Ema harii uma aas tebes

TINAN barak liu tiha. Noé nia oan sira iha oan barak. Oan sira-neʼe sai boot no iha oan barak liután. Lakleur, iha ema barak iha mundu.

Noé nia bei-oan ida iha naran Nimrod. Nia ema aat neʼebé kasa no oho animál no ema. Nimrod mós halo nia an sai liurai atu ukun ema seluk. Maromak la gosta Nimrod.

Iha tempu neʼebá, ema hotu koʼalia língua ida deʼit. Nimrod hakarak ema hotu hela hamutuk iha fatin ida atu nia bele ukun sira. Tan neʼe, saida mak nia halo? Nia haruka ema halo sidade ida ho uma aas tebes. Haree sira halo bloku husi rai iha dezeñu.

Maromak Jeová la kontente ho ida-neʼe. Maromak hakarak ema bá moris iha fatin ketaketak iha mundu tomak. Maibé, ema hateten: ‘Mai ona! Mai ita halo sidade ida ho uma aas tebes neʼebé toʼo lalehan. Hanesan neʼe ita sei hetan naran-boot!’ Ema hakarak hahiʼi sira-nia an, laʼós Maromak.

Nuneʼe, Maromak hapara ema harii uma aas neʼe. Hatene oinsá mak nia halo ida-neʼe? Derrepente deʼit, nia halo ema hotu koʼalia língua la hanesan, laʼós língua ida deʼit. Ema neʼebé harii uma neʼe la bele tan komprende malu. Tan neʼe, sidade neʼe hetan naran Babel, ka Babilónia, katak “Konfuzaun”.

Ema barak komesa atu sai husi Babel. Ema lubun neʼebé koʼalia língua hanesan bá moris hamutuk iha fatin ketaketak iha mundu.