José nia maun sira odi nia

HAREE toʼok labarik neʼe sente triste no laran-tun. Nia mak José. Nia maun sira foin faʼan nia ba mane sira-neʼe neʼebé laʼo-rai ba Ejitu. Iha neʼebá, José sei sai atan ida. Tanbasá nia maun sira halo hahalok aat neʼe? Tanba sira sente laran-moras ba José.

Sira-nia aman Jacob gosta José tebetebes. Nia hatudu katak nia gosta liu José hodi fó nia faru naruk neʼebé furak. Kuandu nia maun naʼin-10 haree katak Jacob hadomi liu José, sira sai laran-moras no odi nia. Maibé, iha tan buat ida seluk neʼebé halo sira odi nia.

José hetan mehi rua. Iha mehi rua neʼe José nia maun sira hakruʼuk ba nia. Kuandu nia konta ba sira mehi neʼe, sira odi nia liután.

Loron ida, José nia maun sira hein bibi, no Jacob haruka José atu bá haree sira oinsá. Kuandu maun sira haree José laʼo mai, balu hatete: ‘Mai ita oho nia!’ Maibé Ruben, nia maun boot, hatete: ‘Lae, keta halo nuneʼe!’ Entaun, sira kaer José no soe tun nia iha posu maran nia laran. Tuirmai, sira tuur hodi buka-hatene saida mak atu halo ba nia.

Iha tempu neʼebá, ema Ismael sira mai. Judá hatete ba nia maun sira: ‘Mai ita faʼan tiha nia ba ema Ismael sira-neʼe.’ No sira halo nuneʼe duni. Sira faʼan José ho folin osan-mutin 20. Aiá! Ida-neʼe aat tebes!

Saida mak maun sira sei hatete ba aman? Sira oho bibi ida, no hatama José nia faru furak neʼe iha bibi nia raan. Tuirmai, sira lori fila fali faru neʼe ba aman no hatete: ‘Ami hetan ida-neʼe. Haree, José nian karik.’

Jacob haree katak José nian duni. Nia tanis: ‘Karik animál fuik oho José.’ Maun sira hakarak duni katak aman hanoin hanesan neʼe. Jacob triste tebetebes. Nia tanis loron barak. Maibé, José la mate. Mai ita haree saida mak akontese tuirmai.