Terus hotu Besik ona atu Ramata!

Iha Ita-nia moris, karik Ita hanoin ona: “Tansá mak iha terus barak?” Iha tinan rihun ba rihun nia laran ema iha Rai hetan terus barak husi funu, kiak, dezastre, krime, la iha justisa, moras, no mate. Husi tinan atus ida liubá toʼo agora ema hetan terus barak liu fali buat ema uluk hetan. Terus neʼe sei ramata ka lae?

Resposta neʼebé fó-ksolok maka sin, no lakleur tan sei ramata! Maromak nia Liafuan, Bíblia, fó-hatene: “Ema aat sei la iha tan . . . Maibé ema neʼebé maus sei hetan Rai, no sira sei haksolok duni tanba iha dame barak.” Ba tempu hira? “Ema loos rasik sei simu Rai, no sira sei moris ba nafatin iha neʼebá.”—Salmo[Mazmur] 37:10, 11, 29.

Depois Maromak halakon buat aat no terus maka Rai sei sai paraízu ida. Iha tempu neʼebá mak ema sei bele moris rohan-laek ho saúde perfeita no haksolok. Maromak nia Liafuan hateten nanis: “[Maromak] sei hamaran sira nia mataben housi sira nia matan; mate la iha ona, no ema sei la tanis tan eh laran susar, basa sasan raiklaran uluk nian liu tiha ona.”—Apokalipse[Wahyu] 21:​4.

Iha mundu foun neʼe, ema mate mós sei moris fali atu hetan bensaun hirak-neʼe: “Haʼu iha esperansa iha Maromak hanesan sira nian katak ema diak no ema aat sei moris hiʼas.” (Apostolu[Kisah] 24:15) Tanba ida-neʼe maka Jesus bele hateten ba ema aat ida, neʼebé arrepende an no tau fiar ba nia: “O sei hamutuk ho haʼu iha Paraízu.”—Lucas 23:43 NW.a

Tansá maka terus mosu?

Se Maromak hakarak ema iha Rai atu hetan futuru furak ida hanesan neʼe, tansá maka nia husik terus atu mosu? Tansá maka nia husik ida-neʼe kleur?

Kuandu Maromak kria Adão no Eva, Nia halo sira ho isin no neon perfeitu. Nia tau sira iha jardín Paraízu no fó ba sira serbisu neʼebé halo sira sente kontente. Bíblia hateten: “Maromak haree ba buat hotu neʼebé nia halo ona, no haree! neʼe diʼak duni.” (Gênesis[Kejadian] 1:​31) Se sira uluk halo tuir Maromak, sira bele iha oan sira neʼebé perfeitu, no Rai tomak bele sai paraízu ida deʼit, iha-neʼebé ema bele moris rohan-laek ho dame no ksolok.

Maromak tau iha Adão no Eva nia laran liberdade atu hili. Kbiit furak neʼe maka parte husi ema nia laran. Sira laʼós hanesan robó neʼebé la iha hanoin. Maibé, atu sira bele hetan ksolok nafatin depende ba sira atu uza sira-nia liberdade atu hili iha dalan loos: halo tuir Maromak nia lei sira. Maromak hateten: “Haʼu, Jeová, mak ó-nia Maromak, Ida neʼebé hanorin ó atu hetan buat diʼak ba ó-nia an, Ida neʼebé halo ó laʼo iha dalan neʼebé ó tenke laʼo.” (Isaías 48:17) Uza sala liberdade atu hili sei halo dezastre boot mosu, tanba Maromak la kria ema atu iha susesu iha sira-nia moris se sira ketak husi Nia. Bíblia hateten: “Ema iha Rai la iha kbiit atu hili nia dalan. Ema neʼebé laʼo mós la iha kbiit atu dirije ninia hakat.”—Jeremias 10:23.

Buat triste mak ita-nia inan-aman primeiru hanoin katak sira bele ukun an rasik ketak husi Maromak no hetan susesu nafatin. Maibé, kuandu sira sai husi Maromak nia ukun okos, sira lakon moris nuʼudar ema perfeitu. Tan neʼe, neineik-neineik sira-nia isin-lolon sai aat toʼo ikusliu sira sai ferik-katuas no mate. Tanba ita maka sira-nia oan, ita simu nuʼudar liman-rohan buat la perfeitu no mate.—Roma 5:​12.

Direitu atu ukun maka kestaun prinsipál

Tansá maka Maromak la halakon Adão no Eva no komesa foun fali ho kaben-naʼin seluk? Tanba hasaʼe tiha dúvida kona-ba Maromak nia pozisaun nuʼudar Aas Liu iha lalehan no Rai, katak ninia direitu atu ukun. Kestaun maka: Sé mak iha direitu atu ukun, no ukun sé-nian maka loos? Mós, ema iha Rai bele hetan buat diʼak liu ka lae se Maromak la ukun sira? Hodi fó tempu ba ema atu ukun an ho liberdade atu tuir sira-nia hakarak deʼit, Maromak sei hatudu momoos se sira bele moris diʼak liu iha ninia ukun okos ka iha ema nian rasik. Tempu tenke toʼo para ema iha Rai bele koko sistema polítiku, sosiál, ekonómiku, no relijiozu hotu ketak husi Maromak nia ukun.

Rezultadu saida maka mosu? Ema nia istória iha tinan rihun ba rihun nia laran hatudu katak terus aumenta ba beibeik. Iha tinan atus ida liubá nia laran, ema hetan susar aat liu fali tempu uluk. Ema rihun ba rihun oho-mate iha funu rua iha mundu tomak. Ema 100.000.000 liu mate iha funu sira. Iha krime no violénsia iha fatin hotu. Abuza droga mosu iha mundu tomak. Moras neʼebé hadaʼet tanba relasaun seksuál kontinua atu habelar iha fatin hotu. Ema rihun ba rihun mate kada tinan tanba hamlaha no moras. Moris família nian no morál naksobu iha fatin hotu. La iha governu ema nian neʼebé bele rezolve problema sira-neʼe. La iha governu ida neʼebé bele halakon idade tuan, moras, no mate.

Ema nia situasaun hanesan deʼit buat neʼebé Bíblia hateten nanis kona-ba ita-nia tempu. Maromak nia Liafuan hatudu katak agora maka mundu neʼe nia “loron ikus sira”, iha neʼebé ‘susar barak mosu mai’. No hanesan Bíblia hateten, ‘ema aat no bosokten sira laʼo housi aat ba aat liu’.—2 Timoteo 3:​1-5, 13.

Terus besik ona atu ramata

Buat hotu neʼebé mosu iha mundu hatudu katak situasaun triste neʼebé ita hetan daudaun neʼe, tanba ema hakarak independénsia husi Maromak, besik atu ramata. Ita bele haree klaru tebes katak ema nia ukun ketak husi Maromak nunka sai diʼak. Maromak nia ukun deʼit maka bele lori dame, ksolok, saúde perfeita, no moris rohan-laek. Tan neʼe, tempu neʼebé Maromak fó atu husik buat aat no terus, besik ona atu ramata. Lakleur tan Maromak sei sobu sistema hotu neʼe neʼebé la bele halo buat diʼak ida ba ema.

Profesia husi Bíblia hateten: “Iha liurai sira-neʼe nia tempu [ema neʼebé ukun daudaun] Maromak husi lalehan sei harii reinu ida [iha lalehan] neʼebé nunka sei naksobu. . . . Reinu neʼe sei harahun no halo ramata reinu sira-neʼe hotu [governu agora nian], no sei hamriik ba tempu sura la bele.” (Daniel 2:​44) Buat neʼebé prinsipál iha Bíblia nia hanorin mak atu defende Jeová nuʼudar Maromak Aas Liu, no nia direitu atu ukun, liuhusi nia Reinu lalehan nian. Kuandu Jesus fó-hatene nanis buat importante ida husi sinál ba “loron ikus sira”, nia hateten: “Lia foun reinu nian neʼe sei haklaken iha mundu tomak hodi fo sasin ba povu hotu. Iha oras neʼe sei toʼo mai buat hotu nia rohan.”—Mateus 24:14.

Bainhira rohan mai, sé maka sei moris? Bíblia hatán: “Ema loos maka sira neʼebé sei moris iha Rai, no sira neʼebé la iha sala maka sira neʼebé sei hela iha neʼebá. Maibé, kona-ba ema aat, sira sei lakon tiha husi Rai duni.” (Provérbios[Amsal] 2:​21, 22) Ema loos maka sira neʼebé aprende Jeová nia hakarak no halo tuir. Jesus Kristu hateten: “Neʼe mak moris rohan laek: hatene Ita nudar Maromak los mesak deit, no Jesus Kristu nebe Ita haruka mai.” (Joao 17:3) Sin, “mundu neʼe . . .  liu dau-daun; maibe ema nebe halo tuir Maromak nia hakarak sei moris ba nafatin”.—1 Joao 2:​17.