Lisaun 9
Maromak nia atan sira tenkesér moos
Tansá mak ita tenkesér moos iha buat hotu? (1)
Moos iha buat espirituál katak sá? (2) Iha morál katak sá? (3) Iha mentál katak sá? (4) Iha isin katak sá? (5)
Liafuan foʼer saida mak ita labele temi? (6)
1. Maromak Jeová maka moos no santu. Nia hakarak ema neʼebé adora nia atu sai moos nafatin iha buat neʼebé espirituál, morál, mentál no isin. (1 Pedro 1:16) Ita tenke hakaʼas an tebes atu moos nafatin iha Maromak nia oin. Ita moris iha mundu ida neʼebé la moos. Ita mós iha luta ida atu hasoru ita-nia hakarak neʼebé dudu ita atu halo sala. Maibé ita tenkesér labele rende an.
2. Moos iha buat espirituál nian: Se ita hakarak serbí Jeová, ita labele kaer nafatin ba hanorin no kostume husi relijiaun falsu. Ita tenkesér sai husi relijiaun falsu no la fó apoiu ida. (2 Korinto 6:14-18; Apokalipse[Wahyu] 18:4) Bainhira ita aprende tiha lia-loos kona-ba Maromak, ita tenke kuidadu atu labele husik ema neʼebé hanorin lia-falsu lohi ita. — 2 Joao 10, 11.
3. Moos iha buat morál nian: Jeová hakarak ema neʼebé adora nia atu halo tuir hahalok kristaun loos nian loron-loron. (1 Pedro 2:12) Nia haree buat hotu ita halo, maski subasubar. (Ebreu[Ibrani] 4:13) Ita tenke sees husi imoralidade seksuál no prátika foʼer sira seluk husi mundu neʼe nian. — 1 Korinto 6:9-11.
4. Moos iha buat mentál nian: Se ita halo nakonu ita-nia neon ho hanoin neʼebé moos, ita-nia hahalok mós sei sai moos. (Filipe 4:8) Maibé, se ita hanoin nafatin kona-ba buat foʼer ita-nia hahalok mós sei sai aat. (Mateus 15:18-20) Ita tenke sees an husi filme, livru no halimar sira seluk neʼebé bele hafoʼer ita-nia neon. Ita bele halo nakonu ita-nia neon ho hanoin neʼebé moos hodi estuda Maromak nia Liafuan.
5. Moos iha buat isin nian: Tanba kristaun sira reprezenta Maromak, sira tenke mantein sira-nia isin no roupa moos. Ita tenke fase liman bainhira ita ba sentina, no ita tenke fase liman antes han ou antes kaʼer hahán. Se Ita-nia uma la iha sentina fatin, entaun bainhira Ita ba sentina tenke hakoi tiha. (Deuteronômio[Ulangan] 23:12, 13) Mantein isin neʼebé moos sei ajuda ita hetan saúde diʼak. Kristaun ida tenke haloot no hamoos nia uma iha laran no iha liʼur. Ita-nia uma tenke sai ezemplu diʼak ba komunidade.
6. Liafuan neʼebé moos: Maromak nia atan sira tenkesér sempre koʼalia lia-loos. Bosok-teen sira sei la tama iha Maromak nia Reinu. (Efeso 4:25; Apokalipse[Wahyu] 21:8) Kristaun sira la uza liafuan aat. Sira la rona no la konta istória foʼer atu halo ema hamnasa. Tanba sira koʼalia liafuan neʼebé moos, sira la hanesan ema seluk iha serbisu-fatin, iha eskola, no mós iha viziñu sira-nia leet. — Efeso 4:29, 31; 5:3.
[Dezeñu sira iha pájina 18, 19]
Maromak nia atan sira tenkesér moos iha buat hotu