Jesus moris iha balada-luhan

HATENE sé mak bebé kiʼikoan ida-neʼe? Loos, Jesus. Nia foin moris iha balada-luhan. Maria hatoba daudauk Jesus iha balada nia han-fatin. Maibé, tansá mak Maria no José iha neʼe, hamutuk ho balada? Neʼe laʼós fatin ba bebé atu moris, loos ka lae?

Loos. Maibé sira iha neʼe tanba Roma nia ukun-naʼin, Sezar Augusto halo lei ida katak ema hotu tenke fila ba sidade neʼebé sira moris atu tau naran. José nia moris fatin mak iha neʼe, iha Belein. Maibé, kuandu nia no Maria toʼo tiha iha Belein, la iha fatin ida ba sira atu hela. Tan neʼe, sira tenke mai iha neʼe no hela ho balada sira. No loron neʼe kedas, Maria hahoris Jesus! Maibé, hanesan ita haree, nia diʼak hela.

Ó haree bibi-atan sira neʼebé mai daudauk atu haree Jesus? Iha kalan neʼe, sira iha rai-luan hein bibi, no naroman nabilan iha sira-nia leet. Neʼe mak anju ida! Bibi-atan sira taʼuk tebes. Maibé anju hatete: ‘Keta taʼuk! Haʼu iha lia-foun diʼak ba imi. Ohin iha Belein, Kristu, Naʼi foin moris. Nia sei salva ema! Imi sei hetan bebé neʼe falun ho neras toba iha balada nia han-fatin.’ Derrepente, anju barak mai no hahiʼi Maromak. Nuneʼe, bibi-atan sira bá kedas atu buka Jesus, no agora sira hetan ona nia.

Hatene tanbasá mak Jesus ema espesiál ida? Hatene nia sé loos? Hanoin-hetan, iha istória primeiru iha livru neʼe, ita aprende kona-ba Maromak nia Oan-Mane primeiru. Oan neʼe serbisu hamutuk Jeová atu halo lalehan no Rai no buat hotu-hotu. Entaun, nia mak Jesus!

Loos, Jeová muda ninia Oan nia moris husi lalehan no tau iha Maria nia knotak. Tempu neʼe kedas, bebé neʼe komesa atu moris iha ninia knotak hanesan bebé seluseluk moris iha sira-nia inan nia knotak. Maibé bebé ida-neʼe mak Maromak nia Oan. Ikusmai, Jesus moris iha balada-luhan iha Belein. Hatene ona tanbasá anju sira kontente tebes hodi bele fó-hatene ba ema katak Jesus moris ona?