Fó laran-manas no hametin ema

MAROMAK nia atan hotu hasoru problema oioin, entaun sira presiza hetan laran-manas husi kongregasaun. Tan neʼe, importante duni ba katuas kongregasaun sira atu tau atensaun ba sira-nia diskursu ka konsellu atu bele hametin ema. Katuas sira tenke sai “hanesan subar-fatin husi anin no fatin seguru husi udan boot, hanesan bee neʼebé suli iha rai-maran, hanesan fatuk boot nia mahon iha rai neʼebé maran”.—Isaías (Yesaya) 32:2.

Se ita mak katuas ida, ita-nia diskursu halo ema sente kmaan ka lae? Ita-nia diskursu fó kbiit ba ema hodi serbí Jeová ho laran-metin ka lae? Diskursu sira-neʼe fó forsa ba ema atu kontinua halo Maromak nia hakarak maski ema seluk la simu ka kontra sira ka lae? Oinsá se rona-naʼin balu laran-tun hela tanba hasoru daudaun problema ekonomia nian, ka luta hela ho moras todan ruma? Ita bele ‘fó kbiit ba maun-alin sira ho liafuan husi ita-nia ibun’.—Jó (Ayub) 16:5.

Nuʼudar diskursu-naʼin, uza oportunidade neʼe atu ajuda maluk kristaun sira atu hetan esperansa no forsa husi Jeová no husi buat sira neʼebé nia fó mai ita.—Roma 15:13; Éfeso 6:10.

Hanoin-hetan buat neʼebé Jeová halo ona. Dalan importante ida atu fó laran-manas ba ema mak hodi ajuda sira haree oinsá Jeová ajuda ninia povu kuandu sira hasoru susar iha tempu uluk.—Roma 15:4.

Antes ema Izraél tama ba rai neʼebé Maromak promete, Jeová haruka Moisés hodi fó “aten-brani” no “forsa” ba Josué. Iha tempu neʼebá ema Izraél nia inimigu sira mak hela iha rai neʼe. Entaun, oinsá mak Moisés fó aten-brani? Iha Josué nia oin, Moisés fó-hanoin fali ba ema Izraél hotu buat neʼebé Jeová halo ba sira bainhira sira sai husi rai-Ejitu. (Deuteronômio [Ulangan] 3:28; 7:18) Moisés mós konta fali oinsá Jeová ajuda sira hodi manán ema Amori. Depois neʼe Moisés hatete ba Josué: “Sai aten-brani no forsa bá.” (Deuteronômio [Ulangan] 31:1-8) Tan neʼe, bainhira ita hakarak atu fó laran-manas ba maluk kristaun sira, diʼak mós atu ita fó-hanoin fali buat neʼebé Jeová halo ona ba sira, loos ka lae?

Dala ruma, ema balu hasoru problema boot tebes toʼo sira duvida katak sira sei simu bensaun husi Maromak nia Ukun. Fó-hanoin ba sira katak Jeová sempre kumpre buat neʼebé nia promete ona.—Josué (Yosua) 23:14.

Iha rai balu, governu bandu ita-nia maluk sira atu labele haklaken. Iha situasaun hanesan neʼe, katuas sira bele koʼalia ho laran-diʼak hodi uza ezemplu husi Jesus nia apóstolu sira atu ajuda maluk fiar-naʼin sira hetan laran-manas. (Apóstolu 4:1–5:42) No sira mós bele konta istória husi livru Ester hodi fó aten-brani ba sira tanba neʼe hatudu oinsá Maromak bele duni ajuda ninia povu.

Dala ruma iha ema balu neʼebé tuir reuniaun sira maibé la laʼo ba oin. Karik sira sente Maromak sei la perdua sala boot neʼebé uluk sira halo. Entaun, karik ita bele konta fali oinsá Jeová fó perdua ba Liurai Manase. (2 Crônicas [Tawarikh] 33:1-16) Ka ita bele esplika kona-ba ema iha sidade Korinto iha tempu antigu neʼebé troka sira-nia moris hodi sai ema kristaun, no ikusmai Maromak haree sira nuʼudar ema loos.—1 Korinto 6:9-11.

Karik ema balu hasoru daudaun susar barak no sente katak Maromak la simu tan sira. Se nuneʼe, ita bele fó-hanoin fali sira kona-ba Job nia esperiénsia no oinsá Maromak fó bensaun boot ba nia tanba ninia laran-metin. (Jó [Ayub] 1:1-22; 10:1; 42:12, 13; Salmo [Mazmur] 34:19) Job nia kolega falsu sira duun matak katak nia halo sala boot ruma. (Jó [Ayub] 4:7, 8; 8:5, 6) Neʼe la hanesan duni ho Paulo no Barnabé neʼebé hametin no ‘fó laran-manas ba dixípulu sira atu laran-metin nafatin’, hodi dehan: “Ita tenke tama ba Maromak nia Ukun liuhusi susar barak.” (Apóstolu 14:21, 22) Hanesan neʼe mós ho ohin loron, ita bele hametin ema neʼebé hasoru susar daudaun hodi esplika katak ema kristaun hotu presiza hatudu laran-metin ba Jeová bainhira hasoru susar, no Jeová hafolin tebes ema hanesan neʼe.—Provérbios (Amsal) 27:11; Mateus 24:13; Roma 5:3, 4; 2 Timóteo 3:12.

Ajuda rona-naʼin atu hanoin fali kona-ba oinsá Jeová kumpre ona ninia promete iha sira-nia moris rasik. Hodi halo nuneʼe, karik sira bele haree rasik oinsá Jeová ajuda duni sira hanesan nia promete ona. Salmo (Mazmur) 32:8 hatete: “Haʼu sei halo ó sai matenek no hanorin ó kona-ba dalan neʼebé ó tenke tuir. Haʼu sei fó konsellu hodi tau matan ba ó.” Kuandu ita ajuda rona-naʼin atu hanoin kona-ba oinsá mak Jeová fó matadalan ka hametin sira, neʼe bele ajuda sira atu haree rasik katak Jeová hadomi tebes sira no nia sei ajuda sira hodi tahan hasoru susar naran deʼit neʼebé sira hasoru daudaun.—Isaías (Yesaya) 41:10, 13; 1 Pedro 5:7.

Hafolin buat neʼebé Maromak halo daudaun. Bainhira ita hakarak fó laran-manas ba maluk kristaun sira, diʼak atu ajuda sira haree ba buat neʼebé Jeová halo daudaun. Se ita koʼalia ho laran-manas kona-ba buat sira-neʼe, ida-neʼe mós bele halo sira sente laran-manas.

Hanoin kona-ba oinsá Jeová ajuda ita atu tahan hasoru susar oioin. Nia hatudu mai ita dalan neʼebé diʼak liu atu moris. (Isaías [Yesaya] 30:21) Nia esplika tanbasá mak iha krime, kiak, moras, mate no la iha justisa. Jeová mós esplika oinsá mak nia sei halakon buat sira-neʼe. Nia fó ba ita irmaun-irmán sira neʼebé hadomi ita. Nia fó ita prezente furak, neʼe mak koʼalia ho nia liuhusi orasaun. Nia fó fiar ba ita atu reprezenta nia nuʼudar ninia Testemuña sira. Jeová mós ajuda ita atu komprende katak Kristu sai ona liurai iha lalehan no katak mundu nia loron ikus sira besik loos ona atu ramata.—Apokalipse 12:1-12.

Liután neʼe, nia fó ba ita reuniaun sira. Se ita koʼalia kona-ba Jeová nia prezente furak sira-neʼe ho laran-manas no hatudu katak ita hafolin tebes reuniaun sira, ita sei ajuda duni ema atu hakarak halibur hamutuk ho maluk kristaun sira.—Ebreu 10:23-25.

Esperiénsia sira neʼebé hatudu katak Jeová fó duni bensaun ba serbisu haklaken mós bele fó laran-manas ba ema seluk. Iha tempu uluk, bainhira Paulo no Barnabé laʼo ba Jeruzalein, sira “lori ksolok ba maun-alin sira hotu” hodi konta kona-ba oinsá mak ema husi nasaun seluk sai fiar-naʼin. (Apóstolu 15:3) Ita mós bele fó ksolok ba irmaun-irmán sira hodi konta esperiénsia furak ba sira.

Ita bele fó laran-manas ba ema seluk hodi ajuda sira haree katak buat neʼebé sira halo daudaun mak folin-boot. Gaba sira tanba sira hola parte atu haklaken. No mós gaba ema sira neʼebé kontinua laran-metin atu haklaken maski idade ona ka saúde ladún diʼak. Fó-hanoin ba sira katak Jeová nunka haluha domin neʼebé sira hatudu ba ninia naran. (Ebreu 6:10) Tuir loloos, fiar neʼebé koko tiha ona liuhusi susar sira mak folin-boot tebes. (1 Pedro 1:6, 7) Ita-nia irmaun-irmán sira presiza hatene kona-ba neʼe.

Koʼalia husi laran kona-ba esperansa ba futuru. Maromak nia promete kona-ba futuru fó kmaan no esperansa ba ema neʼebé hadomi Maromak. Karik ema balu rona beibeik ona liafuan sira-neʼe. Maibé kuandu ita-nia liafuan hatudu katak ita hafolin promete sira-neʼe, ida-neʼe bele halo promete sira-neʼe sai moris liu, no halo sira fiar katak buat sira-neʼe sei sai loos, no mós book sira atu fó-agradese ba Maromak. Hodi halo tuir matadalan sira neʼebé ita aprende iha Eskola Serbisu Kristaun nian bele ajuda ita atu halo ida-neʼe.

Jeová mak hatudu ezemplu diʼak liu hotu kona-ba fó laran-manas no hametin ninia povu. Maibé, ita mós bele apoia nia hodi bele fó laran-manas no hametin ema seluk. Bainhira ita hatoʼo diskursu iha kongregasaun, uza didiʼak ita-nia oportunidade atu halo ida-neʼe.