Lisaun 3
Sé maka Jesus Kristu?
Tansá maka Jesus iha naran Maromak nia Oan “boot liu”? (1)
Tansá maka nia iha naran ‘Liafuan’? (1)
Tansá maka Jesus mai toʼo Rai nuʼudar ema-mane ida? (2-4)
Tansá maka nia halo milagre sira? (5)
Saida maka Jesus sei halo iha futuru besik mai? (6)
1. Antes Jesus mai toʼo Rai, nia moris iha lalehan nuʼudar kriatura espíritu ida. Nia maka Maromak kria primeiru. Tan neʼe maka nia iha naran Maromak nia Oan “boot liu”, ou oan-primeiru. (Koloso 1:15; Apokalipse[Wahyu] 3:14) Jesus mak Oan mesak deʼit neʼebé Maromak kria rasik. Antes Jesus mai toʼo Rai nuʼudar ema ida, Jeová uza nia nuʼudar ninia “serbisu-naʼin boot liu” para kria buat hotu seluk iha lalehan no iha Rai. (Provérbios[Amsal] 8:22-31; Koloso 1:16, 17) Maromak uza Jesus nuʼudar ema importante liu atu dehan sai Ninia liafuan sira. Tanba neʼe maka Jesus iha naran ‘Liafuan’. — Joao 1:1-3; Apokalipse[Wahyu] 19:13.
2. Maromak haruka Nia Oan mai Rai hodi muda nia moris husi lalehan ba Maria nia kabun. Nuneʼe Jesus la iha aman husi Rai. Tanba neʼe maka nia la hetan sala ida, maibé nia perfeitu. Maromak haruka Jesus toʼo Rai tanba razaun tolu: (1) atu hanorin ita lia-loos kona-ba Maromak (Joao 18:37), (2) atu hamriik metin hodi halo tuir buat hotu neʼebé Maromak hakarak, nuneʼe nia fó mai ita ezemplu, ou modelu ida atu tuir (1 Pedro 2:21), no (3) atu saran, ou sakrifika nia moris hodi salva ita husi sala no mate. Tansá maka presiza ida-neʼe? — Mateus 20:28.
3. Hodi la halo tuir Maromak nia ukun-fuan mak ema primeiru iha Rai, Adão, halo buat neʼebé Bíblia bolu “sala”. Tan neʼe maka Maromak fó ba nia kastigu-mate. (Gênesis[Kejadian] 3:17-19) Nia la halo tuir tan Maromak nia lei sira, tan neʼe maka nia la perfeitu tan. Neineik-neineik nia sai katuas no mate. Adão hadaʼet sala ba nia oan sira hotu. Tanba neʼe mak ita mós sai ferik-katuas, hetan moras no mate. Oinsá mak ema bele hetan salvasaun? — Roma 3:23; 5:12.
4. Iha Rai, Jesus deʼit mak ema perfeitu ida hanesan ho Adão. Maibé, la hanesan Adão, Jesus halo tuir Maromak iha buat hotu, maski nia hasoru tentasaun boot liu. Tan neʼe maka nia bele saran ninia moris nuʼudar ema perfeitu atu selu Adão nia sala. Ida-neʼe buat Bíblia bolu ‘rezgate’. Hanesan neʼe, Adão nia oan sira bele livre husi kastigu-mate. Ema hotu neʼebé tau fiar iha Jesus bele hetan perdua husi sala no simu moris rohan-laek. — 1 Timoteo 2:5, 6; Joao 3:16; Roma 5:18, 19.
5. Kuandu Jesus iha Rai, nia kura ema moras, fó-han ema hamlaha no halo hakmatek anin-fuik. Nia mós halo moris fali ema mate. Tansá maka nia halo milagre sira? (1) Nia sente hanoin ba ema sira iha terus laran, no nia hakarak ajuda sira. (2) Ninia milagre sira hatudu katak nia maka Maromak nia Oan. (3) Milagre sira hatudu saida maka nia sei halo ba ema neʼebé maka halo tuir nia bainhira nia ukun Rai nuʼudar Liurai. — Mateus 14:14; Marcos 2:10-12; Joao 5:28, 29.
6. Jesus mate no Maromak halo nia moris fali nuʼudar kriatura espíritu ida, no nia fila fali ba lalehan. (1 Pedro 3:18) Depois tempu liutiha maka Maromak halo nia sai Liurai ida. Lakleur tan, Jesus sei hasai buat aat hotu no terus hotu husi Rai neʼe. — Salmo[Mazmur] 37:9-11; Provérbios[Amsal] 2:21, 22.
[Dezeñu sira iha pájina 7]
Jesus nia serbisu inklui hanorin, halo milagre sira, no mós fó ninia moris mai ita