Testemuña ba Jeová fiar saida?

“Ami hakarak rona o hatoʼo o nia hanoin, basa ami hatene katak iha fatin hotu ema hateten aat kona ba religiaun foun neʼe.” (Apostolu[Kisah] 28:​22) Ulun-naʼin sira husi Roma neʼe hatudu ezemplu diʼak ida iha sékulu primeiru. Sira hakarak rona husi nia hun, laʼós deʼit husi ema neʼebé kritika.

Nuneʼe mós ohin loron, dala barak ema koʼalia kontra Testemuña ba Jeová, no sala atu fiar katak ita bele hetan lia-loos kona-ba sira husi ema neʼebé koʼalia tuir sira-nia hanoin deʼit. Tan neʼe ami kontente atu esplika ba Ita ami-nia fiar prinsipál balu.

Bíblia, Jesus Kristu, no Maromak

Ami fiar katak “Maromak leno Eskritura hotu; nia diak atu hanorin”. (2 Timoteo 3:16) Maski ema balu dehan katak ami laʼós kristaun, ida-neʼe laloos. Ami apoia ho laran tomak apóstolu Pedro nia sasin kona-ba Jesus Kristu: “La iha naran seluk iha lalehan nia okos atu fo ba ema atu hodi nia, ita hetan maksoin.”—Apostolu[Kisah] 4:12.

Maibé, tanba Jesus hateten katak nia mak “Maromak nia Oan” no katak “Aman nebe moris haruka Haʼu mai”, Testemuña ba Jeová fiar katak Maromak mak boot liu Jesus. (Joao 10:36; 6:57) Jesus rasik rekoñese ida-neʼe hodi dehan: “Aman boot liu Haʼu.” (Joao 14:28; 8:28) Tan neʼe ami la fiar katak Jesus hanesan ho Aman, nuʼudar doutrinaTrindade hateten. Maibé, ami fiar katak Maromak kria Jesus no katak nia pozisaun iha Maromak nia kraik.—Koloso 1:15; 1 Korinto 11:3.

Iha língua Tetun, Maromak nia naran maka Jeová. Bíblia hateten: “Ó, neʼebé naran Jeová, Ó mesak deʼit mak Aas Liu Hotu iha Rai tomak.” (Salmo[Mazmur] 83:​18) Hodi tuir liafuan sira-neʼe, Jesus koʼalia liu-liu kona-ba Maromak nia naran, no mós hanorin ema neʼebé tuir nia atu harohan: “Ami Aman iha lalehan, halo Ita naran sai santo.” No nia rasik harohan ba Maromak: “Haʼu haklaken tiha Ita naran ba ema sira nebe Ita haraik mai Haʼu.”—Mateus 6:9; Joao 17:6.

Testemuña ba Jeová fiar katak sira tenke halo hanesan Jesus hodi fó sai ba ema seluk Maromak nia naran no buat Maromak hakarak halo. Nuneʼe ami hili naran Testemuña ba Jeová tanba ami halo tuir Jesus, “sasin nebe laran metin”. (Apokalipse[Wahyu] 1:5; 3:14) Isaías 43:10 dehan ba povu neʼebé reprezenta Maromak: “‘Imi maka haʼu-nia testemuña’, neʼe maka Jeová dehan-sai, ‘haʼu-nia atan neʼebé haʼu maka hili duni’. ”

Maromak nia Reinu

Jesus hanorin ema neʼebé tuir nia atu harohan: “Halo Ita nia reinu toʼo mai ami”, no Reinu neʼe mak buat importante liu iha ninia hanorin. (Mateus 6:10; Lucas 4:43) Testemuña ba Jeová fiar katak Reinu neʼe maka governu loos ida iha lalehan, katak Reinu neʼe sei ukun Rai, no katak Jesus Kristu maka Reinu neʼe nia Liurai neʼebé ita la haree, neʼebé Maromak hili tiha ona. “Sinál governu nian iha nia kabaas leten”, katak Bíblia. “Ninia kbiit boot, no dame kmanek sei la iha rohan.”—Isaías 9:​5, 6, Lembaga Alkitab Indonesia.

Maibé, laʼós Jesus Kristu deʼit mak sei sai liurai iha Maromak nia governu. Iha mós ema seluk neʼebé sei ukun hamutuk ho nia iha lalehan. “Ita metin ba Nia”, apóstolu Paulo hakerek, “ita sei ukun hamutuk ho Nia”. (2 Timoteo 2:12) Bíblia hatudu katak ema neʼebé sei moris-hiʼas atu ukun hamutuk ho Kristu iha lalehan mak ba deʼit naʼin “rihun atus ida haat nulu resin haat nebe hetan ona maksoin housi raiklaran”.—Apokalipse[Wahyu] 14:​1, 3.

Hanesan ita hatene, governu ida tenkesér iha povu, no Testemuña ba Jeová fiar katak hanesan ho ukun-naʼin sira iha lalehan, sei iha mós ema rihun ba rihun seluk tan sei simu moris rohan-laek. Ikusmai, Rai neʼebé sei sai paraízu furak ida, sei nakonu ho povu neʼebé merese Maromak nia Reinu. Povu sei hakruʼuk an ba Kristu no sira neʼebé ukun hamutuk nia. Nuneʼe Testemuña ba Jeová fiar duni katak Rai sei nunka naksobu no Bíblia nia promesa sei sai loos: “Ema loos rasik sei hetan Rai, no sira sei hela neʼebá ba nafatin.”—Salmo[Mazmur] 37:29; 104:5.

Maibé oinsá mak Maromak nia Reinu sei mai? Laʼós hodi povu hotu hakruʼuk an ho laran ba Maromak nia governu. Bíblia loloos hatudu katak bainhira Maromak nia Reinu mai, Maromak tenke envolve nia an iha buat neʼebé mosu iha Rai: “Maromak lalehan nian sei harii reinu ida neʼebé sei nunka lakon. No reinu neʼe rasik . . . sei harahun no ramata reinu ne’e hotu, no sei hamriik ba tempu sura la bele.”—Daniel 2:44.

Bainhira mak Maromak nia Reinu sei mai? Tuir Bíblia nia profesia neʼebé akontese daudaun, Testemuña ba Jeová fiar katak sei mai lakleur duni. Ami konvida imi atu estuda profesia balu neʼebé fó-hatene nanis aspetu kona-ba “loron ikus sira” husi sistema aat neʼe. Profesia sira-neʼe hakerek ona iha Mateus 24:​3-14; Lucas 21:​7-13, 25-31; no 2 Timoteo 3:​1-5.

Tanba ami ‘hadomi Naʼi [Jeová] ami-nia Maromak ho ami-nia fuan tomak, ho ami-nia neon tomak no ho ami-nia kbiit tomak, no ami-nia maluk sira nuʼudar ami-nia an rasik’, ami la haketak malu tuir ema nia nasaun, rasa, no pozisaun iha komunidade. (Marcos 12:30, 31) Ema barak hatene katak ami hatudu domin iha ami-nia leet ba irmaun kristaun husi nasaun hotu. (Joao 13:35; 1 Joao 3:10-12) Nuneʼe ami mantein pozisaun neutrál ba buat polítiku iha nasaun sira-neʼe. Ami buka atu halo tuir Jesus nia dixípulu uluk nian, neʼebé kona-ba sira Jesus hateten: “Sira laʼos mundu neʼe nian, nudar Haʼu mos laʼos mundu neʼe nian.” (Joao 17:16) Ami fiar katak haketak an husi mundu mak hasees an husi hahalok imorál neʼebé mosu beibeik agora, hanesan bosok, naʼok, sala-foʼer, adultériu, omoseksualidade, uza sala raan, adora buat neʼebé laʼós Maromak, no buat seluk tan neʼebé Bíblia bandu.—1 Korinto 6:9-11; Efeso 5:3-5; Apostolu[Kisah] 15:28, 29.

Esperansa ba futuru

Testemuña ba Jeová fiar katak ita-nia moris agora nian iha mundu neʼe laʼós hanesan neʼe deʼit. Ami fiar katak Jeová haruka Kristu mai Rai atu fakar nia raan moris nian nuʼudar rezgate, hodi nuneʼe ema bele iha pozisaun loos iha Maromak nia oin no simu moris rohan-laek iha sistema foun ida. Hanesan Jesus nia apóstolu ida dehan: “Neʼe duni, tan ita ema los ona housi Nia ran.” (Roma 5:9; Mateus 20:28) Testemuña ba Jeová agradese ho laran ba Maromak no nia Oan-Mane tanba rezgate neʼe, neʼebé loke dalan ba moris iha futuru.

Testemuña ba Jeová fiar duni ba moris iha futuru bainhira ema moris-hiʼas fali iha Maromak nia Reinu. Ami fiar, nuʼudar Bíblia hanorin, katak bainhira ema ida mate nia loloos la iha tan, katak “iha loron neʼe ninia hanoin mohu”. (Salmo[Mazmur] 146:​3, 4; Ezequiel 18:4; Eclesiastes[Pengkhotbah] 9:5) Loos, atu ema mate bele hetan moris iha futuru depende ba Maromak atu hanoin-hetan sira hodi halo sira moris-hiʼas fali.—Joao 5:28, 29.

Maibé, Testemuña ba Jeová fiar duni katak ema barak neʼebé moris agora sei hetan salvasaun bainhira Maromak nia Reinu ramata governu hotu neʼebé ukun daudaun. No, hanesan Noé no nia família hetan salvasaun husi Rai-nabeen, ema barak neʼe sei moris hodi haksolok ho moris rohan-laek iha Rai ida neʼebé moos. (Mateus 24:​36-39; 2 Pedro 3:​5-7, 13) Maibé ami fiar katak salvasaun depende ba ema atu halo tuir buat neʼebé Jeová hakarak ema atu halo, nuʼudar Bíblia dehan: “Mundu neʼe . . .  sei liu dau-daun; maibé ema nebe halo tuir Maromak nia hakarak sei moris ba nafatin.”—1 Joao 2:17; Mateus 5:5; Apokalipse[Wahyu] 7:​9, 13-15; 21:​1-5.

Klaru katak ami labele esplika fiar hotu husi Testemuña ba Jeová iha-neʼe, maibé ami konvida Ita atu hetan informasaun liután.

[Kaixa iha pájina 4]

Ami hili naran Testemuña ba Jeová tanba ami halo tuir Jesus