Iha sala andár-leten

LORON rua liu tiha, agora loron-kinta kalan. Jesus no apóstolu naʼin-12 tama iha sala andár-leten neʼe atu han Páskua. Mane neʼebé sai daudauk husi sala neʼe mak Judas Iscariotes. Nia bá atu hatete ba amlulik sira kona-ba oinsá sira bele kaer Jesus.

Loron ida antes neʼe, Judas hasoru tiha ona sira no husu: ‘Se haʼu ajuda imi atu kaer Jesus, imi sei fó saida mai haʼu?’ Sira hatete: ‘Osan-mutin tolunulu.’ Nuneʼe, agora Judas bá atu hasoru sira no lori sira ba Jesus. Aat tebes, loos ka lae?

Han Páskua hotu tiha ona. Maibé, agora Jesus hahú han-kalan espesiál ida seluk. Nia fahe paun ba apóstolu sira no hatete: ‘Han bá, tanba ida-neʼe katak haʼu-nia isin neʼebé haʼu fó tan imi.’ Depois neʼe, nia fó tua-uvas kopu ida ba sira no hatete: ‘Hemu bá, tanba ida-neʼe katak haʼu-nia raan, neʼebé sei nakfakar tan imi.’ Bíblia bolu ida-neʼe ‘Han-Kalan Naʼi nian.’

Ema Izraél sira han Páskua atu hanoin-hetan tempu, kuandu Maromak nia anju ‘pasa’ ka ‘liu’ sira-nia uma iha Ejitu, maibé oho oan-mane primeiru iha ema Ejitu sira-nia uma. Maibé, agora Jesus hakarak ninia dixípulu sira atu hanoin fali nia no oinsá nia fó ninia moris ba sira. No tan neʼe mak nia haruka sira atu selebra han espesiál ida-neʼe tinan-tinan.

Han-Kalan Naʼi nian hotu tiha, Jesus hatete ba ninia apóstolu sira atu sai brani no fiar-metin. Ikusmai, sira kanta knanuk ba Maromak no sai husi fatin neʼe. Agora, kalan-boot liu ona. Mai ita haree sira bá neʼebé.