Jeosafá konfia ba Jeová

HATENE sé mak mane sira iha neʼe no saida mak sira halo daudauk? Sira sai atu bá funu, no mane sira iha oin mak kanta. Maibé ó husu karik: ‘Tansá mak kantór sira-neʼe la iha surik no diman atu halo funu?’ Mai ita haree hamutuk.

Jeosafá mak liurai ba reinu Izraél suku rua. Nia moris iha tempu neʼebé hanesan ho Liurai Acab no Jezabel husi reinu suku sanulu iha norte. Maibé Jeosafá mak liurai neʼebé diʼak, no ninia aman Asa mós liurai neʼebé diʼak. Tan neʼe povu iha reinu suku rua iha súl moris diʼak tinan ba tinan.

Maibé, agora, buat ida mosu no halo ema taʼuk. Ema sira lori mensajen ba Jeosafá: ‘Tropa boot husi rai Moab, Amon, no Foho Seir mai daudauk atu ataka Ita.’ Povu Izraél sira halibur an iha Jeruzalein atu buka Jeová nia ajuda. Sira bá templu, no iha neʼebá Jeosafá harohan: ‘Oh Jeová ami-nia Maromak, ami la hatene atu halo saida. Ami la iha forsa atu hasoru tropa boot ida-neʼe. Ami buka ba Ita-nia ajuda.’

Jeová rona, no haruka ninia atan ida atu hatete ba povu: ‘Funu neʼe laʼós imi-nian, maibé Maromak nian. Imi sei la presiza funu. Haree deʼit, no haree oinsá mak Jeová sei salva imi.’

Dadeer-saan tuirmai, Jeosafá hatete ba povu: ‘Konfia ba Jeová!’ Tuirmai, nia tau kantór sira iha soldadu sira-nia oin, no kuandu sira marxa, sira kanta hodi hahiʼi Jeová. Hatene ka lae, saida mak akontese bainhira sira hakbesik ba funu fatin? Jeová halo inimigu nia soldadu sira mak funu fali hasoru malu. Kuandu ema Izraél sira toʼo neʼebá, soldadu hotu mate tiha ona!

Jeosafá matenek hodi konfia ba Jeová, loos ka lae? Ita mós sei sai matenek se ita konfia ba Jeová.