KAPÍTULU 8
Oinsá haʼu bele hetan belun diʼak?
“Bainhira haʼu sente hirus, haʼu presiza fó sai ida-neʼe ba ema ruma. Kuandu haʼu triste, haʼu hakarak ema ruma fó kmaan mai haʼu. No se haʼu sente kontente, haʼu hakarak ema ruma sente kontente ho haʼu. Ba haʼu, importante tebes atu iha belun.”—Brittany.
EMA hatete katak labarik sira presiza labarik seluk atu bele halimar hamutuk, maibé joven sira presiza belun. Saida mak la hanesan?
Kolega mak ema neʼebé halimar hamutuk ho Ita.
Belun mak ema neʼebé iha morál hanesan ho Ita-nian.
Bíblia mós hatete katak “belun neʼebé loos hatudu domin iha tempu hotu no nia sai hanesan maun ka alin ida iha tempu susar”. (Provérbios 17:17) Neʼe la hanesan duni ho kolega sira neʼebé halimar hamutuk ho ita iha fatin halimar nian bainhira ita kiʼik.
Realidade: Nuʼudar Ita sai boot, Ita presiza belun neʼebé
1. Iha hahalok diʼak
2. Moris tuir morál neʼebé diʼak
3. Bele fó influénsia diʼak ba Ita
Pergunta: Oinsá mak Ita bele hetan belun neʼebé kumpre kritéria sira-neʼe? Mai Ita koʼalia kona-ba kritéria ida-idak.
Kritéria #1—Hahalok diʼak
Buat neʼebé Ita presiza hatene. Laʼós ema hotu bele sai belun neʼebé diʼak ba Ita. Bíblia mós hatete katak “iha kolega balu neʼebé hakarak atu halo aat ba malu”. (Provérbios 18:24) Karik neʼe rona hanesan demais uitoan. Maibé hanoin toʼok: Uluk Ita iha “belun” neʼebé aproveita deʼit Ita ka lae? Oinsá ho “belun” neʼebé koʼalia aat no habelar gosip kona-ba Ita? Esperiénsia sira hanesan neʼe bele book Ita atu lakon fiar ba ema seluk.a Hanoin-hetan katak atu hili belun, buat neʼebé importante mak hili belun neʼebé diʼak, laʼós belun hira mak Ita iha!
Buat neʼebé Ita bele halo. Hili belun neʼebé iha hahalok diʼak sira neʼebé Ita bele banati-tuir.
“Ema hotu koʼalia pozitivu kona-ba haʼu-nia belun Fiona. Haʼu mós hakarak ema seluk koʼalia buat pozitivu hanesan neʼe kona-ba haʼu. Haʼu hakarak iha naran neʼebé diʼak hanesan nia. Haʼu admira ninia hahalok sira.”—Yvette, 17.
Koko toʼok ida-neʼe.
1. Lee Galásia 5:22, 23.
2. Husu ba Ita-nia an: ‘Haʼu-nia belun sira haburas “hahalok sira neʼebé mai husi Maromak nia espíritu” ka lae?’
3. Hakerek iha kraik Ita-nia belun diʼak sira-nia naran. Iha naran ida-idak nia sorin, hakerek sira-nia hahalok sira.
Naran
․․․․․
Hahalok
․․․․․
Sujestaun: Se mosu deʼit hahalok la diʼak iha Ita-nia neon bainhira Ita hanoin kona-ba ema neʼe, karik diʼak ba Ita atu buka belun seluk neʼebé diʼak liu.
Kritéria #2—Morál neʼebé diʼak
Buat neʼebé Ita presiza hatene. Se Ita-nia hakarak atu iha belun mak makaʼas tebes, karik Ita sei habelun ho ema neʼebé la diʼak. Bíblia hatete: “Ema neʼebé ransu ho ema beik sei hetan problema boot.” (Provérbios 13:20) Liafuan “ema beik” la refere ba estudante neʼebé hetan valór aat iha ezame ka ema neʼebé la matenek. Maibé neʼe refere ba ema neʼebé la hatene oinsá atu hanoin didiʼak no halo deʼit hahalok neʼebé la tuir morál diʼak. Ita lakohi habelun ho ema hanesan neʼe.
Buat neʼebé Ita bele halo. Duké habelun ho ema naran deʼit, diʼak atu hili didiʼak Ita-nia belun. (Salmo 26:4) Maibé neʼe la dehan katak Ita todan ba sorin. Iha kontestu neʼe, hili didiʼak katak ita komprende no “haree duni oinsá ema laran-loos la hanesan ho ema aat, ema neʼebé serbí Maromak la hanesan ho ema neʼebé la serbí nia”.—Malaquias 3:18.
“Haʼu agradese tanba haʼu-nia inan-aman ajuda haʼu atu hetan belun diʼak. Belun neʼebé idade hanesan ho haʼu no moris tuir Maromak nia matadalan.”—Christopher, 13.
Hatán pergunta sira tuirmai neʼe:
Bainhira hamutuk ho haʼu-nia belun sira, haʼu taʼuk katak karik sira sei obriga haʼu atu halo buat neʼebé sala ka lae?
□ Sin
□ Lae
Haʼu dada an atu fó koñese haʼu-nia belun ba haʼu-nia inan-aman tanba taʼuk sira la gosta haʼu-nia belun ka lae?
□ Sin
□ Lae
Sujestaun: Se Ita hatán sin ba pergunta sira iha leten, diʼak atu Ita buka belun neʼebé moris tuir morál neʼebé diʼak. Belun sira neʼebé hatudu ezemplu diʼak nuʼudar ema Kristaun.
Kritéria #3—Fó influénsia diʼak
Buat neʼebé Ita presiza hatene. Bíblia hatete: “Ransu hamutuk ho ema aat sei estraga morál neʼebé diʼak.” (1 Korinto 15:33, nota) Feto joven naran Lauren hatete: “Haʼu-nia kolega eskola hakarak ransu ho haʼu se haʼu halo tuir buat neʼebé sira haruka. Tanba sente mesamesak, haʼu deside atu sai hanesan sira hodi sira bele simu haʼu.” Lauren ikusmai komprende katak se ita halo tuir deʼit ema seluk nia hakarak, ita sai hanesan ho atan ida neʼebé ema seluk bele manda tuir sira-nia hakarak. Ita merese atu hetan belun neʼebé bele trata ita iha dalan neʼebé diʼak.
Buat neʼebé Ita bele halo. Lalika ransu tan ho ema sira neʼebé obriga Ita atu halo tuir sira. Hodi halo nuneʼe, karik Ita iha deʼit kolega uitoan, maibé Ita sei sente iha folin no Ita iha oportunidade atu hetan belun diʼak liu neʼebé bele fó influénsia diʼak ba Ita.—Roma 12:2.
“Haʼu-nia belun diʼak Clint mak ema neʼebé kalma no hanoin ema, no rezultadu mak nia sai ema neʼebé sempre motiva haʼu.”—Jason, 21.
Husu ba Ita-nia an:
Haʼu troka haʼu-nia jeitu atu hatais, koʼalia ka hatudu hahalok neʼebé la diʼak atu halo kontente haʼu-nia belun ka lae?
□ Sin
□ Lae
Haʼu bá beibeik fatin sira neʼebé ladún iha morál atu halo haʼu-nia belun sira kontente ka lae?
□ Sin
□ Lae
Sujestaun: Se Ita hatán sin ba pergunta sira iha leten, husu matadalan husi Ita-nia inan-aman ka ema seluk neʼebé idade boot liu Ita. Se Ita mak Testemuña ba Jeová, Ita mós bele hakbesik ba katuas kongregasaun ida no fó-hatene nia katak Ita presiza ninia ajuda atu buka belun neʼebé bele fó influénsia diʼak ba Ita.
[Nota-rodapé]
a Klaru katak ema hotu la perfeitu no halo sala. (Roma 3:23) Tan neʼe, kuandu Ita-nia belun ida hakanek Ita-nia laran maibé tuirmai nia husu deskulpa, hanoin-hetan katak “domin . . . fó perdua ba sala barak”.—1 Pedro 4:8.
ESKRITURA
“Iha mós belun neʼebé laran-metin liu fali maun-alin.”—Provérbios 18:24.
SUJESTAUN
Halaʼo Ita-nia moris tuir morál neʼebé loos, no ema neʼebé hakaʼas an atu halo hanesan neʼe sei hakbesik Ita. Sira sei belun neʼebé diʼak liu hotu.
HATENE KA LAE . . . ?
Maromak la todan ba sorin, maibé nia hili didiʼak ema neʼebé bele sai ‘bainaka iha ninia tenda’.—Salmo 15:1-5.
HALO PLANU
Atu bele hetan belun diʼak, haʼu sei ․․․․․
Ema neʼebé idade liu haʼu neʼebé haʼu hakarak koñese diʼak liután mak ․․․․․
Buat neʼebé haʼu hakarak husu ba haʼu-nia inan-aman kona-ba tópiku neʼe mak ․․․․․
ITA HANOIN OINSÁ?
● Hahalok saida deʼit mak Ita hafolin liu husi Ita-nia belun no tanbasá?
● Hahalok saida deʼit mak Ita presiza haburas atu bele sai belun neʼebé diʼak?
[Liafuan]
“Bainhira haʼu-nia inan-aman anima haʼu atu la ransu ho haʼu-nia belun balu, haʼu hatete ba haʼu-nia an katak haʼu hakarak atu ransu deʼit ho sira. Maibé kuandu haʼu hanoin didiʼak, haʼu-nia inan-aman nia konsellu mak diʼak tanba ajuda haʼu rekoñese katak iha belun barak neʼebé diʼak.”—Cole
[Kaixa]
Koko sujestaun sira-neʼe
Koʼalia ho Ita-nia inan-aman kona-ba habelun ho ema. Husu ba sira kona-ba sira habelun ho ema hanesan saida bainhira sira-nia tinan hanesan ho Ita. Sira arrepende sira-nia desizaun kona-ba belun neʼebé sira hili ka lae? Se sin, tanbasá? Husu sira kona-ba oinsá Ita mós bele hasees an husi problema neʼebé uluk sira hasoru.
Fó koñese Ita-nia belun ba Ita-nia inan-aman. Se Ita dada an atu halo nuneʼe, husu ba Ita-nia an: “Saida mak hanetik haʼu?” Iha buat ruma neʼebé la loos kona-ba Ita-nia belun sira neʼebé Ita-nia inan-aman sei la gosta ka lae? Se sin, karik Ita presiza hili didiʼak ema neʼebé sei sai Ita-nia belun.
Sai rona-naʼin neʼebé diʼak. Hatudu interese ba Ita-nia belun nia situasaun no ba buat neʼebé nia hanoin.—Filipe 2:4.
Lalais atu fó perdua. Hanoin-hetan katak ita hotu la perfeitu. “Ita hotu halo sala dala barak.”—Tiago 3:2.
Fó tempu ba Ita-nia belun atu mesak. Ita la presiza hamutuk hela deʼit ho sira. Belun neʼebé loos sei prontu iha tempu naran deʼit neʼebé Ita presiza sira.—Eclesiastes 4:9, 10.
[Dezeñu]
Se ita halo tuir deʼit ema seluk nia hakarak, ita sai hanesan ho atan ida neʼebé ema seluk bele manda tuir sira-nia hakarak