MUNDU NAKONU HO SUSAR

3 | Proteje Ita-nia relasaun

TANBASÁ IMPORTANTE

Kuandu hanoin demais kona-ba situasaun susar iha mundu, neʼe bele halo susar ba ema atu mantein relasaun diʼak ho ema seluk.

Ema sulan an no la ransu ho kolega sira.
Feen-laʼen la hatudu laran-diʼak ba malu.
Inan-aman la interese ho susar neʼebé oan sira hasoru.

Buat neʼebé Ita presiza hatene

Belun sira mak importante tanba sira bele ajuda Ita atu iha saúde diʼak iha dalan fíziku no emosaun, liuliu iha tempu susar.
Estrese tanba situasaun susar iha mundu bele hamosu problema oioin iha Ita-nia moris família nian.
Bainhira oan sira rona ka haree notísias la diʼak, neʼe bele halo sira sai taʼuk liután.

Buat neʼebé Ita bele halo agora

Bíblia dehan: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

Hanoin kona-ba ema neʼebé prontu atu ajuda no fó konsellu diʼak ba Ita. Kuandu Ita hatene katak ema ruma hanoin Ita, neʼe bele fó Ita forsa atu tahan hasoru susar loroloron.

OINSÁ ITA BELE TAHAN—Sujestaun

Durante tempu susar, proteje Ita-nia relasaun ho família no belun hodi halo buat sira-neʼe

HAMETIN ITA-NIA MORIS KABEN

Hametin Ita-nia moris kaben

Bíblia dehan: “Ema naʼin-rua diʼak liu fali naʼin-ida . . . Tanba se sira ida monu, ida seluk bele ajuda ninia pár atu hamriik.” (Eclesiastes 4:9, 10) Laʼen no feen presiza sai hanesan jogadór neʼebé iha ekipa ida ho hanoin ida deʼit atu bele manán, laʼós jogadór husi ekipa ketaketak neʼebé kontra malu.

Keta hatudu hahalok la diʼak ba Ita-nia kaben atu hasai deʼit Ita-nia estrese. Hatudu pasiénsia ba malu.
Pelumenus semana ida dala ida, koʼalia ho Ita-nia pár kona-ba problema ruma neʼebé Ita hasoru. Fokus ba problema, no keta hatún malu.
Fahe tempu atu halo buat ruma neʼebé imi rua gosta.
Hanoin fali kona-ba tempu diʼak neʼebé uluk imi goza, hanesan haree foto kazamentu ka memória seluk neʼebé diʼak.

“Dala ruma feen-laʼen iha hanoin la hanesan, maski nuneʼe sira bele serbisu hamutuk. Sira bele halo desizaun no hakaʼas an hamutuk atu kumpre desizaun neʼe hodi bele sai susesu.”—David.

MANTEIN ITA-NIA RELASAUN BELUN

Mantein Ita-nia relasaun belun

Duké simu deʼit apoiu husi belun sira, hanoin kona-ba oinsá Ita bele fó apoiu ba sira. Hodi hametin ema seluk, Ita hametin Ita-nia an rasik.
Kontaktu belun naʼin-rua loroloron no buka-hatene sira-nia situasaun.
Husu Ita-nia belun kona-ba oinsá mak sira tahan susar neʼebé atu hanesan ho Ita-nian.

“Kuandu hasoru susar boot, belun sira bele ajuda Ita atu la laʼo sala dalan. Sira hadiʼa Ita-nia hanoin, no fó-hanoin Ita kona-ba matadalan neʼebé Ita hatene ona. Belun sira hanoin Ita, no sira mós hatene Ita hanoin sira.”—Nicole.

APOIA ITA-NIA OAN

Apoia Ita-nia oan

Bíblia dehan: “Lalais atu rona, la ansi atu koʼalia.” (Tiago 1:19) Foufoun, karik Ita-nia oan la prontu atu fó sai sira-nia problema ka sentimentu taʼuk. Maibé se Ita rona ho pasiénsia, neʼe bele ajuda sira atu koʼalia nakloke ba Ita.

Halo sira sente kmaan no prontu atu fó sai sira-nia sentimentu. Oan balu gosta liu atu koʼalia kuandu halo serbisu uma-laran hamutuk, laʼo hamutuk, ka han hamutuk duké kuandu tuur ho inan-aman oin ba oin.
Proteje Ita-nia oan atu la haree demais notísias neʼebé la diʼak.
Fó-hatene Ita-nia oan kona-ba buat neʼebé Ita halo atu família bele seguru.
Halo planu ba tempu emerjénsia, no treinu hamutuk ho oan sira.

“Koʼalia ho Ita-nia oan, no husik sira fó sai sira-nia sentimentu. Karik sira subar hela sentimentu taʼuk, hanoin barak, ka hirus. Fó-hatene sira katak Ita mós luta hasoru sentimentu sira-neʼe, no oinsá mak Ita kontrola ida-neʼe.”—Bethany.