Moris haksolok iha família laran
Família sira bele kontente hanesan neʼe ka lae?
Oinsá mak bele?
Ita hatene família ruma neʼebé moris hamutuk no kontente hanesan Ita haree iha tratu neʼe ka lae? Agora iha fatin barak família sira naksobu daudauk. Soe malu, serbisu la iha, problema kona-ba inan ka aman mak mesak atu haboot sira-nia oan, laran-susar—buat neʼe hotu bele halo família naksobu. Matenek-naʼin ida neʼebé hatene kona-ba moris família nian hatete ho laran-triste: “Agora, siʼik katak família sei naksobu, neʼe laʼós buat foun ba ema ida.”
Tansá família sira hasoru problema todan hanesan neʼe? Oinsá ita bele moris haksolok iha família laran?
Oinsá mak moris família nian komesa
Atu hatán ba pergunta sira-neʼe, ita presiza hatene kazamentu no moris família nia hun. Se iha Kriadór ida neʼebé mak komesa moris família nian, membru ida-idak iha família laran tenke sadere ba Nia atu hetan matadalan, tanba Nia mak hatene diʼak liu oinsá ita bele moris haksolok iha família laran.
Maibé, ema barak la fiar katak iha Kriadór ida neʼebé komesa moris família nian. The Encyclopedia Americana hatete: “Matenek-naʼin balu hanoin katak kazamentu nia hun mai husi animál rua neʼebé hamutuk sai pár ida [liuhusi evolusaun] molok ema iha.” Maibé, Jesus Kristu koʼalia kona-ba mane no feto neʼebé Maromak kria. Nia koʼalia tuir liafuan sira primeiru husi Bíblia no hatete: “Buat nebe Maromak tau hamutuk ema keta haketak.”—Mateus 19:4-6.
Nuneʼe, Jesus Kristu mak loos. Maromak neʼebé matenek kria pár primeiru no arranja moris família neʼebé haksolok. Maromak tau mane no feto hamutuk iha kazamentu no dehan katak mane “tenke hela hamutuk ho nia feen no sira tenke sai isin ida deʼit”. (Gênesis[Kejadian] 2:22-24) Entaun, loos ka lae katak problema mosu daudauk iha família laran tanba sira buka dalan moris neʼebé kontra buat neʼebé Kriadór dehan loos iha nia Liafuan, Bíblia?
Dalan ne’ebé mak di’ak liu?
Karik Ita hatene, mundu modernu neʼe hakaʼas Ita atu hanoin Ita-nia an deʼit no buka Ita rasik nia hakarak. “Kaan-teen mak diʼak ba Ita-nia an”, Matenek-naʼin ida kona-ba orsamentu iha Estadus Unidus fó-hatene ba estudante sira neʼebé atu ramata sira-nia estudu. “Ita bele sai kaan-teen no sei sente diʼak kona-ba Ita-nia an.” Maibé buka rikusoin la halo Ita-nia moris sai diʼak liu. Loloos, buka rikusoin mak ameasa boot ida ba moris família nian tanba bele estraga relasaun entre ema no halo ema gasta tempu no osan. Maibé, hanoin toʼok oinsá versíkulu rua deʼit husi Bíblia bele ajuda ita atu haree saida mak importante liu atu iha moris haksolok.
“Diʼak liu han modo-tahan hamutuk ho ema neʼebé ita hadomi duké han naʼan ho ema neʼebé odi malu.”
“Diʼak liu han paun maran ida ho neon-hakmatek duké han ai-han festa nian iha uma ida nakonu ho istori malu.”
Provérbios[Amsal] 15:17; 17:1, “Lembaga Alkitab Indonesia.”
Liafuan hirak-neʼe iha kbiit duni! Hanoin toʼok, se família hotu tuir liafuan hirak-neʼe, mundu neʼe sei sai diʼak liu fali! Bíblia mós fó matadalan neʼebé diʼak tebes kona-ba oinsá membru sira tenke haree malu iha família laran. Hanoin toʼok konsellu balu husi Bíblia.
La’en sira: ‘Hadomi imi-nia kaben hanesan imi hadomi imi rasik nia isin lolon.’—Efeso 5:28-30.
Simples deʼit, no lasusar atu halo tuir! Bíblia mós haruka laʼen sira atu ‘hanoin sira-nia feen’. (1 Pedro 3:7) Laʼen halo ida-neʼe hodi tau matan didiʼak ba nia feen, hanesan hatudu laran-maus no laran-diʼak, no hakmaan nia. Laʼen mós rona nia feen no respeitu ninia hanoin. (Haree Gênesis[Kejadian] 21:12.) Família hotu sei moris kontente liu se laʼen trata nia feen ho domin hanesan nia hakarak feen trata nia. Ita mós hanoin hanesan neʼe ka lae?—Mateus 7:12.
Feen sira: “Feto mos sei hamtauk nia laen.”—Efeso 5:33.
Feen ida bele aumenta ksolok iha família laran hodi ajuda nia laʼen atu halaʼo ninia knaar sira neʼebé todan. Ida-neʼe mak Maromak nia hakarak, tanba Nia fó feen ida nuʼudar “ajudadór ba nia [laʼen], atu halo nia sai kompletu”. (Gênesis[Kejadian] 2:18) Ita bele hafolin ka lae bensaun sira iha moris família nian kuandu feen hatudu respeitu hodi apoia nia laʼen nia desizaun no serbisu hamutuk atu hetan buat neʼebé família hakarak?
Kaben-na’in sira: “La’en no feen sira tenkesér laran-metin ba malu.”—Ebreu[Ibrani] 13:4, “Today’s English Version.”
Bainhira sira laran-metin ba malu, moris família nian sai diʼak liu duni. Dala barak adultériu ka sala-foʼer ho ema seluk hasobu família ida. (Provérbios[Amsal] 6:27-29, 32) Nuneʼe, liafuan matenek husi Bíblia anima kaben-naʼin sira: “Haksolok bá ho ó-nia feen no hetan ksolok ho feto neʼebé ó hola . . . Tansá ó tenke fó ó-nia domin ba feto seluk?”—Provérbios[Amsal] 5:18-20, TEV.
Inan-aman sira: “Fó treinu ba [imi-nia oan sira] tuir dalan ne’ebé [sira] tenke la’o.”—Provérbios[Amsal] 22:6.
Bainhira inan-aman fó tempu no atensaun ba sira-nia oan sira, moris família nian sai diʼak liu tan. Nuneʼe, Bíblia anima inan-aman sira atu hanorin morál neʼebé loos ba sira-nia oan ‘bainhira sira tuur iha uma no bainhira sira laʼo iha dalan no bainhira sira toba no bainhira sira hadeer’. (Deuteronômio[Ulangan] 11:19) Bíblia mós dehan katak inan-aman sira tenke hatudu domin ba sira-nia oan sira hodi fó dixiplina.—Efeso 6:4.
Oan sira: “Oan sira, halo tuir imi nia aman inan sira nia hakarak.” — Efeso 6:1.
Loos, iha mundu neʼebé la tuir lei, susar atu sempre halo tuir inan-aman sira. Maibé, Ita mós hanoin hanesan ka lae katak diʼak liu atu halo saida mak Maromak haruka mai ita? Tan nia mak harii moris família nian, nia hatene saida mak diʼak liu atu halo ita-nia família sai kontente tebes. Nuneʼe, koko makaʼas atu halo tuir Ita-nia inan-aman. Koko makaʼas atu hadook an husi tentasaun barak atu halo buat aat iha mundu neʼe.—Provérbios[Amsal] 1:10-19.
Moris família nian sei sai diʼak liu bainhira membru ida-idak iha família halaʼo tuir konsellu husi Bíblia. Família neʼe laʼós deʼit sei hetan moris diʼak liu agora maibé mós sei iha esperansa kapás iha mundu foun neʼebé Maromak promete ona ba aban-bainrua. (2 Pedro 3:13; Apokalipse[Wahyu] 21:3, 4) Nuneʼe, sai toman atu estuda Bíblia hamutuk iha família! Família barak iha rai tomak hetan moris diʼak liu tanba estuda Bíblia hodi uza livru Rahasia Kebahagian Keluarga.