Jefté nia promesa

Ó HALO promesa tiha ona neʼebé susar atu halo tuir ka lae? Mane iha dezeñu neʼe halo nuneʼe, no tan neʼe nia triste tebes. Nia juis brani ida naran Jefté husi Izraél.

Jefté moris iha tempu neʼebé ema Izraél la adora tan Jeová. Dala ida tan, sira halo aat. Tan neʼe, Jeová husik ema Amon haterus sira. Nuneʼe, ema Izraél harohan ba Jeová: ‘Ami halo sala hasoru Ita. Favór ida, salva ami!’

Povu husu deskulpa ba sala neʼebé sira halo ona. Sira hatudu katak sira arrepende an hodi adora Jeová fali. Tan neʼe, Jeová ajuda sira fali.

Povu hili Jefté atu funu hasoru ema Amon neʼebé aat. Jefté hakarak tebes katak Jeová atu ajuda nia iha funu. Tan neʼe, nia promete ba Jeová: ‘Se Ita halo haʼu manán ema Amon, haʼu sei fó ba Ita ema primeiru neʼebé sai husi haʼu-nia uma atu hasoru haʼu kuandu haʼu fila.’

Jeová rona Jefté nia promesa, no ajuda Jefté manán. Kuandu Jefté fila fali ba uma, hatene sé mak ema primeiru neʼebé sai husi uma atu hasoru nia? Jefté nia oan-feto mesak ida. Jefté tanis: ‘Oh, haʼu-nia oan! Ó halo haʼu triste tebes! Maibé, haʼu halo promesa tiha ona ba Jeová, no haʼu tenke halo tuir.’

Kuandu Jefté nia oan foin hatene kona-ba promesa neʼe, nia mós triste, tanba tenke husik aman no kolega sira. Maibé nia sei serbí Jeová, ho moris tomak, iha Jeová nia tabernákulu iha Silo. Nuneʼe, nia hatete ba ninia aman: ‘Se aman halo promesa ba Jeová, tenke halo tuir.’

Tan neʼe, Jefté nia oan-feto hela iha Silo, ho nia moris tomak, atu serbí Jeová iha tabernákulu. Tinan-tinan, feto sira husi Izraél vizita nia loron haat, no sira halimar hamutuk iha Silo. Povu hadomi Jefté nia oan-feto tanba nia mak Jeová nia atan neʼebé diʼak.