KAPÍTULU 25
Oinsá haʼu bele hapara toman atu halo masturbasaun?
“Haʼu komesa halo masturbasaun kuandu haʼu tinan ualu. Lakleur haʼu aprende Jeová nia hanoin kona-ba hahalok neʼe. Haʼu sente haʼu-nia an mak foʼer loos bainhira haʼu rende an ba hahalok neʼe. Haʼu husu ba haʼu-nia an: ‘Jeová bele hadomi ema hanesan haʼu ka lae?’”—Luiz.
BAINHIRA Ita tama ba tempu joven, hakarak seksuál bele sai makaʼas tebes. No rezultadu mak Ita bele sai toman atu halo masturbasaun.a Tuir ema barak nia hanoin, neʼe laʼós problema boot. Sira hanoin katak “neʼe sei la hakanek ema ida”. Maibé iha duni razaun neʼebé diʼak atu hadook an husi toman neʼe. Apóstolu Paulo hakerek: “Hamate hakarak isin nian . . . hakarak seksuál.” (Koloso 3:5) Halo masturbasaun la hamate hakarak seksuál, maibé haburas hakarak neʼe. Liután neʼe, hanoin toʼok buat balu tuirmai:
● Masturbasaun halo ema haburas hahalok hanoin an deʼit. Porezemplu, bainhira halo masturbasaun, ema ida sente haksolok ho ninia isin rasik.
● Masturbasaun halo ema ida atu haree ema seluk nuʼudar objetu ida ba ninia hakarak seksuál.
● Hahalok hanoin an deʼit neʼebé mosu tanba halo masturbasaun bele halo ema la sente kontente ho relasaun seksuál iha sira-nia moris kaben nian.
Duké rende an deʼit ba hakarak seksuál hodi halo masturbasaun, hakaʼas an atu haburas hahalok kontrola an. (1 Tesalónika 4:4, 5) Atu bele ajuda Ita, Bíblia anima Ita atu hasees an husi situasaun sira neʼebé hamosu Ita-nia hakarak seksuál. (Provérbios 5:8, 9) Maibé saida mak Ita presiza halo se Ita toman ona atu halo masturbasaun? Karik Ita hakaʼas an ona atu hapara toman neʼe, maibé la susesu. Karik fasil deʼit atu hanoin katak Ita sei nunka bele hapara toman neʼe no Ita sei nunka bele moris tuir Maromak nia prinsípiu kona-ba morál. Joven mane ida naran Pedro mós hanoin hanesan neʼe kona-ba ninia an. Nia hatete: “Kuandu haʼu la konsege kontrola an no monu ba hahalok neʼe, haʼu sente laran-kraik loos. Haʼu sente haʼu sei nunka bele hetan perdua ba haʼu-nia sala. Haʼu sente susar tebes atu halo orasaun.”
Se Ita mós sente nuneʼe, keta sai laran-kraik. Ita bele duni hadiʼa Ita-nia situasaun. Iha joven no ema boot barak neʼebé susesu atu hapara sira-nia toman atu halo masturbasaun. Ita mós bele.
Bainhira Ita-nia laran fó-sala ba Ita
Hanesan temi ona, ema sira neʼebé iha toman atu halo masturbasaun, sempre sente katak sira-nia laran fó-sala ba sira. Klaru katak se Ita “sai triste tuir Maromak nia hakarak”, neʼe bele motiva Ita atu hapara toman neʼe. (2 Korinto 7:11) Maibé se Ita fó-sala demais ba Ita-nia an, neʼe sei halo situasaun sai aat liu. Neʼe sei halo Ita sai laran-kraik tebes toʼo rende an deʼit.—Provérbios 24:10.
Tan neʼe hakaʼas an atu iha hanoin neʼebé loos kona-ba Ita-nia situasaun. Masturbasaun mak hahalok neʼebé la moos. Hahalok neʼe bele halo Ita “sai atan ba hakarak oioin no buka ksolok deʼit” no book Ita atu haburas hanoin neʼebé la diʼak. (Tito 3:3) Maibé masturbasaun laʼós sala seksuál neʼebé aat tebes, hanesan relasaun seksuál entre ema neʼebé seidauk kaben. (Judas 7) Tan neʼe, se Ita iha toman atu halo masturbasaun, keta hanoin katak Ita halo ona sala neʼebé boot tebetebes toʼo labele hetan ona perdua. Buat importante neʼebé Ita presiza halo mak kontra Ita-nia hakarak atu halo masturbasaun no nunka rende an!
Karik Ita sai laran-kraik tebes iha tempu ida-idak neʼebé Ita rende an ba hakarak neʼe. Se Ita monu fali ba hakarak neʼe, neʼe la dehan katak Ita mak ema neʼebé aat. Tan neʼe keta rende an. Maibé buka-hatene saida deʼit mak book Ita atu monu ba sala atu halo masturbasaun, no hakaʼas an atu la halo sala neʼebé hanesan.
Buka tempu atu medita kona-ba Maromak nia domin no laran-diʼak. Salmo nia hakerek-naʼin ida naran David neʼebé mós halo sala tanba ninia fraku rasik hatete: “Hanesan aman hatudu laran-sadiʼa ba ninia oan sira, Jeová mós hatudu laran-sadiʼa ba sira neʼebé hamtaʼuk nia. Tanba nia hatene ho didiʼak nia kria ita husi saida, no nia hanoin-hetan katak ita mak rai-rahun deʼit.” (Salmo 103:13, 14) Sin, Jeová hatene didiʼak ita-nia fraku sira no nia “prontu atu fó perdua”. (Salmo 86:5) Maibé nia mós hakarak ita hakaʼas an atu hadiʼa ita-nia hahalok. Entaun, saida deʼit mak Ita bele halo atu hapara toman atu halo masturbasaun?
Analiza Ita-nia atividade halimar nian. Ita haree filme ka programa televizaun ka vizita website neʼebé hamosu Ita-nia hakarak seksuál ka lae? Salmo nia hakerek-naʼin ida halo orasaun ba Maromak hodi hatete: “Keta husik haʼu hateke nafatin ba buat neʼebé folin-laek.”—Salmo 119:37.
Koko makaʼas atu tau fokus ba buat seluk. Mane Kristaun ida naran William hatete: “Antes toba, lee informasaun ruma neʼebé liga ho buat espirituál. Neʼe importante atu ita bele iha hanoin neʼebé diʼak tuir Maromak nia haree antes ita toba.”—Filipe 4:8.
Koʼalia ho ema ruma kona-ba Ita-nia problema neʼe. Karik Ita sente moe atu fó sai Ita-nia problema ba ema neʼebé Ita tau fiar. Maibé se Ita koʼalia ba ema neʼe, karik Ita bele hetan ajuda atu hapara toman atu halo masturbasaun. Neʼe mak buat neʼebé joven Kristaun ida naran David sente. Nia hatete: “Haʼu koʼalia nakloke ba haʼu-nia apá. No haʼu sei nunka haluha ninia liafuan ba haʼu. Ho oin-midar nia hatete: ‘Haʼu orgullu tebes ho ó tanba ó brani fó sai kona-ba neʼe.’” Nia hatene katak la fasil ba haʼu atu halo nuneʼe. Ninia liafuan sira anima tebes haʼu atu hakaʼas an liután hodi hapara haʼu-nia toman neʼe.
“Tuirmai haʼu-nia apá hatudu eskritura balu atu ajuda haʼu komprende katak ‘haʼu laʼós ema aat’ no mós eskritura balu tan atu ajuda haʼu komprende katak haʼu-nia toman neʼe sala duni. Nia husu haʼu atu la halo ida-neʼe ba tempu balu no ami sei koʼalia tan kona-ba neʼe. Nia mós hatete mai haʼu atu la rende an se haʼu halo fali ida-neʼe, maibé haʼu presiza hakaʼas an liután ba tempu kleur liu.” Saida mak David nia konkluzaun? Nia hatete: “Benefísiu neʼebé boot liu mak iha ema ida neʼebé hatene kona-ba haʼu-nia problema neʼe no ajuda haʼu.”
[Nota-rodapé]
a Masturbasaun mak hahalok neʼebé ema halo ho neon hodi hamosu hakarak seksuál. Ida-neʼe la hanesan duni ho situasaun bainhira ema ida nia hakarak seksuál sai makaʼas, maski nia la iha intensaun kona-ba neʼe. Porezemplu, joven mane ida bele hadeer derrepente iha kalan-boot ho hakarak seksuál neʼebé makaʼas no ninia oin-lulik hasai been. Feto balu mós hasoru situasaun hanesan, sira-nia hakarak seksuál sai makaʼas, liuliu antes no depois menstruasaun, maski sira la iha intensaun.
ESKRITURA
“Halai sees husi hakarak joven nian, maibé buka hahalok loos, fiar, domin, dame, hamutuk ho sira neʼebé bolu Naʼi ho laran-moos.”—2 Timóteo 2:22.
SUJESTAUN
Halo orasaun antes hakarak atu halo masturbasaun sai makaʼas liu. Husu Maromak Jeová atu fó ba Ita “kbiit neʼebé la hanesan baibain” atu bele tahan tentasaun neʼe.—2 Korinto 4:7.
HATENE KA LAE . . . ?
Ema neʼebé fraku rende an deʼit ba ninia hakarak seksuál. Maibé mane no feto neʼebé forte sei kontrola an maski nia mesamesak.
HALO PLANU
Haʼu bele kontinua hanoin kona-ba buat neʼebé moos se haʼu ․․․․․
Duké rende an deʼit ba hakarak atu halo masturbasaun, haʼu sei ․․․․․
Buat neʼebé haʼu hakarak husu ba haʼu-nia inan-aman kona-ba tópiku neʼe mak ․․․․․
ITA HANOIN OINSÁ?
● Tanbasá importante atu nafatin hanoin-hetan katak Jeová “prontu atu fó perdua”?—Salmo 86:5.
● Se Jeová neʼebé kria ema ho hakarak seksuál, haruka ema atu kontrola an, klaru katak Jeová iha konfiansa katak Ita bele halo saida?
[Liafuan]
“Depois hapara tiha haʼu-nia toman atu halo masturbasaun, haʼu sente haʼu-nia konxiénsia mak moos iha Jeová nia oin, no haʼu lakohi lakon ida-neʼe!”—Sarah
[Dezeñu]
Se Ita monu bainhira halai, neʼe la dehan katak Ita presiza halai fali husi primeiru, nuneʼe mós se Ita halo fali masturbasaun, neʼe la dehan katak Ita-nia hakaʼas an atu hapara toman neʼe mak saugati