Lisaun 7
Hakbesik ba Maromak iha orasaun
Tansá mak importante atu harohan beibeik? (1)
Ba sé mak ita tenke harohan, no oinsá? (2, 3)
Kona-ba buat saida deʼit maka loos atu harohan? (4)
Bainhira mak ita tenke harohan? (5, 6)
Maromak rona orasaun sira hotu ka lae? (7)
1. Orasaun katak koʼalia ho haraik-an ba Maromak. Ita tenke harohan, ou hamulak ba Maromak beibeik. Hanesan neʼe Ita bele sente besik ba nia hanesan belun ida. Jeová boot loos no iha podér makaʼas, maibé nia rona ita-nia orasaun! Ita harohan beibeik ba Maromak ka lae? — Salmo[Mazmur] 65:2; 1 Tesalonia 5:17.
2. Orasaun halo parte iha ita-nia adorasaun. Nuneʼe, ita tenke harohan deʼit ba Maromak, Jeová. Kuandu Jesus hela iha rai, nia sempre harohan ba ninia Aman, laʼós ba ema ida seluk. Ita tenke halo hanesan Jesus. (Mateus 4:10; 6:9) Maibé, ita tenke hatoʼo ita-nia orasaun hotu iha Jesus nia naran. Hanesan neʼe, ita hatudu katak ita iha respeitu ba Jesus nia pozisaun no katak ita iha fé ba ninia sakrifísiu rezgate nian. — Joao 14:6; 1 Joao 2:1, 2.
3. Kuandu ita harohan, ita tenke koʼalia ba Maromak husi ita-nia fuan-laran. Ita labele dekór orasaun ou lee husi livru-orasaun ida. (Mateus 6:7, 8) Ita bele harohan iha pozisaun naran deʼit neʼebé hatudu respeitu, tempu naran deʼit, no fatin neʼebé deʼit. Maromak bele rona mós orasaun neʼebé ita hatoʼo iha ita-nia laran deʼit. (1 Samuel 1:12, 13) Diʼak se ita buka fatin hakmatek ida, dook husi ema, atu halo ita-nia orasaun rasik. — Marcos 1:35.
4. Kona-ba buat saida mak Ita bele harohan? Kona-ba buat hotu neʼebé bele hametin ou estraga Ita-nia relasaun ho Maromak. (Filipe 4:6, 7) Iha orasaun Ami Aman, neʼebé Jesus hanorin ita, hatudu katak ita tenke harohan kona-ba Jeová nia naran no buat nia hakarak halo. Ita mós bele husu buat ita presiza loroloron, atu perdua ita-nia sala, no ajuda ita atu tahan tentasaun. (Mateus 6:9-13) Ita-nia orasaun laʼós kona-ba ita-nia an deʼit. Ita tenke harohan deʼit kona-ba buat sira neʼebé tuir Maromak nia hakarak. — 1 Joao 5:14.
5. Ita bele halo orasaun bainhira deʼit Ita-nia fuan book Ita atu agradese ou hahiʼi Maromak. (1 Crônicas[1 Tawarikh] 29:10-13) Ita tenke harohan bainhira Ita iha problema no hetan situasaun ruma neʼebé bele halo fraku Ita-nia fé. (Salmo[Mazmur] 55:22; 120:1) Tempu diʼak mós atu halo orasaun mak antes Ita atu han. (Mateus 14:19) Jeová konvida ita atu “hamulak nafatin ba”. — Efeso 6:18.
6. Ita tenke harohan liuliu se ita halo sala boot. Iha tempu hanesan neʼe ita tenke husu makaʼas ba Jeová atu sente hanoin mai ita no perdua ita. Se ita konfesa ita-nia sala no ita hakaʼas an atu la halo fali, Maromak prontu atu perdua. — Ebreu[Ibrani] 8:12; Provérbios[Amsal] 28:13.
7. Jeová rona deʼit ba orasaun husi ema loos. Atu Maromak rona Ita-nia orasaun sira, Ita tenke hakaʼas an atu moris tuir Ninia lei sira. (Provérbios[Amsal] 15:29; 28:9; Joao 9:31) Ita tenkesér haraik-an bainhira Ita harohan. (Lucas 18:9-14) Ita tenke hakaʼas an atu halaʼo tuir buat Ita harohan. Nuneʼe, Ita hatudu katak Ita iha fiar, no mós katak buat Ita halo hanesan ho buat Ita koʼalia. Hanesan neʼe deʼit maka Jeová sei hatán Ita-nia orasaun sira. — Ebreu[Ibrani] 11:6.