saúde neʼebé sériu.
Deside metin tuku hira mak Ita sei toba, no halo tuir ida-neʼe. Koko atu komesa toba no hadeer iha oras neʼebé hanesan loroloron.
Keta haree televizaun ka uza sasán eletróniku iha toba-fatin.
Keta han barak demais, hemu kafé ka tua antes atu toba.

“Kuandu haʼu la deskansa ho diʼak, neʼe fó impaktu boot ba haʼu-nia saúde. Se haʼu la toba diʼak, dala ruma haʼu-nia ulun moras no sente isin moras. Maibé kuandu haʼu toba diʼak, haʼu sente kmaan no iha forsa atu halo buat oioin! Deskansa ajuda haʼu atu la sai moras beibeik.”—Justin.