Lisaun 6

Saida maka Maromak nia Reinu?

Maromak nia Reinu iha neʼebé? (1)

Sé maka nia Liurai? (2)

Iha ema seluk neʼebé ukun hamutuk ho Liurai neʼe ka lae? Se nuneʼe, naʼin-hira? (3)

Saida maka hatudu katak ita moris iha loron ikus sira? (4)

Iha futuru, saida maka Maromak nia Reinu sei halo ba ema iha Rai? (5-7)

1. Kuandu Jesus hela iha Rai, nia hanorin ema neʼebé tuir nia atu harohan ba Maromak nia Reinu atu mai. Reinu ida maka governu ida neʼebé liurai mak ulun-boot. Maromak nia Reinu maka governu espesiál ida. Reinu neʼe harii iha lalehan no sei ukun Rai neʼe. Nia sei halo santu, ou hahiʼi Maromak nia naran. Reinu neʼe sei halo Maromak nia hakarak iha Rai nuʼudar iha lalehan. — Mateus 6:​9, 10.

2. Maromak promete katak Jesus maka sei sai Liurai ba Ninia Reinu. (Lucas 1:​30-33) Kuandu Jesus hela iha Rai, nia hatudu katak nia sei sai Ukun-naʼin ida neʼebé laran-diʼak, loos, no perfeitu. Kuandu nia fila fali ba lalehan, nia la simu kedas ninia ukun nuʼudar Liurai ba Maromak nia Reinu. (Ebreu[Ibrani] 10:​12, 13) Iha tinan 1914 maka Jeová fó Jesus kbiit neʼebé Nia promete tiha ona. Husi tempu neʼebá maka Jesus ukun iha lalehan nuʼudar Liurai neʼebé Jeová hili. — Daniel 7:13, 14.

3. Jeová fihir mós ema balu husi Rai, mane no feto neʼebé fiar-metin, atu bá lalehan. Sira sei hamutuk ho Jesus nuʼudar liurai, juís, no amlulik hodi ukun ema iha Rai. (Lucas 22:​28-30; Apokalipse[Wahyu] 5:​9, 10) Jesus hanaran sira neʼebé sei ukun ho nia iha nia Reinu bibi-malae lubun kiʼik. Sira hamutuk 144.000. — Lucas 12:32; Apokalipse[Wahyu] 14:​1-3.

4. Momentu Jesus sai Liurai, nia soe tun Satanás no nia anju aat sira husi lalehan ba Rai. Tanba ida-neʼe maka buat sira neʼebé mosu daudaun iha Rai neʼe sai aat liu husi tinan 1914. (Apokalipse[Wahyu] 12:​9, 12) Funu sira, hamlaha boot, moras-peste, kontra lei aumenta ba beibeik, buat hirak-neʼe hotu maka halo parte “sinal” ida neʼebé hatudu katak Jesus ukun hela no katak mundu tuan neʼe iha loron ikus sira-nia laran. — Mateus 24:​3, 7, 8, 12; Lucas 21:10, 11; 2 Timoteo 3:​1-5.

5. Lakleur Jesus sei tesi-lia ba ema. Nia sei haketak sira hanesan bibi-atan ida haketak ninia bibi-malae husi bibi-timur sira. “Bibi-malae” maka ema neʼebé hatudu tiha ona katak sira maka povu neʼebé fiar-metin ba Jesus. Sira sei simu moris rohan-laek iha Rai. “Bibi-timur” maka ema neʼebé la simu Maromak nia Reinu. (Mateus 25:​31-34, 46) Iha futuru besik atu mai, Jesus sei sobu sira hotu neʼebé hanesan bibi-timur. (2 Tesalonia 1:​6-9) Se Ita hakarak sai Jesus nia “bibi-malae” ida, Ita tenke rona ba mensajen Reinu nian no halo tuir buat saida Ita aprende. — Mateus 24:14.

6. Agora Rai fahe ba nasaun barak. Ida-idak iha ninia governu rasik. Nasaun sira-neʼe kontra malu beibeik. Maibé, Maromak nia Reinu sei troka governu sira hotu iha Rai, no sei ukun Rai tomak nuʼudar governu mesak ida deʼit. (Daniel 2:44) Iha tempu neʼebá sei la iha tan funu, krime no violénsia. Ema hotu sei moris hamutuk ho dame no unidade. — Miquéias 4:​3, 4.

7. Durante Jesus nia Ukun Tinan Rihun Ida nian, ema fiar-metin sira sei sai perfeitu, no Rai tomak sei sai paraízu ida. Iha tinan rihun ida nia rohan, Jesus sei halo tiha buat hotu neʼebé Maromak husu nia atu halo. Iha tempu neʼebá nia sei entrega fali Reinu ba nia Aman. (1 Korinto 15:​24) Tansá Ita la dehan ba Ita-nia kolega sira no sira neʼebé Ita hadomi kona-ba saida maka Maromak nia Reinu sei halo?

[Dezeñu iha pájina 13]

Iha Jesus nia ukun okos, ema sei la odi malu ou haketak malu tan