Hatene oinsá atu hatán

ITA bele kompara pergunta balu hanesan ho jelu-fatuk iha tasi. Iha tasi nia leten jelu-fatuk neʼe haree hanesan kiʼik maibé iha okos mak boot liu. Nuneʼe mós buat neʼebé book ema atu husu pergunta ruma mak importante liu fali pergunta neʼe rasik.

Maski ema neʼebé husu pergunta hakarak tebes atu hetan resposta, maibé se ita hatene oinsá atu hatán, ita sei uza matenek hodi hanoin kona-ba informasaun hira mak ita tenke fó sai no dalan oinsá mak ita sei hatán ba pergunta neʼe. (João 16:12) Hanesan Jesus hatudu sai iha ninia resposta ba nia dixípulu sira, dala ruma ema balu mós husu informasaun neʼebé sira la iha direitu atu hatene ka sei la ajuda sira.—Apóstolu 1:6, 7.

Bíblia fó konsellu ba ita hodi dehan: “Sempre koʼalia ho laran-diʼak hodi tau masin uitoan atu imi bele hatene oinsá imi tenke hatán ba ema ida-idak.” (Koloso 4:6) Tan neʼe, antes ita hatán, ita presiza hanoin kona-ba saida mak ita sei fó sai no dalan oinsá mak ita sei esplika informasaun neʼe.

Hatene ema neʼebé husu pergunta neʼe nia hanoin

Ema saduseu sira koko atu lasu Jesus hodi husu nia kona-ba moris-hiʼas ba feto ida neʼebé kaben ona ba dala balu. Maibé, Jesus hatene ho loloos katak ema sira-neʼe la iha fiar kona-ba moris-hiʼas. Entaun, Jesus hatán sira-nia pergunta iha dalan neʼebé bele hadiʼa mós sira-nia hanoin sala. Hodi uza eskritura neʼebé sira hatene ona, Jesus hatudu sai buat neʼebé sira seidauk hanoin uluk. Nia hatudu prova katak Maromak sei halo ema moris-hiʼas duni. Ninia resposta halo ninia inimigu sira hakfodak toʼo sira la brani tan atu husu pergunta ba nia.—Lucas 20:27-40.

Atu hatene oinsá ita sei hatán ba pergunta ruma, ita mós tenke hatene ema neʼebé husu pergunta neʼe nia hanoin. Porezemplu, ita-nia kolega eskola ka kolega serbisu karik husu ita kona-ba tansá ita la selebra Natál. Entaun, hanoin toʼok kona-ba tansá nia husu pergunta neʼe? Nia hakarak duni atu hatene resposta neʼebé loos, ka nia hanoin deʼit se ita-nia relijiaun bandu ita atu tuir festa sira? Atu hatene kona-ba neʼe, karik ita presiza husu nia tansá mak nia husu pergunta neʼe, no fó resposta tuir buat neʼebé ita rona husi nia. Ita mós bele uza oportunidade neʼe hodi hatudu kona-ba oinsá mak halo tuir Bíblia nia matadalan bele proteje ita husi estrese no debe boot tanba selebra loron-boot neʼe.

Hanoin toʼok se ema konvida ita atu koʼalia kona-ba Testemuña ba Jeová iha estudante sira-nia oin. Depois ita koʼalia tiha, karik sira sei husu pergunta barak. Entaun, se ema husu pergunta neʼe ho laran-moos no simples, karik diʼak atu fó resposta neʼebé simples no kona duni ninia pergunta. No se pergunta neʼe hatudu sai kona-ba hanoin sala neʼebé komunidade iha kona-ba ita, karik buat neʼebé diʼak mak hahú ita-nia resposta hodi esplika uitoan kona-ba tansá ema balu iha hanoin neʼebé sala no tansá Testemuña ba Jeová hili atu halo tuir ho loloos Bíblia nia matadalan sira. Dala barak, diʼak liu atu la haree pergunta sira-neʼe hanesan sadik, maski dalan neʼebé sira husu pergunta neʼe mak rona hanesan sadik ida. Ita-nia resposta bele fó oportunidade ba rona-naʼin atu iha hanoin neʼebé luan, atu fó sai informasaun neʼebé loos, no atu esplika razaun husi eskritura kona-ba ita-nia fiar.

Oinsá mak ita bele koʼalia ho patraun neʼebé lakohi atu fó lisensa ba ita hodi tuir reuniaun boot? Ulukliu, haree situasaun neʼe tuir ninia hanoin. Karik hodi serbisu liu oras iha tempu seluk bele ajuda ka lae? Se ita esplika ba nia katak hanorin neʼebé ita simu iha reuniaun boot neʼe sei ajuda ita atu hatudu laran-moos no sai serbisu-naʼin neʼebé diʼak, ida-neʼe sei hadiʼa situasaun ka lae? Se ita hatudu katak ita hanoin buat neʼebé nia sente, karik nia mós sei hanoin kona-ba saida mak importante ba ita. Maibé oinsá se nia hakarak atu ita halo buat neʼebé la loos? Karik la sala atu esplika tansá ita lakohi halo ida-neʼe hodi uza Eskritura nuʼudar hun ba ita-nia desizaun. Maibé karik buat neʼebé diʼak liu atu halo mak hodi troka hanoin ho nia no esplika katak se ema ida prontu atu bosok ka naʼok ba nia, sira mós sei bosok nia no naʼok husi nia.

Iha parte seluk, karik ita mak alunu ida neʼebé lakohi hola parte iha atividade eskola nian neʼebé kontra Bíblia nia matadalan. Maibé, hanoin-hetan katak mestre sira iha hanoin la hanesan ho ita-nian, no sira iha knaar atu halo buat hotu ho loloos iha klase laran. Entaun, susar sira neʼebé ita hasoru mak (1) atu hatudu respeitu ba mestre nia hanoin, (2) atu esplika kona-ba ita-nia desizaun iha dalan neʼebé respeitu, no (3) atu kaer metin ba buat neʼebé ita hatene katak sei halo Jeová kontente. Dala ruma, atu hetan rezultadu diʼak, la toʼo atu fó deʼit resposta neʼebé simples kona-ba ita-nia fiar. (Provérbios [Amsal] 15:28) Se ita mak joven, karik ita-nia inan ka aman sei ajuda ita atu prepara buat ruma atu koʼalia.

Dala ruma, ita presiza aten-brani hodi hatán ba ukun-naʼin neʼebé duun sala ita. Karik polísia, ema-boot iha governu, ka juis sira hakarak atu ita hatán ba sira-nia pergunta kona-ba kontra lei sira, ka kona-ba ita-nia pozisaun neutrál nuʼudar ema kristaun, ka kona-ba ita-nia hanoin atu la hola parte iha loron-boot nasaun nian. Entaun, oinsá mak ita sei hatán? Bíblia dehan: “Halo ida-neʼe ho laran-maus no respeitu.” (1 Pedro 3:15) No mós, ita presiza husu ba ita-nia an rasik kona-ba tansá mak sira hanoin barak kona-ba neʼe, no tuirmai, ho respeitu hatudu katak ita komprende sira-nia hanoin neʼe. Maibé, saida tan mak ita bele halo? Apóstolu Paulo temi kona-ba protesaun neʼebé nia bele hetan husi lei Roma nian, entaun ita mós bele hatudu kona-ba lei neʼebé kona ita-nia situasaun neʼe. (Apóstolu 22:25-29) Ita bele esplika kona-ba desizaun husi ema kristaun iha tempu uluk no mós husi Testemuña ba Jeová iha mundu tomak, karik ida-neʼe sei halo luan liután ukun-naʼin sira-nia hanoin. Ka karik ita mós bele esplika katak hodi halo tuir Maromak nia ukun, ida-neʼe bele book ita atu halo tuir didiʼak ema nia lei sira. (Roma 13:1-14) Se ita halo ida-neʼe, karik ukun-naʼin sira-neʼe sei simu kuandu ita hatudu eskritura neʼebé sai nuʼudar hun ba ita-nia desizaun.

Saida mak sira-nia hanoin kona-ba Bíblia

Kuandu ita halo desizaun kona-ba oinsá atu hatán pergunta sira, ita mós presiza haree saida mak ema neʼe nia hanoin kona-ba Eskritura Sagrada. Jesus halo ida-neʼe kuandu nia hatán ba ema saduseu sira neʼebé husu kona-ba moris-hiʼas. Jesus hatene katak sira simu deʼit livru neʼebé Moisés hakerek, tan neʼe Jesus troka hanoin ho sira hodi uza istória iha livru sira-neʼe nia laran, no nia hahú ninia resposta hodi dehan: “Kona-ba moris-hiʼas husi mate, Moisés rasik hatudu ona ida-neʼe.” (Lucas 20:37) Entaun, karik ita mós bele hetan susesu hodi temi liafuan balu husi Bíblia neʼebé ita-nia rona-naʼin simu no hatene ho didiʼak.

Oinsá se ita-nia rona-naʼin la fiar Bíblia? Haree toʼok saida mak apóstolu Paulo halo iha ninia diskursu iha Areópago hanesan hakerek iha Apóstolu 17:22-31. Nia fahe lia-loos husi Eskritura maski la lee kedas husi Bíblia. Entaun, se ita iha oportunidade, ita mós bele halo hanesan neʼe. Iha rai balu, ita presiza koʼalia ho ema ida ba dala balu mak foin bele lee liafuan ruma husi Bíblia. Kuandu ita komesa uza Bíblia, karik diʼak atu hahú uluk hodi fó sai razaun kona-ba tansá mak diʼak atu haree husi Bíblia duké dehan deʼit katak neʼe mak Maromak nia Liafuan. Maibé, ita-nia objetivu mak atu fó sasin ho loloos kona-ba Maromak nia hakarak, no ikusmai ajuda ita-nia rona-naʼin atu haree rasik saida mak Bíblia hatete. Bíblia bele ajuda duni ema atu fiar duké ita-nia liafuan rasik.—Ebreu 4:12.

“Sempre koʼalia ho laran-diʼak”

Tanba Jeová mak Maromak neʼebé laran-diʼak, ninia atan sira mós tenke hakaʼas an atu “sempre koʼalia ho laran-diʼak hodi tau masin uitoan”. (Koloso 4:6; Êxodo [Keluaran] 34:6) Neʼe katak ita tenke hakaʼas an atu koʼalia ho respeitu, maski dala ruma ita sente katak ema neʼe la merese atu ita koʼalia ba nia ho respeitu. Sin, ita-nia koʼalia labele makaʼas liu ka la respeitu, maibé tenke sai nuʼudar buat neʼebé diʼak atu rona.

Ema barak hasoru susar boot, no loroloron ema koʼalia aat sira. Tan neʼe, kuandu ita hasoru ema hanesan neʼe, karik sira sei koʼalia makaʼas mai ita. Entaun, ita sei hatán oinsá? Bíblia dehan: “Resposta neʼebé mamar, hasees hirus.” Hodi koʼalia iha dalan neʼebé mamar, ida-neʼe bele halo kalma ema neʼebé iha hanoin la hanesan ho ita-nian. (Provérbios [Amsal] 15:1; 25:15) Tuir loloos, ema barak hetan susar loroloron, entaun ita-nia hahalok diʼak no lian neʼebé hatudu laran-diʼak bele kona sira-nia laran no karik book sira atu rona ba liafuan diʼak neʼebé ita lori.

Ita lakohi atu haksesuk malu ho ema neʼebé la hatudu respeitu ba lia-loos. Maibé, ita-nia hakarak mak atu esplika Eskritura ho didiʼak ba ema neʼebé fó tempu ba ita atu halo ida-neʼe. Iha situasaun naran deʼit, diʼak atu hanoin-hetan nafatin katak ita presiza hatán ho laran-diʼak no koʼalia ho fiar metin katak Maromak nia promete furak sira sei sai loos.—1 Tesalónika 1:5.

Desizaun neʼebé ema ida-idak tenke halo

Kuandu estudante Bíblia ka maluk kristaun ida husu kona-ba saida mak nia presiza halo iha situasaun ruma, oinsá mak ita tenke hatán? Karik ita hatene saida mak ita rasik sei halo. Maibé, ema ida-idak tenke lori ninia todan rasik kona-ba desizaun neʼebé nia halo iha ninia moris. (Galásia 6:5) Apóstolu Paulo esplika katak nia fó laran-manas ba ema neʼebé nia haklaken bá atu “halo tuir” tanba fiar. (Roma 16:26) Neʼe mak ezemplu neʼebé diʼak tebes ba ita atu banati-tuir. Ema neʼebé halo desizaun ruma tanba deʼit hakarak halo kontente ema neʼebé hanorin Bíblia ba nia ka hakarak halo kontente ema seluk, neʼe katak nia serbí deʼit ema, no la moris tuir fiar. (Galásia 1:10) Entaun, maski ita fó resposta neʼebé simples, no kona duni ema neʼe nia pergunta, maibé karik neʼe ladún lori buat diʼak ba nia.

Entaun, oinsá mak ita bele hatán iha dalan neʼebé tuir Bíblia nia matadalan? Karik ita bele book ema neʼe hodi hanoin kona-ba matadalan ruma no ezemplu ruma neʼebé hakerek iha Bíblia laran. Iha situasaun balu, karik ita bele hatudu ba nia kona-ba oinsá nia rasik bele halo riset hodi hetan matadalan no ezemplu sira. Ita mós bele koʼalia kona-ba matadalan sira-neʼe no tansá ezemplu sira-neʼe mak diʼak, maibé labele hatudu ba nia oinsá nia tenke halo tuir ida-neʼe iha ninia moris. Husu ema neʼe kona-ba saida mak nia haree husi informasaun neʼe neʼebé bele ajuda nia atu halo desizaun neʼebé matenek. Fó laran-manas ba nia hodi hanoin kona-ba matadalan no ezemplu sira-neʼe atu hatene kona-ba dalan neʼebé halo Jeová kontente. Ho ida-neʼe, ita ajuda ema atu “treinu sira-nia kbiit neʼe atu hatene buat diʼak husi buat aat”.—Ebreu 5:14.

Fó komentáriu iha reuniaun kongregasaun nian

Dala barak reuniaun sira fó ita oportunidade atu fó sai ita-nia fiar iha ema nia oin. Dalan ida atu ita halo ida-neʼe mak hodi fó komentáriu. Oinsá mak ita fó komentáriu? Ita hakarak fó komentáriu neʼebé fó hahiʼi ba Maromak Jeová. Neʼe mak buat neʼebé David halo kuandu nia iha ema-lubun boot nia leet. (Salmo [Mazmur] 26:12) Ita mós tenke fó komentáriu neʼebé fó laran-manas ba maluk fiar-naʼin, no book sira atu “hatudu domin no hahalok diʼak” hodi tuir apóstolu Paulo nia konsellu. (Ebreu 10:23-25) No hodi prepara nanis lisaun atu estuda bele ajuda ita atu halo nuneʼe.

Kuandu ita fó komentáriu, diʼak atu koʼalia iha dalan neʼebé simples, moos, no badak. Keta fó komentáriu kona-ba parágrafu tomak. Koʼalia deʼit kona-ba pontu ida. Se ita fó komentáriu kona-ba parte ida deʼit, ida-neʼe sei fó oportunidade ba ema seluk atu aumenta tan informasaun ruma. Diʼak atu temi eskritura sira neʼebé hakerek iha lisaun neʼe nia laran. Kuandu ita koʼalia kona-ba eskritura ida, hakaʼas an atu fó sai pontu iha eskritura neʼebé liga ho informasaun neʼebé ita estuda daudaun. Aprende atu fó komentáriu ho ita-nia liafuan rasik duké lee deʼit husi parágrafu. Keta sai laran-tun se ita-nia komentáriu ladún loos. Dala ruma neʼe akontese ba ita hotu kuandu ita fó komentáriu.

Klaru katak hatene oinsá atu hatán iha dalan neʼebé diʼak laʼós deʼit katak hatene ninia resposta. Ita presiza atu hatudu matenek. Maibé ita sei sente kontente tebes kuandu ita fó resposta husi ita-nia laran no neʼebé book ema seluk nia laran.—Provérbios (Amsal) 15:23.