PLANETA MUNDU BELE DURA KA LAE?
BEE
KRIATURA iha mundu neʼe presiza bee atu bele moris. Tuir loloos, bee mak domina kriatura moris hotu nia isin. Lagoa, mota, bee-matan no bee iha rai-okos fornese bee ba ema no animál atu hemu no fó benefísiu ba ai-horis sira.
Saida mak akontese ba bee?
Planeta mundu nakonu ho bee, maibé tuir Organizasaun Meteorolójika Mundiál, “bee neʼebé fresku iha planeta mundu mak uitoan deʼit”. Neʼe toʼo ba kriatura moris hotu iha mundu. Maibé planeta neʼe hasoru problema kona-ba poluisaun bee no bee neʼebé fresku sai menus tanba ema uza demais bee no mudansa ba klima. Sientista sira hatete katak iha tinan 30 tan, ema naʼin-5.000.000.000 sei hasoru susar atu hetan bee neʼebé moos.
Ita-nia planeta—Kria atu rekupera an
Planeta mundu iha kapasidade atu bele prodús bee. Rai, kriatura sira iha bee laran no loro-matan nia naroman mós hola parte atu halo bee sai moos. Haree toʼok evidénsia neʼebé hatudu katak Maromak kria ita-nia planeta ho kapasidade atu rekupera an.
Rai bele tais buat oioin neʼebé hafoʼer bee. Ai-horis balu neʼebé moris iha rai neʼebé bokon iha kapasidade atu hamoos nitrojéniu, fósforu, no mós kímiku sira hanesan pestisida.
Sientista sira deskobre ona oinsá bee bele moos nafatin iha natureza. Foʼer orgániku sei kahur ho bee neʼebé suli no tuirmai baktéria sira mak sei halo bee sai moos fali.
Sipu sira neʼebé moris iha mota ka lagoa iha kapasidade atu hamoos lalais kímiku neʼebé lori perigu, karik iha dalan neʼebé diʼak liu fali sistema neʼebé ema kria atu hamoos bee.
Ita-nia planeta kontrola bee liuhusi siklu bee nian neʼebé hanaran sistema idrolojia. Siklu neʼe hamutuk ho prosesu natureza seluk kontrola bee atu labele sai menus ka lakon husi ita-nia planeta.
Saida mak ema halo daudaun
Hodi la husik oli turuk no la soe buat kímiku arbiru, ita sei ajuda mantein bee neʼebé moos
Matenek-naʼin sira hatete katak ita presiza kuidadu atu la estraga bee. Hodi bele hamenus kontaminasaun iha bee, keta husik oli turuk husi ita-nia transporte no labele soe ai-moruk no kímiku sira iha sentina ka bee dalan.
Enjeñeiru sira dezenvolve métodu neʼebé bele haketak masin husi tasi-been ho objetivu atu prodús bee neʼebé bele hemu.
Maibé neʼe deʼit seidauk toʼo. Atu haketak masin husi tasi-been mak solusaun neʼebé susar atu implementa tanba presiza gasta osan boot no enerjia barak. Kona-ba oinsá atu fornese bee neʼebé moos, relatóriu ida iha tinan 2021 fó sai komentáriu husi Nasoins Unidas, dehan: “Presiza dezenvolve lalais métodu neʼebé diʼak liu atu prodús bee neʼebé moos ba ema hotu iha mundu tomak.”
Esperansa husi Bíblia
“Maromak . . . dada bee turuk ida-idak saʼe ba leten, sira sai fali abuabu no udan, tan neʼe kalohan sira fakar tun bee, no bee neʼe tun ba ema hotu.”—Job 36:26-28.
Maromak kria siklu naturál atu bele proteje bee iha mundu.—Eclesiastes 1:7.
Hanoin toʼok: Maromak kria ona prosesu oioin atu prodús bee neʼebé moos. Neʼe katak nia mós iha kbiit no hakarak atu hadiʼa problema neʼebé mosu tanba ema nia hahalok, loos ka lae? Haree informasaun “Maromak promete katak planeta mundu sei dura” iha pájina 15.