João fó batizmu ba Jesus

HAREE toʼok manu-pombu neʼebé tun ba mane neʼe. Mane neʼe mak Jesus. Agora nia maizumenus tinan 30. No mane neʼebé hamutuk Jesus mak João. Ita aprende tiha ona buat ruma kona-ba nia. Hanoin-hetan ka lae, kuandu Maria vizita ninia maluk Elisabete (ka Isabel), bebé neʼebé iha Elisabete nia knotak haksoit tanba haksolok? Bebé neʼebé ladauk moris neʼe mak João. Maibé saida mak João no Jesus halo daudauk iha neʼe?

João foin hatama Jesus iha bee laran iha Mota Jordaun. Entaun, hanesan neʼe mak ema hetan batizmu. Primeiru, hatama tiha nia iha bee laran, no depois, hasai fali. João halo ida-neʼe ba ema, tan neʼe mak ema bolu nia João Batista. Maibé tanbasá mak João fó batizmu ba Jesus?

Entaun, João halo nuneʼe tanba Jesus mak mai no husu João atu fó batizmu ba nia. João fó batizmu ba ema neʼebé hakarak hatudu katak sira hakribi hahalok aat neʼebé uluk sira halo. Maibé Jesus iha hahalok ruma neʼebé presiza atu hakribi ka lae? Lae, Jesus nunka halo aat, tanba nia Maromak rasik nia Oan husi lalehan. Tan neʼe, nia husu João atu fó batizmu tanba iha razaun seluk. Mai ita haree saida mak neʼe.

Molok Jesus mai iha neʼe hasoru João, nia nuʼudar karpinteiru ida. Karpinteiru mak ema neʼebé halo sasán husi ai, hanesan meza, kadeira, no banku. Maria nia laʼen, José nuʼudar karpinteiru, hanorin Jesus atu sai hanesan nia. Maibé Jeová la haruka ninia Oan-Mane toʼo Rai atu serbisu nuʼudar karpinteiru. Jeová iha knaar espesiál ida ba Jesus, no tempu toʼo ona atu hahú halaʼo knaar neʼe. Tan neʼe mak atu hatudu katak nia mai agora atu halo ninia Aman nia hakarak, Jesus husu João atu fó batizmu ba nia. Maromak sente kontente ho ida-neʼe ka lae?

Sin, nia kontente tebes, tanba kuandu Jesus sai tiha husi bee, lian ida husi lalehan hatete: ‘Ida-neʼe mak haʼu-nia Oan, neʼebé fó ksolok mai haʼu.’ No mós, lalehan nakloke no manu-pombu neʼe tun ba Jesus. Maibé ida-neʼe laʼós manu-pombu loloos. Haree hanesan manu-pombu deʼit. Tuir loloos, ida-neʼe Maromak nia espíritu santu.

Agora, Jesus iha buat barak atu hanoin, nuneʼe, nia bá rai-fuik maran hodi bele hela mesamesak durante loron 40. Iha neʼebá, Satanás mai hasoru nia. Dala tolu, Satanás intenta Jesus atu halo buat neʼebé la tuir Maromak nia ukun-fuan. Maibé Jesus la halo tuir Satanás.

Depois neʼe, Jesus fila fali no hasoru ema balu neʼebé ikusmai sai ninia eskolante ka dixípulu primeiru. Balu nia naran mak André, Pedro (ema bolu mós Simão), Filipe no Natanael (ema bolu mós Bartolomeu). Jesus hamutuk eskolante foun sira bá distritu Galiléia. Iha Galiléia, sira toʼo iha Natanael nia rai iha Kaná. Iha neʼebá, Jesus tuir festa kazamentu neʼebé boot, no nia halo milagre primeiru. Hatene saida mak neʼe? Nia halo bee sai fali tua-uvas.