Lisaun 13

Oinsá mak Ita bele hetan relijiaun loos?

Relijiaun hotu halo kontente Maromak ka ida deʼit? (1)

Tansá mak iha relijiaun barak neʼebé dehan katak sira kristaun? (2)

Oinsá mak Ita bele hatene kristaun loos? (3-7)

1. Jesus harii relijiaun kristaun loos ida deʼit. Tan neʼe mak ohin loron iha grupu ida deʼit neʼebé fó adorasaun loos ba Jeová. (Joao 4:​23, 24; Efeso 4:​4, 5) Bíblia hanorin katak ema uitoan deʼit maka laʼo iha dalan kloot ba moris. —  Mateus 7:​13, 14.

2. Bíblia hateten nanis katak depois apóstolu hotu mate tiha, hanorin laloos no hahalok neʼebé laʼós kristaun, neineik-neineik sei tama iha kongregasaun kristaun nia laran. Ema balu sei dada sai ema neʼebé fiar atu tuir sira duké Kristu. (Mateus 7:​15, 21-23; Apostolu[Kisah] 20:​29, 30) Tanba ida-neʼe mak iha relijiaun barak neʼebé dehan katak sira kristaun. Oinsá mak ita bele hatene kristaun loos?

3. Sinál boot liu neʼebé hatudu nuʼudar kristaun loos maka hadomi malu. (Joao 13:​34, 35) Kristaun sira la aprende katak ema ruma diʼak liu fali ema husi rasa ou kór seluk. Sira mós la aprende atu odi ema husi nasaun, ou rai seluk. (Apostolu[Kisah] 10:​34, 35) Tan neʼe maka sira la hola parte iha funu sira. Kristaun loos sira trata malu hanesan maun-alin. — 1 Joao 4:​20, 21.

4. Sinál seluk neʼebé hatudu katak relijiaun loos maka bainhira ema iha respeitu kleʼan ba Bíblia. Sira simu Bíblia nuʼudar Maromak nia Liafuan, no sira fiar hotu buat neʼebé Bíblia hateten. (Joao 17:17; 2 Timoteo 3:​16, 17) Sira hanoin katak Maromak nia Liafuan mak importante liu duké ema-nia ideia ou lisan sira. (Mateus 15:​1-3, 7-9) Sira buka atu moris tuir Bíblia iha sira-nia moris loroloron nian. Tan neʼe, sira la hanorin buat ida, depois halo buat seluk. — Tito 1:​15, 16.

5. Relijiaun loos tenke hahiʼi Maromak nia naran. (Mateus 6:⁠9) Jesus fó-hatene Maromak nia naran, Jeová, ba ema seluk. Kristaun loos sira tenkesér halo hanesan Jesus halo. (Joao 17:​6, 26; Roma 10:​13, 14) Iha Ita-nia komunidade, sé maka fó-hatene ba ema seluk Maromak nia naran?

6. Kristaun loos sira tenke haklaken kona-ba Maromak nia Reinu. Jesus halo ida-neʼe. Nia sempre koʼalia kona-ba Reinu neʼe. (Lucas 8:⁠1) Jesus haruka ninia dixípulu sira atu haklaken mensajen ida-neʼe iha mundu tomak. (Mateus 24:14; 28:​19, 20) Kristaun loos sira fiar katak Maromak nia Reinu deʼit maka bele lori dame loos no seguransa ba Rai neʼe. — Salmo[Mazmur] 146:​3-5.

7. Jesus nia dixípulu sira tenkesér laʼós mundu aat neʼe nian. (Joao 17:16) Sira la hola parte iha mundu nia polítika, no iha buat neʼebé halo ema istori malu iha komunidade nia laran. Sira hadook an husi hahalok, kostume no ideia aat neʼebé mosu beibeik iha mundu neʼe. (Tiago[Yakobus] 1:27; 4:⁠4) Iha Ita-nia komunidade, Ita hatene relijiaun saida mak iha sinál sira-neʼe, neʼebé hatudu kristianizmu loos?

[Dezeñu sira iha pájina 26, 27]

Kristaun loos sira hadomi malu, respeita Bíblia, no haklaken kona-ba Maromak nia Reinu