“Toʼo rai sira neʼebé dook liu iha mundu”

1. Saida mak hanesan entre ema Kristaun iha tempu uluk ho Testemuña ba Jeová ohin loron?

SIRA haklaken ho laran-manas. Sira ho haraik an simu ajuda no matadalan husi espíritu santu. Kontradór sira labele hapara sira. No Maromak haraik bensaun barak ba sira. Neʼe mak buat neʼebé akontese ba ema Kristaun iha tempu uluk, no mós ba Testemuña ba Jeová ohin loron.

2, 3. Saida mak úniku kona-ba livru Apóstolu?

² Klaru, Ita hetan anima no Ita-nia fiar sai metin liután hodi estuda didiʼak livru Apóstolu sira-nia Atividade! Livru neʼe úniku, tanba husi livru hotu neʼebé Maromak dirije ema atu hakerek, só livru neʼe deʼit mak konta kona-ba ema Kristaun iha apóstolu sira-nia tempu.

³ Livru Apóstolu temi ema naʼin-95 nia naran neʼebé mai husi rai 32, sidade 54, no illa 9. Livru neʼe konta istória kona-ba ema baibain, ema relijiozu neʼebé foti an, polítiku-naʼin neʼebé halo an, no kontradór neʼebé siʼak. Maibé importante liu mak livru neʼe konta kona-ba fiar-naʼin sira iha tempu uluk neʼebé laʼós deʼit hasoru susar oioin iha sira-nia moris, maibé mós laran-manas atu haklaken liafuan diʼak.

4. Tanbasá ita sente besik ho apóstolu Paulo, Tabita, no fiar-naʼin seluk tan?

⁴ Livru Apóstolu konta kona-ba apóstolu Pedro no Paulo neʼebé laran-manas, doutór Lucas neʼebé ema barak hadomi, Barnabé neʼebé laran-luak, Estevão neʼebé aten-brani, Tabita neʼebé laran-diʼak, Lídia neʼebé gosta simu bainaka, no mós fiar-naʼin seluk neʼebé laran-metin. Maski sira moris maizumenus tinan 2.000 liubá, maibé ita sente besik ho sira. Tanbasá? Tanba ita iha knaar neʼebé hanesan, neʼe mak haklaken no hanorin. (Mt 28:19, 20) Neʼe mak priviléjiu furak atu hola parte iha serbisu neʼe!

5. Jesus nia dixípulu sira iha tempu uluk hahú haklaken husi neʼebé?

⁵ Hanoin toʼok kona-ba knaar neʼebé Jesus fó ba ninia dixípulu sira. Nia hatete: “Kuandu espíritu santu tun ba imi, imi sei simu kbiit, no imi sei sai haʼu-nia testemuña iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu.” (Após 1:8) Foufoun, dixípulu sira hetan kbiit liuhusi espíritu santu atu haklaken “iha Jeruzalein”. (Após 1:1–8:3) Tuirmai, espíritu santu dirije sira atu haklaken “iha Judeia tomak no iha Samaria”. (Após 8:4–13:3) Ikusmai, sira komesa haklaken liafuan diʼak “toʼo rai sira neʼebé dook liu iha mundu”.—Após 13:4–28:31.

6, 7. Kona-ba haklaken, saida mak la hanesan entre ita ohin loron ho ema Kristaun iha tempu uluk?

⁶ Fiar-naʼin sira iha tempu uluk la iha Bíblia neʼebé kompletu atu uza ba haklaken. Mateus foin hakerek kompletu ninia Evanjellu maizumenus tinan 41 EC. Paulo hakerek ninia karta balu antes Lucas hakerek hotu livru Apóstolu maizumenus tinan 61 EC. Tan neʼe, ema Kristaun iha tempu uluk la iha Bíblia kompletu ka publikasaun neʼebé bele uza atu haklaken. Antes sai Jesus nia dixípulu, ema Kristaun Judeu rona ona Eskritura Lian Ebraiku neʼebé sempre lee iha sinagoga. (2 Kor 3:14-16) Maibé, sira mós presiza badinas atu estuda, tanba sira tenke dekór eskritura neʼebé sira sei uza atu haklaken.

⁷ Ohin loron, ita barak iha Bíblia rasik no iha mós publikasaun barak kona-ba Bíblia. Ita hanorin ema atu sai dixípulu hodi haklaken liafuan diʼak iha rai 240 no iha língua oioin.

Hetan kbiit liuhusi espíritu santu

8, 9. (a) Espíritu santu ajuda Jesus nia dixípulu sira atu halo saida deʼit? (b) Espíritu santu ajuda atan laran-metin atu prodús saida deʼit?

⁸ Bainhira Jesus haruka dixípulu sira atu sai testemuña, nia hatete: “Kuandu espíritu santu tun ba imi, imi sei simu kbiit.” Liuhusi Jeová nia espíritu, ka ninia forsa, dixípulu sira sei sai testemuña iha mundu tomak. Liuhusi espíritu santu, Pedro no Paulo kura ema moras, duni sai anju aat, no mós fó moris-hiʼas ba ema mate! Maibé, razaun importante liu tanbasá sira simu espíritu santu mak atu ajuda dixípulu hotu atu haklaken lia-loos neʼebé lori ba moris rohan-laek.—João 17:3.

⁹ Iha loron Pentekostes 33 EC, Jesus nia dixípulu sira koʼalia “lian oioin hodi tuir buat neʼebé espíritu fó ba sira atu koʼalia”. Tan neʼe sira bele haklaken kona-ba “buat furak oioin neʼebé Maromak halo”. (Após 2:1-4, 11) Ohin loron, ita la simu milagre atu koʼalia língua oioin. Maibé, ho espíritu santu nia ajuda, atan laran-metin prodús daudaun publikasaun sira kona-ba Bíblia iha língua barak. Porezemplu, kada fulan ita prodús Livru Haklaken no Matan-moris bá! millaun ba millaun, no website jw.org mós fó sai publikasaun no vídeo oioin kona-ba Bíblia iha língua 1.000 liu. Neʼe ajuda ita atu haklaken “buat furak oioin neʼebé Maromak halo” ba ema husi nasaun, suku, no língua hotu.—Apok 7:9.

10. Husi tinan 1989, serbisu atu tradús Bíblia laʼo oinsá?

¹⁰ Husi tinan 1989, atan laran-metin fokus atu tradús Bíblia Sagrada Tradusaun Mundu Foun iha língua barak. Bíblia neʼe tradús ona ba língua 300 liu, no print ona millaun 240 liu no sei prodús tan. Sira-nia hakaʼas an bele susesu só deʼit ho ajuda husi Maromak no ninia espíritu santu.

11. Serbisu neʼebé Testemuña sira halo atu tradús publikasaun sira laʼo oinsá?

¹¹ Iha irmaun-irmán rihun ba rihun husi rai 150 liu mak halo serbisu voluntáriu atu tradús publikasaun sira. Neʼe la halo ita hakfodak, tanba la iha organizasaun seluk iha mundu neʼe mak hetan ajuda husi espíritu santu atu “fó sasin ho didiʼak” kona-ba Maromak Jeová, ninia Ukun neʼebé harii ona iha lalehan, no Liurai ba Ukun neʼe!—Após 28:23.

12. Tanbasá mak Paulo no ema Kristaun seluk bele halaʼo serbisu haklaken?

¹² Bainhira Paulo haklaken ba ema Judeu no ema husi nasaun seluk iha Antiokia iha Pisídia, “ema hotu neʼebé prontu atu simu lia-loos neʼebé lori ba moris rohan-laek . . . sai fiar-naʼin”. (Após 13:48) Parte ikus husi livru Apóstolu fó sai katak Paulo “la husik buat ida hanetik nia atu haklaken Maromak nia Ukun”. (Após 28:31) Paulo haklaken iha neʼebé? Iha Roma, sidade kapitál ba nasaun neʼebé iha kbiit boot liu! Jesus nia dixípulu sira hakaʼas an atu haklaken iha dalan oioin, no sira bele kumpre ida-neʼe tanba espíritu santu mak ajuda no dirije sira.

Tahan maski ema fó-terus

13. Tanbasá ita presiza halo orasaun bainhira ema fó-terus?

¹³ Bainhira ema fó-terus ba Jesus nia dixípulu sira, sira husu aten-brani husi Jeová. Rezultadu mak saida? Sira nakonu ho espíritu santu no simu kbiit atu haklaken Maromak nia liafuan ho aten-brani. (Após 4:18-31) Ita mós halo orasaun hodi husu matenek no forsa atu kontinua haklaken maski ema fó-terus. (Tgo 1:2-8) Tanba Jeová ajuda ita ho ninia espíritu santu, ita bele kontinua haklaken. La iha buat ida mak bele hapara serbisu haklaken maski ema kontra ka fó-terus makaʼas. Bainhira ema fó-terus, ita presiza halo orasaun hodi husu espíritu santu, matenek, no aten-brani atu haklaken liafuan diʼak.—Lc 11:13.

14, 15. (a) Depois Estevão mate no “ema hahú fó-terus boot”, saida mak akontese? (b) Oinsá mak ema barak iha Sibéria bele aprende lia-loos?

¹⁴ Estevão fó sasin ho aten-brani antes kontradór sira oho nia. (Após 6:5; 7:54-60) Husi tempu neʼebá “ema hahú fó-terus boot ba kongregasaun”, no dixípulu sira hotu halai namkari ba Judeia no Samaria, só apóstolu sira deʼit mak hela iha Jeruzalein. Maibé, situasaun neʼe la hapara serbisu haklaken. Filipe bá Samaria no “hahú haklaken kona-ba Kristu” no hetan rezultadu diʼak. (Após 8:1-8, 14, 15, 25) Bíblia mós konta: “Ema sira neʼebé laʼo namkari tanba terus neʼebé mosu depois Estevão mate, sira laʼo toʼo Fenísia, Xipre no Antiokia, maibé sira haklaken deʼit ba ema Judeu sira. Maibé mane balu husi sira-nia leet neʼebé mai husi Xipre no Sirene, sira laʼo ba Antiokia no hahú haklaken ba ema neʼebé koʼalia lian Gregu, no fó sai liafuan diʼak kona-ba Naʼi Jesus.” (Após 11:19, 20) Tanba ema fó-terus ba dixípulu sira, neʼe halo liafuan diʼak habelar ba fatin barak.

¹⁵ Iha tempu modernu, situasaun hanesan neʼe mós akontese iha Uniaun Soviétika. Liuliu hahú husi tinan 1951, Testemuña ba Jeová rihun ba rihun muda ba Sibéria nuʼudar dadur. Tanba sira namkari ba fatin oioin, neʼe halo liafuan diʼak habelar iha área neʼe. Imposivel ba Testemuña barak hanesan neʼe atu iha osan no halo viajen neʼebé dook maizumenus kilómetru 10.000 atu haklaken liafuan diʼak! Maibé, governu mak haruka sira bá fatin dook hanesan neʼe. Irmaun ida hatete: “Afinál autoridade sira-nia desizaun neʼe loke dalan ba ema rihun ba rihun neʼebé laran-loos iha Sibéria atu aprende lia-loos.”

Hetan bensaun barak husi Jeová

16, 17. Livru Apóstolu fó evidénsia saida deʼit neʼebé hatudu katak Jeová haraik bensaun ba serbisu haklaken?

¹⁶ Klaru katak Jeová haraik bensaun ba ema Kristaun iha tempu uluk. Paulo no ema seluk kuda no rega, maibé ‘Jeová mak halo moris’. (1 Kor 3:5, 6) Livru Apóstolu fó sai evidénsia katak ema barak sai Kristaun tanba hetan bensaun husi Jeová. Porezemplu, “Maromak nia liafuan kontinua habelar, no dixípulu sira kontinua aumenta barak tan iha Jeruzalein”. (Após 6:7) Nuʼudar dixípulu sira haklaken liafuan diʼak iha fatin oioin, “kongregasaun hotu iha Judeia, Galileia no Samaria tomak tama iha tempu dame nian, no sira kontinua sai metin liután no dixípulu barak aumenta liután tanba sira halaʼo moris ho hamtaʼuk ba Jeová no sente kmaan liuhusi espíritu santu”.—Após 9:31.

¹⁷ Iha Antiokia iha Síria, ema Judeu no mós ema neʼebé koʼalia lian Gregu rona liafuan diʼak husi haklaken-naʼin sira neʼebé aten-brani. Livru Apóstolu hatete: “Jeová nia liman hamutuk ho sira, no ema barak sai fiar-naʼin no tau fiar ba Naʼi.” (Após 11:21) Ita mós lee katak iha sidade neʼe “Jeová nia liafuan kontinua habelar no ema barak liután sai fiar-naʼin”. (Após 12:24) Nuʼudar Paulo no sira seluk haklaken ho badinas ba ema husi nasaun seluk, Jeová nia liafuan “kontinua habelar no ema barak tan sai fiar-naʼin”.—Após 19:20.

18, 19. (a) Tanbasá ita fiar katak “Jeová nia liman” hamutuk ho ita? (b) Fó toʼok ezemplu neʼebé hatudu katak Jeová apoia ninia atan sira.

¹⁸ Klaru katak “Jeová nia liman” mós hamutuk ho ita ohin loron. Tan neʼe mak ema barak sai fiar-naʼin, dedika sira-nia an ba Maromak, no hetan batizmu. Liután neʼe, ho Jeová nia ajuda deʼit mak ita bele kontinua tahan bainhira ema kontra no fó-terus makaʼas, no ita mós bele haklaken ho susesu hanesan apóstolu Paulo no ema Kristaun sira iha tempu uluk. (Após 14:19-21) Jeová sempre hamutuk ho ita. “Ninia liman neʼebé iha ba nafatin” sei apoia ita iha ita-nia susar hotu. (Deut 33:27) Ita mós presiza hanoin-hetan katak “tanba Jeová nia naran neʼebé boot”, nia sei nunka husik hela ninia atan sira.—1 Sam 12:22; Sal 94:14.

¹⁹ Haree toʼok ezemplu tuirmai: Tanba irmaun Harald Abt kontinua haklaken, Nazi haruka nia ba kampu-konsentrasaun iha Sachsenhausen durante Funu Mundiál Segundu. Iha Maiu 1942, soldadu Nazi bá ninia feen Elsa nia uma no foti sira-nia bebé feto no kaptura Elsa. Sira haruka Elsa ba kampu-konsentrasaun oioin. Irmán Elsa hatete: “Haʼu aprende buat neʼebé folin-boot durante tinan barak iha kampu-konsentrasaun iha Alemaña, katak Jeová nia espíritu bele hametin ita kuandu iha susar laran! Antes ema kaer haʼu, haʼu lee irmán ida nia karta neʼebé dehan katak Jeová nia espíritu mak ajuda ita kalma nafatin. Foufoun, haʼu hanoin buat neʼebé irmán neʼe hatete ladún tuir realidade, maibé kuandu haʼu rasik hasoru susar, haʼu rekoñese katak buat neʼebé nia dehan mak loos duni. Susar atu imajina se ita seidauk hasoru ida-neʼe. Maibé neʼe akontese duni mai haʼu.”

Kontinua fó sasin ho didiʼak!

20. Saida mak Paulo halo durante sai dadur iha uma, no oinsá mak neʼe bele anima irmaun-irmán balu?

²⁰ Livru Apóstolu remata hodi konta katak Paulo “haklaken Maromak nia Ukun” ho laran-manas. (Após 28:31) Tanba sai dadur iha uma, nia labele haklaken husi uma ba uma iha Roma. Maski nuneʼe, nia kontinua haklaken ba ema hotu neʼebé vizita nia. Ohin loron, irmaun-irmán balu labele sai husi uma, karik tanba moras, idade ona, ka aleijadu. Maibé, sira hadomi tebes Jeová no nafatin laran-manas atu haklaken. Tan neʼe mai ita halo orasaun hodi husu Aman Jeová atu ajuda sira hasoru ema neʼebé hakarak aprende kona-ba Nia no Ninia hakarak neʼebé furak.

21. Tanbasá ita tenke haklaken ho urjente?

²¹ Ita barak bele haklaken husi uma ba uma no hola parte iha dalan seluk tan atu ajuda ema sai Jesus nia dixípulu. Tan neʼe, mai ita hakaʼas an atu bele kumpre ita-nia knaar hodi haklaken kona-ba Maromak nia Ukun “toʼo rai sira neʼebé dook liu iha mundu”. Ita tenke halaʼo serbisu neʼe ho urjente, tanba ita haree duni “sinál” neʼebé hatudu katak Jesus Kristu ukun ona iha lalehan. (Mt 24:3-14) Tan neʼe, uza didiʼak ita-nia tempu. Agora mak tempu ba ita atu “sai badinas nafatin iha Naʼi nia serbisu”.—1 Kor 15:58.

22. Nuʼudar ita hein ba Jeová nia loron, ita presiza deside metin atu halo saida?

²² Nuʼudar ita hein ba “Jeová nia loron neʼebé boot no kmanek liu toʼo mai”, mai ita deside metin atu kontinua fó sasin ho aten-brani no laran-metin. (Joel 2:31) Ita sei hetan ema barak hanesan ema iha Bereia neʼebé “simu Maromak nia liafuan ho laran-manas”. (Após 17:10, 11) Tan neʼe, mai ita kontinua fó sasin ho didiʼak toʼo ita “rona” liafuan neʼebé dehan: “Diʼak tebes! Ó atan diʼak no laran-metin.” (Mt 25:23) Se ita badinas halo ita-nia parte no kontinua laran-metin ba Jeová, ita sei sente haksolok ba nafatin tanba ita iha priviléjiu atu hola parte hodi “fó sasin ho didiʼak kona-ba Maromak nia Ukun”!