Buat aat hotu nia rohan

SAIDA mak ó haree iha neʼe? Loos, tropa sira saʼe kuda mutin. Maibé, haree lai sira mai husi neʼebé? Kuda sira halai tun husi lalehan iha kalohan leten. Kuda sira-neʼe iha duni iha lalehan ka lae?

Lae, sira-neʼe laʼós kuda neʼebé loos. Ita hatene ida-neʼe tanba kuda la bele halai iha kalohan leten, loos ka lae? Maibé Bíblia koʼalia duni kona-ba kuda iha lalehan. Tanbasá?

Tanba tempu uluk, ema uza kuda atu halo funu. Tan neʼe Bíblia temi kona-ba sira neʼebé saʼe kuda tun husi lalehan atu hatudu katak Maromak halo funu hasoru ema iha Rai. Hatene fatin atu halo funu neʼe naran saida? Armajedón. Funu neʼe atu halakon buat aat hotu neʼebé iha mundu.

Jesus mak nuʼudar ulun sei funu iha Armajedón. Hanoin-hetan, Jeová hili Jesus atu sai liurai iha Ninia governu. Tan neʼe mak Jesus tau koroa liurai nian iha ninia ulun. No mós, surik neʼe hatudu katak nia sei oho Maromak nia inimigu hotu. Ita presiza hakfodak ka lae, hodi hatene katak Maromak sei halakon ema aat hotu?

Haree fali Istória 10. Ó haree saida iha neʼebá? Sin, Rai-Nabeen boot neʼebé halo lakon ema aat sira. Sé mak halo Rai-Nabeen? Maromak Jeová. Agora, haree ba Istória 15. Saida mak akontese iha neʼebá? Jeová haruka ahi atu halakon Sodoma no Gomorra.

Loke fali Istória 33. Haree ba saida mak akontese ba ema Ejitu sira nia kuda no karreta funu. Sé mak halo bee atu taka netik sira toʼo mout? Jeová. Nia halo ida-neʼe atu proteje ninia povu. Haree ba Istória 76. Ó sei haree katak Jeová mós husik ema atu halakon ninia povu Izraél tanba Izraél nia hahalok aat.

Entaun, ita lalika hakfodak kuandu Jeová haruka ninia tropa iha lalehan atu halakon buat aat hotu iha Rai. Maibé hanoin toʼok, neʼe katak sá! Loke pájina tuirmai no ita haree hamutuk. Dezeñu iha pájina tomak