Terus hotu sei lakon ka lae?

SAIDA MAK BÍBLIA HATETE?

“Maromak . . . sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras.”​—Apokalipse 21:3, 4, Tradusaun Mundu Foun.

NEʼE LORI BENEFÍSIU SAIDA BA ITA?

Ita bele sente kmaan atu hatene katak susar neʼebé ita hasoru la mai husi Maromak.​—Tiago 1:13.

Ita bele sente kmaan tanba hatene katak Maromak hanoin ita bainhira ita hetan terus.​—Zacarias 2:8.

Ita iha esperansa katak terus hotu sei la iha tan.​—Salmo 37:9-11.

ITA BELE FIAR DUNI BUAT NEʼEBÉ BÍBLIA HATETE KA LAE?

Bele, tanba razaun rua:

• Maromak odi terus no hahalok la justisa. Hanoin toʼok Maromak Jeová sente oinsá bainhira ema halo aat ba ninia povu iha tempu uluk. Bíblia dehan katak Maromak sente laran-kanek kuandu nia haree ema hanehan no halo aat ba ninia povu.​—Juís 2:18.

  Maromak la gosta bainhira ema halo aat ba ema seluk. Porezemplu, Bíblia hatete katak Maromak hakribi “liman neʼebé fakar ema laran-moos nia raan”.​—Provérbios 6:16, 17.

• Maromak hanoin ita ida-idak. Maromak Jeová hatene ema ida-idak nia “terus no susar neʼebé iha sira-nia laran”.​—2 Krónikas 6:29, 30.

  Lakleur tan, Maromak Jeová nia Ukun sei halakon terus neʼebé ema ida-idak hasoru. (Mateus 6:9, 10) Maibé antes toʼo tempu neʼe, Maromak fó kmaan ba ema neʼebé hakaʼas an atu buka nia.​—Apóstolu 17:27; 2 Korinto 1:3, 4.