Estuda lori bensaun barak

ITA haree ona ema hili ai-fuan ka lae? Ema barak haree nia kór no nia boot hodi hatene se ai-fuan neʼe tasak ona ka lae. Ema seluk horon ka buti ai-fuan neʼe. Maibé ema balu tan tetu ai-fuan neʼe iha sira-nia liman sorin-sorin atu bele hatene ida-neʼebé mak diʼak liu. Saida mak ema sira-neʼe hanoin? Tuir loloos, sira hanoin didiʼak kona-ba ai-fuan neʼe, no haree oinsá neʼe la hanesan, sira mós hanoin-hetan kona-ba ai-fuan neʼebé uluk sira hili, no kompara buat neʼebé agora sira haree ho buat neʼebé sira hatene ona. Hodi hanoin didiʼak kona-ba ai-fuan neʼe, ikusmai sira hetan bensaun hodi han ai-fuan neʼebé tasak no diʼak.

Tuir loloos, hodi estuda Maromak nia Liafuan lori bensaun neʼebé boot liu. No kuandu ida-neʼe sai nuʼudar buat neʼebé importante iha ita-nia moris, ita-nia fiar no domin sei sai boot liu, ita mós bele hetan susesu kuandu haklaken, no desizaun neʼebé ita halo hatudu katak ita iha matenek husi Maromak. Kona-ba buat diʼak sira-neʼe, Provérbios (Amsal) 3:15 dehan: “Husi buat hotu neʼebé ita gosta, la iha buat ida neʼebé bele kompara ho matenek.” Ita hetan ona bensaun sira-neʼe ka lae? Dalan neʼebé ita estuda kona duni buat diʼak neʼebé ita hetan.—Koloso 1:9, 10.

Entaun, estuda katak sá? Neʼe laʼós katak lee liu deʼit. Maibé neʼe inklui uza ita-nia kbiit atu komprende informasaun ruma no fó tempu atu hanoin ho didiʼak. Estuda mós inklui hanoin kona-ba buat neʼebé ita lee, kompara neʼe ho buat neʼebé ita hatene ona, no haree razaun tansá ema ida fó sai informasaun neʼe. Kuandu ita estuda, hanoin kleʼan kona-ba informasaun neʼebé foun ba ita. Hanoin mós kona-ba oinsá mak ita rasik bele halo tuir didiʼak konsellu husi Eskritura sira. Nuʼudar Testemuña ba Jeová, ita mós hakarak atu hanoin kona-ba oportunidade sira atu uza informasaun neʼe hodi ajuda ema seluk. Sin, estuda inklui hanoin kleʼan.

Prepara ita-nia laran

Kuandu ita atu estuda, ita prepara buat oioin hanesan ita-nia Bíblia, livru neʼebé ita atu estuda, lapis ka lapizeira, no karik kadernu ruma. Maibé, ita mós prepara ita-nia laran ka lae? Bíblia dehan katak “Ezra prepara ninia laran hodi lee Jeová nia Ukun-Fuan no halo tuir ida-neʼe, no atu hanorin ninia mandamentu sira no ninia tesi-lia iha Izraél”. (Esdras [Ezra] 7:10) Entaun, atu prepara ita-nia laran, neʼe envolve saida?

Orasaun ajuda ita atu estuda Maromak nia Liafuan ho hanoin neʼebé loos. Ita hakarak ita-nia laran simu matadalan neʼebé Jeová fó ba ita. Antes atu hahú ita-nia estuda, husu Jeová atu fó ba ita ninia espíritu santu. (Lucas 11:13) Husu ninia ajuda atu komprende buat neʼebé ita estuda, no komprende oinsá ida-neʼe liga ho ninia hakarak, oinsá mak ida-neʼe bele ajuda ita atu hatene buat aat no buat diʼak, oinsá mak ita bele halo tuir ninia matadalan sira iha ita-nia moris, no mós oinsá mak informasaun neʼe kona ita-nia relasaun ho nia. (Provérbios [Amsal] 9:10) Nuʼudar ita estuda, “kontinua husu” matenek husi Maromak. (Tiago 1:5) Kompara ita-nia an tuir buat neʼebé ita aprende no husu Jeová nia ajuda hodi halakon hanoin neʼebé sala ka hakarak aat sira. Diʼak atu sempre hatoʼo ‘agradese ba Jeová’ tanba buat sira neʼebé nia hatudu ona mai ita. (Salmo [Mazmur] 147:7) Hodi halo orasaun kuandu estuda sei halo ita-nia relasaun ho Jeová sai metin liu, tanba ida-neʼe ajuda ita atu rona ba nia nuʼudar nia koʼalia ba ita liuhusi ninia Liafuan.—Salmo (Mazmur) 145:18.

Tanba Jeová nia povu prontu atu simu konsellu husi nia, ida-neʼe halo sira la hanesan duni ho ema seluk. Ba ema barak neʼebé la adora Maromak, sira sempre iha dúvida no buka razaun atu la simu buat neʼebé sira lee. Maibé, ita labele hatudu hahalok hanesan neʼe. Ita tau fiar ba Jeová. (Provérbios [Amsal] 3:5-7) Se ita la komprende buat ruma, ita la hanoin kedas katak informasaun neʼe sala. Nuʼudar ita halo riset no keʼe kleʼan hodi hetan resposta, ita nafatin hein ba Jeová. (Miquéias [Mikha] 7:7) Hanesan Esdras, ita-nia objetivu mak halo tuir buat neʼebé ita aprende no mós hanorin fali ida-neʼe ba ema seluk. Se ita prepara ita-nia laran hanesan neʼe, ita sei hetan duni buat diʼak barak husi ita-nia estuda.

Oinsá atu estuda?

Duké hahú kedas estuda husi parágrafu primeiru toʼo parágrafu ikus, diʼak se ita uza uluk tempu atu haree liu saida mak iha lisaun neʼe ka kapítulu neʼe nia laran. Ita bele hahú hodi hanoin kleʼan kona-ba títulu. Ida-neʼe mak tema ba buat neʼebé ita sei estuda. Tuirmai, haree oinsá mak subtítulu ida-idak liga ho tema. Haree didiʼak kona-ba dezeñu sira, lista sira, ka kaixa neʼebé iha informasaun neʼe. Husu ba ita-nia an: ‘Tuir buat neʼebé haʼu foin haree liu, saida mak haʼu sei aprende husi informasaun neʼe? Iha dalan saida deʼit mak ida-neʼe folin-boot ba haʼu?’ Resposta ba pergunta sira-neʼe sei ajuda ita atu estuda.

Tuirmai estuda informasaun sira. Lisaun iha Livru Haklaken no livru balu inklui mós pergunta sira neʼebé hakerek tiha ona. Nuʼudar ita lee parágrafu ida-idak, diʼak atu riska resposta sira. Maski informasaun neʼe la iha pergunta sira, maibé ita bele riska pontu importante sira neʼebé ita hakarak hanoin-hetan. Se informasaun ruma mak foun, uza tempu tan atu hanoin didiʼak ida-neʼe hodi ita bele komprende ho loloos. Hanoin kona-bá ai-knanoik sira ka dalan diʼak atu esplika Bíblia neʼebé sei ajuda ita iha serbisu haklaken, ka ita bele uza iha ita-nia diskursu ida tuirmai. Hanoin kona-ba ema neʼebé ita bele ajuda hodi fahe ba sira buat neʼebé ita estuda daudaun. Tau marka ba informasaun neʼebé ita hakarak uza, no haree fali kuandu ramata.

Kuandu ita estuda informasaun neʼe, lee mós eskritura sira neʼebé temi iha laran. Haree oinsá mak eskritura ida-idak kona pontu importante iha parágrafu neʼe.

Kuandu ita estuda, karik ita sei hetan pontu neʼebé ita seidauk bele komprende ka ita hakarak atu buka-hatene liután. Duké husik ida-neʼe dada ita-nia atensaun, diʼak atu hakerek nota no buka informasaun liután kona-ba neʼe iha tempu seluk. Dala barak ideia neʼe sei sai klaru liután nuʼudar ita kontinua atu lee tanba ida-neʼe karik esplika iha parágrafu sira tuirmai. Se lae, ita bele halo riset liután. Entaun, buat saida deʼit mak ita bele hakerek hodi halo riset? Karik eskritura ida neʼebé ita la komprende. Ka karik ita la komprende oinsá eskritura neʼe liga ho informasaun neʼebé ita estuda daudaun. Karik ita sente katak ita komprende ideia ruma husi informasaun neʼe, maibé susar ba ita atu esplika fali ba ema seluk. Duké husik deʼit ida-neʼe, diʼak atu halo riset depois ita ramata tiha estuda.

Kuandu apóstolu Paulo hakerek karta ba ema ebreu kristaun, nia para uitoan iha klaran no dehan: “Ida-neʼe mak pontu importante.” (Ebreu 8:1) Dala ruma, ita mós fó-hanoin ba ita-nia an hanesan neʼe ka lae? Haree toʼok tansá Paulo halo ida-neʼe. Iha kapítulu balu antes neʼe, nia hatudu sai ona katak Kristu nuʼudar Maromak nia Amlulik Boot tama ona ba lalehan. (Ebreu 4:14–5:10; 6:20) Maibé, hodi temi fali pontu importante neʼe kuandu hahú kapítulu 8, Paulo prepara lee-naʼin nia neon atu hanoin didiʼak kona-ba oinsá mak ida-neʼe kona sira-nia moris. Nia fó sai ba sira katak Kristu hamriik ona iha Maromak nia oin tanba sira, no Kristu loke ona dalan ba sira atu tama ba “fatin santu”, katak lalehan. (Ebreu 9:24; 10:19-22) Hodi halo nuneʼe, Paulo hametin sira-nia esperansa, no ida-neʼe sei book sira atu halo tuir konsellu seluk iha Paulo nia karta neʼebé koʼalia kona-ba fiar, tahan susar, no hatudu hahalok nuʼudar ema kristaun. Nuneʼe mós, kuandu ita estuda no hanoin kona-ba pontu importante sira, ida-neʼe sei ajuda ita atu komprende oinsá mak informasaun sira-neʼe esplika kona-ba tema. No ida-neʼe mós sei halo ita komprende didiʼak tansá mak ita presiza halo tuir informasaun neʼe.

Kuandu ita estuda mesak, ida-neʼe book ita atu halo buat ruma ka lae? Neʼe mak pergunta neʼebé importante. Kuandu ita aprende buat ida, husu ba ita-nia an: ‘Oinsá mak informasaun neʼe kona haʼu-nia hahalok no haʼu-nia planu sira iha haʼu-nia moris? Oinsá mak haʼu bele halo tuir informasaun neʼe hodi rezolve problema ida, halo desizaun ruma, ka kumpre haʼu-nia planu? Oinsá mak haʼu bele uza ida-neʼe ho haʼu-nia família, ka iha serbisu haklaken, ka iha kongregasaun?’ Hanoin didiʼak pergunta sira-neʼe, no mós hanoin kleʼan kona-ba situasaun neʼebé ita bele uza informasaun neʼe iha ita-nia moris.

Depois estuda tiha kapítulu ida ka lisaun ida, uza tempu uitoan atu haree fali informasaun sira-neʼe. Haree toʼok se ita bele hanoin-hetan pontu importante sira no mós informasaun neʼebé apoia ida-neʼe. No ida-neʼe sei ajuda ita atu rai-hela informasaun hodi ita bele uza iha futuru.

Ita bele estuda informasaun saida

Nuʼudar Jeová nia povu, ita iha informasaun barak atu estuda. Maibé, ita sei hahú ho informasaun ida neʼebé? Loroloron, diʼak atu lee husi livru Buka-hatene Didiʼak Eskritura Loron-loron. Semana-semana, ita tuir reuniaun kongregasaun nian, entaun se ita estuda hodi prepara nanis, ida-neʼe sei ajuda ita atu hetan buat diʼak barak. Liután neʼe, ema balu uza tempu atu estuda tan ita-nia livru sira neʼebé halo ona antes sira tama lia-loos. Ema seluk hili parte balu husi kongregasaun nia programa atu lee Bíblia no halo riset didiʼak kona-ba versíkulu sira-neʼe.

Maibé, oinsá se ita-nia situasaun la husik ita atu estuda didiʼak informasaun hotu neʼebé ita uza iha reuniaun kongregasaun nian semana-semana? Diʼak atu la ansi hodi prepara liu deʼit informasaun tanba hakarak deʼit atu riska ita-nia livru. No buat neʼebé aat liu fali ida-neʼe mak se ita hanoin katak ita la iha tempu atu estuda informasaun hotu no tan neʼe ita sei la prepara buat ida. Duké halo ida-neʼe, diʼak atu hanoin kona-ba informasaun hira mak ita bele estuda, no prepara didiʼak informasaun neʼe. Halo ida-neʼe semana-semana. Nuʼudar tempu liu daudaun, diʼak atu aumenta tan tempu hodi estuda informasaun seluk neʼebé uza iha reuniaun sira.

“Ó tenke harii ó-nia umakain”

Jeová hatene katak família nia ulun tenke serbisu makaʼas atu hetan buat neʼebé família presiza. Provérbios (Amsal) 24:27 dehan: “Prepara bá ó-nia serbisu iha uma liʼur, no halo buat hotu sai prontu iha ó-nia toʼos.” Maibé, ita mós keta haluha katak ita-nia família presiza buat espirituál nian. Tan neʼe, versíkulu neʼe kontinua tan hodi dehan: “Depois neʼe ó tenke harii ó-nia umakain.” Oinsá mak família nia ulun bele halo ida-neʼe? Provérbios (Amsal) 24:3 dehan: “Liuhusi matenek mak . . . umakain ida sei hamriik metin.”

Oinsá mak matenek bele ajuda ita-nia família? Hodi uza matenek ita bele hatene buat neʼebé ita-nia família hanoin iha laran, laʼós deʼit atu haree buat neʼebé iha liʼur. Entaun, ita bele dehan katak hodi estuda família nian hetan susesu, ulukliu ita tenke estuda situasaun família nian. Oinsá ita-nia família nia relasaun ho Maromak? Rona didiʼak kuandu ita koʼalia ho sira. Sira rai odi no muramura ka lae? Ka ita-nia família hanoin liu kona-ba buka sasán ka lae? Kuandu ita haklaken hamutuk ho ita-nia oan, sira moe atu fó sai ba sira-nia kolega katak sira mak Testemuña ba Jeová ka lae? Sira kontente atu tuir família nia programa atu lee no estuda Bíblia ka lae? Sira hakaʼas an atu halo tuir didiʼak Jeová nia dalan sira iha sira-nia moris ka lae? Hodi haree didiʼak ita-nia família nia situasaun, ida-neʼe sei ajuda ita nuʼudar família nia ulun atu hatene saida mak ita tenke halo atu ajuda ema ida-idak iha ita-nia família laran atu haburas hahalok kristaun nian.

Buka informasaun iha Livru Haklaken no Matan-moris bá! neʼebé bele ajuda duni ita-nia família. Tuirmai, fó-hatene nanis ba ita-nia família kona-ba saida mak ita sei estuda, hodi nuneʼe sira bele prepara ba informasaun neʼe. Diʼak atu halaʼo estuda neʼe ho domin. Ita labele hamoe ka hatún ema ida iha família laran, maibé diʼak liu atu hatudu sai tansá informasaun neʼe iha folin-boot, no hatudu mós oinsá mak família bele halo tuir. Hakaʼas an atu ajuda família hotu envolve an. Ajuda família ida-idak atu haree oinsá Jeová nia Liafuan mak “perfeitu” hodi fó buat neʼebé ita presiza iha ita-nia moris.—Salmo (Mazmur) 19:7.

Hetan bensaun hodi estuda

Ema neʼebé la hatene Maromak bele aprende kona-ba buat oioin neʼebé iha lalehan no rai, kona-ba situasaun mundu neʼe nian, no mós kona-ba ita ema. Maski nuneʼe, sira la bele komprende buat neʼebé sira aprende neʼe katak sá. Iha parte seluk, ho ajuda husi Maromak nia espíritu santu, ema neʼebé estuda Maromak nia Liafuan beibeik bele komprende katak Maromak kria buat hotu. Sira mós komprende oinsá liafuan iha Bíblia sai loos, no hatene oinsá Maromak kumpre ninia hakarak ba ema sira neʼebé laran-metin.—Marcos 13:4-29; Roma 1:20; Apokalipse 12:12.

Maski ita simu matenek neʼebé mak furak loos, maibé ita labele sai gaba an demais kona-ba neʼe. Tuir loloos, nuʼudar ita kontinua buka-hatene Maromak nia Liafuan loroloron, neʼe sei ajuda ita atu nafatin hatudu haraik-an. (Deuteronômio [Ulangan] 17:18-20) Ida-neʼe mós sei proteje ita husi “sala nia kbiit atu lohi”, tanba bainhira Maromak nia Liafuan moris iha ita-nia laran, hakarak sala nian la iha kbiit atu manán ita. (Ebreu 2:1; 3:13; Koloso 3:5-10) Ho ida-neʼe, ita sei ‘laʼo ho loloos iha Jeová nia oin toʼo halo kontente nia iha dalan neʼebé kompletu. No ita bele kontinua fó fuan iha serbisu diʼak oioin’. (Koloso 1:10) No ida-neʼe mak ita-nia objetivu atu estuda Maromak nia Liafuan, no hodi halo tuir ida-neʼe mak ita hetan kolen neʼebé diʼak liu hotu.