Maromak ajuda Liurai Ezequias

HATENE tansá mak ema neʼe halo orasaun ba Jeová? Tansá mak nia tau surat sira-neʼe iha Jeová nia altár nia oin? Ema neʼe naran Ezequias. Nia mak liurai ba Izraél nia suku rua iha súl, no agora nia iha problema boot. Tanbasá?

Tanba tropa Asíria sobu tiha ona suku 10 iha norte. Jeová husik ida-neʼe akontese tanba ema sira-neʼebá aat tebes. No agora, tropa Asíria mai atu funu hasoru reinu suku rua.

Liurai Asíria foin haruka surat ba Liurai Ezequias. Surat neʼe mak Ezequias tau iha neʼe iha Maromak nia oin. Surat neʼe goza Jeová, no haruka Ezequias atu rende an. Tan neʼe, Ezequias halo orasaun: ‘Oh Jeová, salva ami husi liurai Asíria. Hanesan neʼe mak nasaun hotu sei hatene katak Ita-Boot mesak deʼit mak Maromak.’ Jeová rona ba Ezequias ka lae?

Ezequias mak liurai ida neʼebé diʼak. Nia lahanesan ho liurai aat sira iha reinu Izraél suku 10, no mós lahanesan ho ninia aman Acaz, liurai neʼebé aat. Ezequias halo tuir Jeová nia ukun-fuan ho laran. Tan neʼe, kuandu nia ramata orasaun, profeta Isaías haruka mensajen husi Jeová hanesan neʼe: ‘Liurai Asíria sei la tama Jeruzalein. Ninia soldadu ida mós la hakbesik mai. Sira mós sei la tiru rama-oan ida ba sidade neʼe.’

Haree ba dezeñu iha pájina neʼe. Ó hatene ka lae, sé mak soldadu sira neʼebé mate hotu iha neʼe? Sira mak ema Asíria. Jeová haruka ninia anju ida, no iha kalan ida nia laran, anju neʼe oho soldadu Asíria naʼin-185.000. Liurai Asíria sai taʼuk no fila fali ba ninia rai.

Reinu suku rua hetan salvasaun, no sira moris iha dame nia laran ba tempu balu. Maibé, kuandu Ezequias mate, ninia oan-mane naran Manassés mak sai liurai. Manassés no ninia oan-mane naran Amon neʼebé sai liurai tuir nia, sira hotu aat tebes. Tan neʼe, sira-nia rai neʼe sai nakonu fali ho krime no violénsia. Kuandu Liurai Amon mate tanba ninia atan rasik mak oho nia, ninia oan-mane naran Josias mak sai liurai ba reinu suku rua.