Lisaun 5

Buat saida maka Maromak hakarak halo ba Rai?

Tansá maka Jeová kria Rai? (1, 2)

Tansá maka Rai agora laʼós paraízu ida? (3)

Saida maka sei akontese ba ema aat sira? (4)

Iha futuru, saida maka Jesus sei halo ba ema moras, ferik-katuas, no ema mate? (5, 6)

Saida mak Ita presiza halo atu bele hetan bensaun sira iha futuru? (7)

1. Jeová kria Rai neʼe atu ema bele goza sira-nia moris iha Rai ba nafatin. Nia hakarak atu ema neʼebé loos no kontente maka moris iha Rai neʼe. (Salmo[Mazmur] 115:16; Isaías 45:18) Rai sei la naksobu; sei hela ba nafatin. — Salmo[Mazmur] 104:5; Eclesiastes[Pengkhotbah] 1:⁠4.

2. Antes Maromak halo ema, Nia hili fatin kiʼik ida husi Rai hodi halo neʼe sai paraízu furak ida. Nia hanaran fatin neʼe jardín Éden. Iha fatin neʼe duni maka nia tau ema-mane primeiru no feto primeiru, Adão no Eva. Maromak hakarak sira iha oan hodi hakonu Rai tomak. Neineik-neineik sira bele halo Rai tomak sai paraízu ida. — Gênesis[Kejadian] 1:28; 2:​8, 15.

3. Adão no Eva halo sala hodi la halo tuir Maromak nia ukun-fuan maski sira hatene ona neʼe la loos. Tan neʼe, Jeová duni sai sira husi jardín Éden. Paraízu lakon tiha. (Gênesis[Kejadian] 3:1-6, 23) Maibé Jeová la haluha buat nia hakarak halo ba Rai neʼe. Nia promete atu halo Rai sai paraízu ida, iha neʼebé ema sei moris ba nafatin. Oinsá maka nia sei halo ida-neʼe? — Salmo[Mazmur] 37:29.   

4. Antes Rai neʼe atu sai paraízu ida, tenke hasai ulukliu ema aat sira. (Salmo[Mazmur] 37:38) Ida-neʼe sei akontese iha Armajedón, neʼe maka Maromak nia funu atu ramata buat aat hotu. Tuirmai, Maromak sei fó orden atu hatama Satanás iha kadeia durante tinan 1.000 nia laran. Ida-neʼe signifika katak sei la iha tan ema aat atu estraga Rai. Maromak nia povu deʼit maka sei hetan salvasaun. — Apokalipse[Wahyu] 16:​14, 16; 20:​1-3.

5. Iha tempu neʼebá Kristu Jesus sei ukun Rai nuʼudar Liurai durante tinan 1.000. (Apokalipse[Wahyu] 20:⁠6) Neineik-neineik nia sei halakon sala husi ita-nia hanoin no isin. Ita sei sai ema perfeitu hanesan loos ho Adão no Eva antes sira halo sala. Depois sei la iha tan moras, ferik-katuas no mate. Ema moras sei sai diʼak fali, no ema ferik-katuas sei sai joven fali. — Jó[Ayub] 33:25; Isaías 33:24; Apokalipse[Wahyu] 21:​3, 4.

6. Durante Jesus nia Ukun Tinan Rihun Ida nian, ema fiar-metin sira sei serbisu atu halo Rai tomak sai paraízu ida. (Apokalipse[Wahyu] 21:​3, 4) Mós, ema rihun ba rihun neʼebé mate sei moris-hiʼas fali iha Rai. (Apostolu[Kisah] 24:15) Se sira depois halo buat neʼebé Maromak hakarak, sira sei kontinua atu moris iha Rai ba nafatin. Selae, Maromak sei sobu sira ba nafatin. — Joao 5:​28, 29.

7. Hanesan neʼe maka buat Maromak uluk hakarak halo sei sai loos. Ita hakarak atu hetan bensaun hirak-neʼe iha futuru ka lae? Se hakarak, Ita tenke kontinua atu aprende kona-ba Jeová no halo tuir ninia hakarak. Atu ajuda Ita halo ida-neʼe, tuir beibeik reuniaun sira iha Testemuña ba Jeová sira-nia reuniaun-fatin. — Isaías 11:9; Ebreu[Ibrani] 10:​24, 25.

[Dezeñu iha pájina 10]

Paraízu lakon

[Dezeñu sira iha pájina 11]

Depois Armajedón, ema sei halo Rai sai paraízu ida