Oinsá mak ita bele moris ba nafatin

HATENE saida mak labarik-feto neʼe lee daudauk hamutuk ho ninia kolega sira? Loos, livru neʼebé ita mós lee daudauk — Livru Istória husi Bíblia. No sira lee istória neʼebé ó mós lee daudauk — “Oinsá Mak Ita Bele Moris Ba Nafatin.”

Ó hatene saida mak sira aprende? Primeiru, sira aprende katak ita presiza atu koñese kona-ba Jeová no ninia Oan-Mane Jesus se ita hakarak atu moris ba nafatin. Bíblia hatete: ‘Neʼe mak dalan atu moris ba nafatin. Aprende kona-ba Maromak loos mesak ida deʼit no Oan-Mane neʼebé nia haruka mai mundu, Jesus Kristu.’

Oinsá mak ita bele aprende kona-ba Maromak Jeová no ninia Oan-Mane Jesus? Dalan ida mak hodi lee Livru Istória husi Bíblia hahú husi oin toʼo hotu. Livru neʼe koʼalia barak kona-ba Jeová no Jesus, loos ka lae? No mós, koʼalia barak kona-ba saida mak sira halo tiha ona no saida mak sira sei halo. Maski diʼak atu lee livru ida-neʼe, ita presiza mós halo buat seluk tan.

Ó haree livru seluk iha dezeñu neʼe ka lae? Neʼe mak Bíblia. Husu ema ruma atu lee ba ó eskritura balu husi Bíblia neʼebé hili tiha ona ba istória iha livru neʼe. Bíblia fó mai ita informasaun barak neʼebé ita presiza atu serbí Jeová iha dalan neʼebé loos no hetan moris rohan-laek. Tan neʼe, ita presiza estuda Bíblia beibeik no halo ida-neʼe sai ita-nia toman.

Maibé, aprende deʼit kona-ba Maromak Jeová no Jesus Kristu, neʼe latoʼo. Maski ita iha koñesimentu barak kona-ba Jeová no Jesus Kristu no buat neʼebé sira hanorin, maibé karik la hetan moris rohan-laek. Ó hatene ita presiza halo saida tan?

Ita presiza mós moris tuir saida mak ita aprende. Hanoin-hetan Judas Iscariotes ka lae? Nia apóstolu ida husi naʼin-12 neʼebé Jesus hili. Judas iha tiha ona koñesimentu barak kona-ba Jeová no Jesus. Maibé saida mak akontese ba nia? Ikusmai, nia hahú hanoin kona-ba ninia an deʼit, saran Jesus ba inimigu sira ho osan-mutin 30. Tan neʼe Judas sei la hetan moris rohan-laek.

Ó hanoin-hetan Geazi, ema neʼebé ita aprende tiha ona iha Istória 69? Nia hakarak roupa no osan neʼebé laʼós ninian. Nuneʼe, nia koʼalia bosok atu hetan buat hirak-neʼe. Maibé, Jeová fó kastigu ba nia. Jeová mós sei fó kastigu mai ita se ita la tuir ninia ukun-fuan.

Maibé, iha mós ema diʼak barak neʼebé sempre serbí Jeová ho laran-metin. Ita hakarak sai hanesan sira, loos ka lae? Labarik kiʼik naran Samuel mak ezemplu neʼebé diʼak atu ita tuir. Hanoin-hetan, hanesan ita haree iha Istória 55, nia iha tinan haat ka lima deʼit bainhira nia hahú serbí Jeová iha tabernákulu. Tan neʼe, maski ó sei kiʼik, ó mós bele serbí Jeová.

Loos duni, ema ida neʼebé ita hotu hakarak banati-tuir mak Jesus Kristu. Maski nia sei labarik, hanesan ita haree iha Istória 87, nia koʼalia iha templu ho ema seluk kona-ba ninia Aman iha lalehan. Mai ita halo tuir ninia ezemplu. Mai koʼalia ba ema barak kona-ba ita-nia Maromak Jeová neʼebé diʼak tebes no kona-ba ninia Oan-Mane, Jesus Kristu. Se ita halo buat hirak-neʼe, ita sei bele moris ba nafatin iha Maromak nia paraízu iha Rai.